គូស្នេហ៍តារាថៃល្បីៗ៥គូ ដែលចែកផ្លូវគ្នាទៅហើយ ក៏នៅតែមានទំនាក់ទំនងស្អិតល្មួត
- 2017-07-28 03:13:09
- ចំនួនមតិ 0 | ចំនួនចែករំលែក 0
គូស្នេហ៍តារាថៃល្បីៗ៥គូ ដែលចែកផ្លូវគ្នាទៅហើយ ក៏នៅតែមានទំនាក់ទំនងស្អិតល្មួត
ខណៈគូស្នេហ៍ជាច្រើនបែកគ្នាហើយក៏មើលមុខគ្នាលែងចំ គូស្នេហ៍មួយចំនួនដែលចែកផ្លូវគ្នាហើយ ក៏នៅតែអាចរាប់អានគ្នាជាមិត្តភ័ក្ដិ ជាមិត្តរួមការងារធម្មតា ដោយសារពួកគេបានបែកគ្នាដោយសន្តិភាព មិនមានបញ្ហាល្អក់កករជាមួយគ្នាឡើយ។ ប្រៀបដូចតារាល្បីៗក្នុងប្រទេសថៃចំនួន ៥គូខាងក្រោមនេះ គឺនៅតែមានភាពរឹងមាំក្នុងការប្រឈមមុខយ៉ាងបើកចំហជាមួយគ្នា និងធ្វើការជាមួយគ្នាយ៉ាងសប្បាយចិត្ត។
១. Pong Nawat និង Kaew Jarinya
ត្បិតតែបែកគ្នាហើយ ប៉ុន្តែអ្នកទាំងពីរក៏នៅតែទាក់ទងគ្នា ជជែកលេងជាមួយគ្នាបាន និងមានភាពជាបងប្អូនល្អនឹងគ្នា។ ចុងក្រោយនេះក្នុងកម្មវិធី “Watch Expo 2017” អ្នកទាំងពីរក៏បានមកចាប់ដៃគូធ្វើការជាមួយគ្នាម្ដងទៀតលើវេទិកាដើរម៉ូដ និងមានកាន់ដៃគ្នាថែមទៀត។
២. Shakrit Yamnam និង Woonsen Virithipa
អតីតប្ដីប្រពន្ធតារាដ៏ល្បីក្នុងសិល្បៈថៃមួយគូនេះ នៅតែមានមុខជំនួញរកស៊ីជាមួយគ្នា និងជួបគ្នាតាមឱកាសផ្សេងៗ។ ចុងក្រោយនេះ កាលពីខែមីនា តារាសម្ដែង Woonsen បានទៅចូលរួមអបអរពិធីសម្ពោធហាងថ្មី KRBB Boutique Butcher របស់អតីតស្វាមីខ្លួន និងមានការឱប និងថើបគ្នាយ៉ាងស្និទ្ធស្នាលដដែល។
៣. Alex Rendell និង Toey Jarinporn
គូស្នេហ៍តារាសម្ដែងវ័យក្មេងមួយគូនេះបានធ្វើឲ្យអ្នកគាំទ្រជាច្រើនភ្ញាក់ផ្អើលក្រោយប្រកាសដំណឹងចែកផ្លូវគ្នា ប៉ុន្តែក្រោយពីការបែកគ្នានោះមក អ្នកទាំងពីរក៏នៅតែជាមិត្តភ័ក្ដិនឹងគ្នា និងតែងរំឭកឈ្មោះគ្នាទៅវិញទៅមកជាធម្មតា។ អ្វីដែលសំខាន់ពួកគេបានចាប់ដៃគ្នាធ្វើគម្រោងសប្បុរសធម៌មួយដើម្បីជួយដល់សត្វដំរីប្រទេសថៃ និងរីករាយជានិច្ចបើសិនជាមានការងារសិល្បៈឬថតភាពយន្តជាមួយគ្នា។
៤. Art Pasut និង Namfon Patcharin
តារាសម្ដែងទាំងគូធ្លាប់ស្រឡាញ់គ្នាយ៉ាងខ្លាំង ប៉ុន្តែក៏មានហេតុផលដែលតម្រូវឲ្យចែកផ្លូវគ្នា។ តែទោះយ៉ាងណា អ្នកទាំងពីរក៏នៅត្រលប់មកធ្វើការជាមួយគ្នាបានក្នុងរឿងភាគ “KhaewRadChaSee” បានដោយគ្មានបញ្ហា។
៥. Ter Chantavith និង Peak Patrasaya
ជាគូស្នេហ៍តារាដែលបែកគ្នាហើយ ប៉ុន្តែក៏នៅមានអ្នកដែលចង់ឲ្យត្រលប់មកស្រឡាញ់គ្នាវិញច្រើនបំផុត ខណៈអ្នកទាំងពីរក៏នៅតែជាបងប្អូនដែលមានអារម្មណ៍ល្អចំពោះគ្នានឹងគ្នា និងនៅតែធ្វើមុខជំនួញរួមគ្នា ថែមទាំងធ្វើការជាមួយគ្នាថែមទៀត មិនថាសម្ដែងរឿងភាគ ឡើងប្រគំតន្ត្រី ឬថតកម្មវិធីទូរទស្សន៍ក្ដី ៕