មិនចង់ឈឺចាប់ដោយការបែកគ្នា គូស្នេហ៍ត្រូវដឹងរឿង៩យ៉ាងនេះ
- 2017-07-27 08:40:00
- ចំនួនមតិ 0 | ចំនួនចែករំលែក 0
មិនចង់ឈឺចាប់ដោយការបែកគ្នា គូស្នេហ៍ត្រូវដឹងរឿង៩យ៉ាងនេះ
ការសាងទំនាក់ទំនងស្នេហាមួយបាន មិនមែនជារឿងងាយស្រួលនោះទេ ព្រោះយើងត្រូវចំណាយពេលវេលាមើលចិត្តគ្នាទៅវិញទៅមកយ៉ាងយូរ ចំណាយប្រាក់ច្រើនទិញរបស់របរ និងធ្វើដំណើរកម្សាន្តជិតឆ្ងាយ ដើម្បីបង្កើតអនុស្សាវរីយ៍ផ្អែមល្ហែមរវាងគ្នា។
ប្រសិនបើទំនាក់ទំនងនេះបានបញ្ចប់ទាំងចិត្តមិនទាន់អស់ស្រលាញ់ ភាគីម្ខាងច្រើនតែសួរខ្លួនឯងថា ខ្លួនបានធ្វើអ្វីខុស? បើចង់រក្សាទំនាក់ទំនងគូស្នេហ៍ឲ្យបានយូរអង្វែង និងជៀសវាងជួបបញ្ហារកាំរកូសនាំឲ្យឈានដល់ថ្ងៃបែកបាក់គ្នា សូមស្វែងយល់ និងប្រកាន់ខ្ជាប់នូវចំណុចខាងក្រោមនេះ៖
១. គិតរឿងទំនាក់ទំនងមុនគេ
អ្នកត្រូវបង្ហាញឲ្យដៃគូឃើញការយកចិត្តទុកដាក់ ផ្ដល់កម្លាំងចិត្ត ភាពទន់ភ្លន់ និងក្ដីស្រលាញ់របស់អ្នកចំពោះគ្នា ហើយមិនគួរបណ្ដោយឲ្យកើតមានការខឹងសម្បារញឹកញាប់ឡើយ។ ប្រសិនបើអ្នកខ្វល់ខ្វាយនឹងទំនាក់ទំនងស្នេហា អ្នកប្រាកដជានឹងចង់បន្តរក្សាឲ្យវាមានជារៀងរហូត។
២. ស្វែងយល់ចំណង់ចំណូលចិត្តដៃគូ
អ្នកអាចសាកសួរខ្លួនឯងថា តើនាង/គាត់ ចង់បានអ្វី ឬចូលចិត្តធ្វើអ្វី។ តើដៃគូត្រូវការការលើកទឹកចិត្តឬអត់? តើអ្នកត្រូវចំណាយពេលបន្ថែមនៅក្បែរនាង/គាត់ទេ? តើអ្នកអាចធ្វើអ្វីបាន ដើម្បីឲ្យដៃគូសប្បាយចិត្តជាមួយគ្នា។
៣. ការប្រាស្រ័យទាក់ទងគ្នា គឺជារឿងសំខាន់
ត្រូវរក្សាការទាក់ទងគ្នាឲ្យជាប់ ឬអាចឃើញមុខគ្នាឲ្យបានម្ដងក្នុងមួយថ្ងៃ បើអ្នកទាំងពីររវល់នឹងការងាររៀងៗខ្លួន។ បើនៅឆ្ងាយគ្នា ត្រូវប្រើប្រាស់បណ្ដាញសង្គម ឬទូរសព្ទផ្ញើសារពីការនឹករលឹកចំពោះគ្នា។
៤. ចងចាំទីកន្លែងអ្នកចាប់ផ្ដើមស្រលាញ់គ្នា
ការចងចាំទីកន្លែង និងពេលវេលាបានជួបគ្នាដំបូង គឺជារឿងមួយធ្វើឲ្យអ្នកមានអារម្មណ៍ថាជាភាពផ្អែមល្ហែម និងមានន័យបំផុត ក្នុងទំនាក់ទំនងស្នេហា។
៥. ត្រូវដឹងថាអ្នកចង់ទៅលេងកន្លែងណា
ត្រូវជជែកគ្នាស្វែងរកទីកន្លែងដើរកម្សាន្តដ៏រ៉ូមែនទិក និងស្ងប់ស្ងាត់ ដើម្បីពង្រឹងទំនាក់ទំនងស្នេហាក៏ដូចជាបង្កើតអនុស្សាវរីយល្អៗ និងសប្បាយរីករាយជាមួយគ្នា។
៦. បើកចិត្តឲ្យទូលាយ
ដៃគូសងខាង ត្រូវចេះលើកលែងអធ្យាស្រ័យឲ្យគ្នា បើម្នាក់ធ្វើខុសជ្រុលជ្រួស និងមិនត្រូវប្រតិកម្មភ្លាមៗ គួរស្វែងយល់ឫសគល់បញ្ហាជាមុនសិន។ គូស្នេហ៍មួយចំនួន ត្រូវគេមើលឃើញថាតែងតែឈ្លោះទាស់ទែងរហូតបែកបាក់គ្នា ដោយសារការប្រច័ណ្ឌខុសរឿង ការយល់ច្រឡំ រួចមិនស្ដាប់ហេតុផលដៃគូ។
៧. គោរពនិងស្មោះត្រង់ចំពោះគ្នា
ការគោរព និងស្មោះត្រង់គ្នា គឺជារឿងចាំបាច់មិនអាចខ្វះបានក្នុងទំនាក់ទំនងស្នេហា។ ការស្ដីបន្ទោស ប្រមាថមាក់ងាយ រវាងគ្នាត្រូវជៀសវាង ពិសេសដៃគូនិយាយ ឬសំណូមពរអ្វីមួយចង់ឲ្យយើងល្អ គួរធ្វើតាមឲ្យបាន។
៨. គោរពពេលវេលា
ពេលកំពុងលង់ស្រលាញ់គ្នា អ្នកទាំងពីរតែងតែចំណាយវេលាជួបមុខគ្នា ជជែកលេងជាមួយគ្នាដើម្បីស្វែងយល់ចិត្តបន្ថែម ដូច្នេះថ្ងៃណាត់ជួប អ្នកទាំងពីរត្រូវមកដល់ឲ្យទាន់ម៉ោងកំណត់ ជៀសវាងដៃគូអាក់អន់ស្រពន់ចិត្ត រហូតនាំឲ្យមានការស្ដីបន្ទោស។
៩. នាំដៃគូឲ្យគ្រួសារសងខាងបានស្គាល់
ដំណាក់កាលនាំមនុស្សជាទីស្រលាញ់ឲ្យប៉ាម៉ាក់សងខាងបានជួប បានឃើញ គឺជាដំណាក់កាលមានភាពចាស់ទុំជាងគេដែលធ្វើឲ្យអ្នកទាំងពីរកក់ក្ដៅក្នុងចិត្តថា ពួកគេត្រៀមក្លាយជាគ្រួសារតែមួយឆាប់ៗ៕
ចុចអាន៖