តារាជួរមុខថៃ ៥រូប ល្បីមានឫកធំ ពិបាកធ្វើការជាមួយ

2017-07-21 04:44:46
ចំនួនមតិ 0 | ចំនួនចែករំលែក 0

ជាតារាសម្ដែង អ្នកណាៗក៏ត្រូវការឲ្យខ្លួនឯងមានការតុបតែងខ្លួនបានស្អាតបំផុត មិនថា ពេលថតភាពយន្ត ឬចេញជួបអ្នកគាំទ្រ រហូតតារាល្បីមួយចំនួនត្រូវបានជាប់ឈ្មោះថាជាមនុស្សពិបាកធ្វើការជាមួយ ដោយសារពួកគេប្រកាន់ឫកធំ និងត្រូវការតាមចិត្តខ្លួនឯងខ្លាំងពេក។ ផ្អែកតាមបណ្ដាញសារព័ត៌មានថៃនានា គេបានចាត់ថ្នាក់តារាសម្ដែងល្បី៥ រូបដែលមានពាក្យចចាមអារ៉ាមច្រើនថាពិបាកធ្វើការជាមួយ៖

៥. Esther Supreeleela

តួឯកស្រីរឿង "កូនប្រសាបំណុល" ដែលល្បីមានទេពកោសល្យសម្ដែងបានល្អស្ទើរគ្រប់រសជាតិ ត្រូវបានប្រភពមួយចំនួននិយាយថា បន្ទាប់ពីមានកេរ្តិ៍ឈ្មោះល្បី ក៏ចាប់ផ្ដើមដំឡើងតម្លៃខ្លួនខ្ពស់ខ្លាំង ហើយកម្មវិធីខ្លះទៅនិយាយតែប៉ុន្មានម៉ាត់ តែទារថ្លៃដល់រាប់សែនបាត។

៤. Tor Thanapob

Tor តួឯកប្រុសល្បីពីរឿងភាគយុវវ័យ "Hormones” ធ្លាប់រងអាស្រូវជាមួយអ្នកដឹកនាំម្នាក់ ដោយមានការចោទប្រកាន់ថា តារាវ័យក្មេងរូបនេះប្រកែកមិនព្រមថតជាមួយតួឯកស្រី ដោយសារជាងធ្វើសក់ ធ្វើម៉ូដសក់មិនត្រូវចិត្ត។ ជុំវិញបញ្ហានេះ Tor បានចេញមុខបកស្រាយថា ខ្លួនពិតជាមិនពេញចិត្តម៉ូដសក់នៅថ្ងៃនោះមែន តែមិនបានបញ្ចេញអាកប្បកិរិយាអ្វីឲ្យពិបាកដល់ក្រុមការងារឡើយ។

៣. Mai Davika

ក្រោយទទួលតំណែងជាតួឯកស្រីទីមួយដែលមានភាពយន្តរកចំណូលដល់ពាន់លានបាត តាមរយៈភាពយន្ត "Pee Mak” តារាស្រីកូនកាត់ថៃ-បែលហ្សិក បានទទួលការងារជាច្រើនបន្តបន្ទាប់ តែចុងក្រោយនេះមានព័ត៌មានលេចឮថា ពេលទៅថតម៉ូដនាពេលថ្មីៗនេះ Mai បានទាមទារផ្លាស់ប្ដូរទីតាំងថតព្រោះខ្លួនមិនពេញចិត្តទីតាំងដែលក្រុមការងារជ្រើសរើស ហើយថែមទាំងផ្លាស់ប្ដូរសំលៀកបំពាក់ និងផ្លាស់ប្ដូរជាងថតថែមទៀត។ ទោះយ៉ាងណា Mai បានចេញមុខច្រានចោលទាំងស្រុងចំពោះព័ត៌មាននេះ។

២. James Jirayu

តារាប្រុសជួរមុខប្រចាំប៉ុស្តិ៍លេខ៣ បានជាប់ចំណាត់ថ្នាក់លេខពីរ ដោយមានពាក្យចចាមអារ៉ាមថាពេលទៅណាមកណា គឺតែងទាមទារឲ្យមានអង្គរក្សច្រើន មិនឲ្យចាញ់តារាលំដាប់ពិភពលោកឡើយ ហើយ តារារូបនេះធ្លាប់សុំប្ដូរយន្តហោះពីធម្មតា ទៅជាលំដាប់ VIP ពេលត្រូវជិះទៅសម្ដែងនៅកូរ៉េខាងត្បូង។ យ៉ាងណាមិញ តួឯកប្រុសរឿង "សុភាពបុរសភុតធិផាត់" បានចេញមកផ្ដល់បទសម្ភាសថាគ្រប់យ៉ាងគឺជាការរៀបចំរបស់ក្រុមការងារប៉ុណ្ណោះ សម្រាប់ខ្លួនគឺអាចជិះយន្តហោះណាក៏បាន។

១. Donut Manasnan

តារាសម្ដែងស្រីដែលមានបទពិសោធន៍សម្ដែងជាច្រើនរឿង បានរងព័ត៌មានអាស្រូវថាពិបាកធ្វើការជាមួយក្រោយពេលបានវិវត្តខ្លួនក្លាយជាអ្នកដឹកនាំរឿង ដោយនៅពេលដឹកនាំរឿង "Deun Pradab Dav” មានក្រុមការងារជាច្រើនបានលាឈប់ ដោយមូលហេតុត្រូវបានប្រភពនានាខ្សឹបខ្សៀវថាមានការមិនចុះសម្រុងជាមួយអ្នកដឹកនាំរូបនេះ។ ជុំវិញបញ្ហានេះ Donut ក៏បានទទួលស្គាល់ថាខ្លួនអាចនឹងពិបាកធ្វើការជាមួយពិតមែន ប៉ុន្តែគ្រប់យ៉ាងគឺដើម្បីខ្សែភាពយន្តផលិតចេញមកបានល្អប៉ុណ្ណោះ ៕