ម៉ូដែលអាយុ២៦ឆ្នាំ តែស្បែកជ្រួញដូចយាយចាស់ធ្លាប់បាក់ទឹកចិត្ត តែពេលនេះ...
- 2017-07-15 02:59:23
- ចំនួនមតិ 0 | ចំនួនចែករំលែក 0
ម៉ូដែលអាយុ២៦ឆ្នាំ តែស្បែកជ្រួញដូចយាយចាស់ធ្លាប់បាក់ទឹកចិត្ត តែពេលនេះ...
Sara Geurts បានបើកកកាយប្រាប់ពិភពលោកថា នាងបានទទួលរងជំងឺស្បែកដ៏កម្រមួយឈ្មោះថា Ehlers-Danlos ដែលជាជាលិកាខូចក្នុងខ្លួន ធ្វើឱ្យប៉ះពាល់ដល់ការផលិតខូឡាជិន (សរសៃទឹកប្រូតេអ៊ីន) សម្រាប់បំប៉នរាងកាយ តាំងពីអាយុ១០ឆ្នាំមកម្ល៉េះ។
ជំងឺដ៏កម្រមួយនេះបានធ្វើឱ្យស្បែករបស់នាងឡើងជ្រីវជ្រួញខ្លាំង និងមើលទៅចាស់ជាងអាយុពិតប្រាកដ ហើយមកដល់ពេលនេះ Geurts មានវ័យ២៦ឆ្នាំហើយ នាងបានតាំងចិត្តថា នឹងធ្វើឱ្យគ្រប់គ្នាផ្លាស់ប្ដូរការគិតលើបញ្ហាសម្រស់ ឈប់ឱ្យផ្ដោតតែលើភាពស្អាតឱ្យបាន។
«ពេលនៅរៀនវិទ្យាល័យ ខ្ញុំធ្លាប់ព្យាយាមបិទបាំងវា! ខ្ញុំខ្លាចគេសួរនាំរឿងស្បែកចម្លែករបស់ខ្ញុំ! គឺខ្ញុំមិនចង់និយាយពីវាតែម្ដង!» Geurts បានលើកឡើងដូច្នេះ ពេលផ្ដល់បទសម្ភាសន៍ជាមួយសារព័ត៌មានអង់គ្លេស The Sun។
ច្រើនឆ្នាំបន្ទាប់ពីព្យាយាមលាក់បាំងស្បែករបស់ខ្លួន Geurts បានចាប់ផ្ដើមផ្លាស់ប្ដូរការគិត ដោយហ៊ានបញ្ចេញភាពមិនប្រក្រតីរបស់នាងតាមរយៈការចូលធ្វើតារាម៉ូដែល ហើយនៅឆ្នាំ២០១៥ Geurts បានផ្ញើសាច់រឿងពិតរបស់នាងទៅក្នុងកម្មវិធី Love Your Linesលើបណ្ដាញសង្គម Tumblr ដែលជាការហ៊ានបង្ហាញស្នាមជ្រីវជ្រួញ ឬសង្វារ ឬស្លាកស្នាមផ្សេងៗលើស្បែករបស់នារី នាងទទួលបានការគាំទ្រ និងកោតសរសើរនឹកស្មានមិនដល់ ដោយវីដេអូរបស់នាងត្រូវបានគេចូលមើលជិត២លានដង។
«គ្រប់ស្នាមជ្រួញលើដងខ្លួនរបស់ខ្ញុំ គឺជាសម្រស់របស់ខ្ញុំ ហើយវាក៏ស្រស់ស្អាតតាមបែបរបស់វា! គ្មានអ្នកណាមានស្បែកបែបនេះដូចខ្ញុំឡើយ ហើយនេះជាសម្រស់ពិតរបស់ខ្ញុំតែម្ដង!» តាមរយៈពាក្យសម្ដីមួយនេះ Geurts មានន័យចង់លើកទឹកចិត្តឱ្យមនុស្សគ្រប់គ្នាចេះស្រលាញ់អ្វីដែលមានលើខ្លួនពួកគេ ជាជាងការព្យាយាមធ្វើអ្វី ឬកែប្រែតាមអ្នកដទៃ ហើយមិនចាំបាច់ទាល់តែស្រស់ស្អាតតាមស្ដង់ដារស្រីស្អាត ទើបគេហៅស្អាតនោះទេ។
Geurts បានបន្ថែមទៀតថា «ខ្ញុំដឹងថា បំណងប្រាថ្នាដែលចង់ក្លាយជាតារាម៉ូដែលរបស់ខ្ញុំ អាចខុសនឹងស្តង់ដារសង្គមដែលផ្ដោតតែលើភាពស្អាតឥតខ្ចោះតែមួយមុខ។ ប៉ុន្តែសម្រាប់ខ្ញុំ ការហ៊ានបង្ហាញអ្វីដែលខ្លួនមាន និងទំនុកចិត្តលើអ្វីដែលខ្លួនកំពុងធ្វើ ទោះបីវាមិនឥតខ្ចោះដូចគេ ទើបជាអ្វីដែលគួរកោតសរសើរ។»