ម្តាយឪពុកលែងលះគ្នា កូនៗជៀសមិនផុតពីការប៉ះទង្គិចផ្លូវចិត្ត ៦ យ៉ាងនេះ
- 2017-06-27 02:31:08
- ចំនួនមតិ 0 | ចំនួនចែករំលែក 0
ម្តាយឪពុកលែងលះគ្នា កូនៗជៀសមិនផុតពីការប៉ះទង្គិចផ្លូវចិត្ត ៦ យ៉ាងនេះ
ពេលដែលមានការបែកបាក់ក្នុងគ្រួសារ ម្តាយឪពុកត្រូវលែងលះគ្នា នោះកូនៗរបស់អ្នក ប្រាកដជាមានការប៉ះពាល់ផ្លូវចិត្តជាខ្លាំង។ ពួកគេអាចមានអារម្មណ៍យល់ច្រឡំ ខឹង ឆេវឆាវ និងថែមទាំងបន្ទោសខ្លួនឯងទៀត។ មានសញ្ញា ៦យ៉ាង ដែលកំពុងបញ្ជាក់ថា កូនៗរបស់អ្នកមានអារម្មណ៍អវិជ្ជមានពីការបែកគ្នារបស់អ្នក។
១. មានអារម្មណ៍ស្ត្រេស
កូនៗរបស់អ្នក ស្រលាញ់អ្នកខ្លាំងណាស់ ដូច្នេះពេលអ្នកបែកបាក់គ្នា ពួកគេនឹងយល់ថា បានបាត់បង់ឪពុកម្តាយ ដែលធ្វើឲ្យគេស្ត្រេសតែម្តង។ ដើម្បីជួយគេបាន អ្នកគួរតែព្យាយាមលួងលោម និងប្រាប់ហេតុផលដល់កូនៗ ឬ នាំគេទៅជួបអ្នកជំនាញ ដើម្បីព្យាបាលបញ្ហានេះ។
២. មានបញ្ហាផ្លូវចិត្ត
មិនមែនគ្រប់ក្មេងទាំងអស់ ដែលជួបវិបត្តិគ្រួសារ សុទ្ធតែវិវត្តិខ្លួនទៅរកបញ្ហាផ្លូវចិត្តនោះទេ។ ប៉ុន្តែមានក្មេងមួយចំនួន អាចមានបញ្ហានេះ តាមរយៈការបញ្ចេញសកម្មភាពមកខាងក្រៅ ដូចជាការមិនស្តាប់បង្គាប់ ឬ ភាពច្រងេងច្រងាង ឆាប់ច្រឡោតខឹងជាដើម។
**៣. ចងចាំការឈឺចាប់ និងការព្រួយបារម្ភ**
តាមការសិក្សាស្រាវជ្រាវពីសិស្សសកលវិទ្យាល័យ ៩៩នាក់ បានបង្ហាញថា មានសិស្សជាច្រើន នៅតែចងចាំភាពឈឺចាប់ ពីការលែងលះរបស់ឪពុកម្តាយ។
៤. គិតថាខ្លួនឯងមានកំហុស
យោងតាមទស្សនាវដ្តីនៃការលែងលះ បានបង្ហាញថា ជារឿងធម្មតាទៅហើយ ដែលក្មេងៗមានអារម្មណ៍ថា គេជាដើមចមបង្កឲ្យមានការលែងលះរវាងឪពុកម្តាយរបស់ពួកគេ។ ពួកគេថែមទាំងមានការបារម្ភពីរឿងដែលក្មេងៗមិនគួរខ្វល់ ដូចជាភ័យខ្លាចឪពុកម្តាយ ឈប់ស្រលាញ់ទៀតផង។
៥. ចេះបន្ទោសអ្នកដទៃ
ដោយសារក្មេងៗមិនទាន់អាចរៀនពីរបៀបគ្រប់គ្រងខ្លួនឯង ដូច្នេះគេក៏បន្ទោសឪពុក ឬម្តាយរបស់ខ្លួន ថាជាមូលហេតុដែលធ្វើឲ្យគ្រួសារគ្មានសុភមង្គល។
៦. សង្ឃឹមថាអ្នកនឹងត្រលប់មកត្រូវគ្នាវិញ
ទោះបីជាអ្នកដឹងថា ជីវិតអាពាហ៍ពិពាហ៍របស់អ្នកមិនចុះសម្រុងគ្នា ប៉ុន្តែកូនៗរបស់អ្នក នៅតែសង្ឃឹមថា អ្នកទាំងពីរនឹងត្រូវគ្នាឡើងវិញ។ ដូចនេះ អ្នកគួរតែប្រាប់ពីមូលហេតុនៃការលែងលះនោះ ដើម្បីឲ្យកូនៗយល់ច្បាស់ថា ឪពុកម្តាយគេមិនអាចនៅជាមួយគ្នាវិញបានទេ។
ការលែងលះគ្នា មិនមែនជារឿងងាយស្រួលនោះទេ ជាពិសេសគឺនៅពេលដែលអ្នកមានកូន។ អញ្ចឹងហើយ អ្នកគួរតែស្វែងយល់ពីអារម្មណ៍ និងការគិតរបស់ពួកគេ ដើម្បីឲ្យដឹងថាត្រូវជួយពួកគេយ៉ាងណា៕