កុំដោយសារស្រលាញ់មនុស្សម្នាក់ ហ៊ានលះបង់ទាំងអស់ឲ្យសោះ
- 2017-06-25 10:39:08
- ចំនួនមតិ 0 | ចំនួនចែករំលែក 0
កុំដោយសារស្រលាញ់មនុស្សម្នាក់ ហ៊ានលះបង់ទាំងអស់ឲ្យសោះ
ពាក្យប៉ុន្មានឃ្លាដូចជា៖ "គ្មានបង ខ្ញុំមិនអាចរស់បាននោះឡើយ" មិនគួរយកមកនិយាយដោយងាយស្រួលនោះឡើយ ព្រោះគ្មានអ្នកណាមិនអាចរស់ដោយខ្វះនរណាម្នាក់បានឡើយ។ សូម្បីតែសាច់ញាតិនៅក្នុងគ្រួសារ បើសិនជាមានថ្ងៃណាមួយលែងបាននៅជាមួយយើង ក៏យើងខំប្រឹងលេបទឹកភ្នែកចូលក្នុង បន្តដើរទៅមុខដែរ។ ចុះទម្រាំនេះគ្រាន់តែជាសង្សារ...
ខ្ញុំធ្លាប់អានអត្ថបទមួយដែលគេប្រាប់ថា ជាមធ្យម មនុស្សម្នាក់នឹងឈឺចាប់ដោយសារស្នេហា៧ដងមុនពេលស្វែងរកឃើញស្នេហាពិតរបស់ខ្លួន និងឈានដល់មង្គលការ។ ដូចនេះហើយ គ្មានអ្នកណាគួរយកការស្លាប់រស់មកនិយាយពេលបែកគ្នានោះឡើយ ព្រោះអ្នកគ្មានជីវិត៧ដើម្បីដោះដូរនឹងស្នេហាពិត១ឡើយ។
ថ្ងៃនេះ ពួកយើងគិតថាស្នេហាដែលយើងកំពុងមានបច្ចុប្បន្នគឺជាមនោសញ្ចេតនាដែលល្អបំផុត និងសន្យានឹងនៅក្បែរគ្នារហូតដល់ចាស់កោងខ្នង។ តែជីវិតប្រែប្រួល សូម្បីតែអ្នករៀបការហើយ ក៏ត្រូវលែងលះនឹងគ្នា។ មានអ្នកណាគេហ៊ាននិយាយថា ពេលពាក់ចិញ្ចៀនឲ្យគ្នា ពួកគេមិនបានស្បថស្បែថានឹងរួមរស់នឹងគ្នាអស់មួយជីវិតនោះ?
អ៊ីចឹងបានគេតែងថា អ្នកឆ្លាត ទោះបីជាស្រលាញ់ខ្លាំងយ៉ាងណាក៏ដោយ ក៏ទុកខ្លះសម្រាប់ខ្លួនឯងដែរ។ ទោះបីជាដឹងថា ពេលស្រលាញ់ត្រូវតែអស់ពីចិត្ត តែកុំច្រឡំរវាងការអស់ពីចិត្តក្នុងស្មារតី និងទិដ្ឋភាពជាក់ស្ដែងឲ្យសោះ។
រីឯអ្នកធ្វើទុក្ខបុកម្នេញខ្លួនឯងនៅពេលដៃគូដើរចេញនោះ គឺជាមនុស្សដែលផ្អែកទៅលើបុគ្គលម្នាក់ទៀតខ្លាំងពេក។ ពួកគេមានអារម្មណ៍ថារឿងអ្វីៗគ្រប់យ៉ាងទាល់តែមានការចូលរួមរបស់គេបានខ្លួនឯងធ្វើបាន ហើយពួកគេផ្ដល់សិទ្ធិឲ្យបុគ្គលម្នាក់ទៀតជាអ្នកសម្រេចសុភមង្គលរបស់ពួកគេ៕