រន្ធត់! ជំងឺតម្រងនោម សម្លាប់មនុស្សសាហាវដល់ថ្នាក់ហ្នឹង
- 2017-06-23 06:57:28
- ចំនួនមតិ 0 | ចំនួនចែករំលែក 0
រន្ធត់! ជំងឺតម្រងនោម សម្លាប់មនុស្សសាហាវដល់ថ្នាក់ហ្នឹង
ចាប់ពីឆ្នាំ១៩៩០ អត្រាមរណភាព ដោយសារជំងឺតម្រងនោមរ៉ាំរ៉ៃនៅកម្ពុជា កើនឡើងដល់ ៤៧,៨% (ក្នុងចំណោមមនុស្ស ១០០.០០០ នាក់) ដែលជាមធ្យមមានប្រមាណ ២,១% ក្នុងមួយឆ្នាំ។ មនុស្សភាគច្រើនមិនសូវខ្វល់ខ្វាយពីតម្រងនោមរបស់ពួកគេទេ បើធៀបនឹងការថែទាំចំពោះសរីរាង្គដទៃទៀត ដូចជា បេះដូង និងថ្លើម។
តម្រងនោមមានតួនាទីបញ្ចេញចោលនូវកាកសំណល់ និងទឹកដែលលើសក្នុងរាងកាយ ហើយតម្រងនោមក៏ជួយបង្កើតកោសិកាឈាមក្រហម ជួយឲ្យឆ្អឹងរឹងមាំ និងជួយរក្សាលំនឹងសារធាតុអំបិលក្នុងរាងកាយ ហើយថែមទាំជួយឲ្យមានលំនឹងសារធាតុចិញ្ចឹមផ្សេងៗទៀតនៅក្នុងរាងកាយ។
អ្នកជំងឺតម្រងនោម ប្រឈមនឹងហានិភ័យនៃការវិវត្តទៅជាជំងឺផ្សេងទៀត ដូចជា ជំងឺលើសឈាម ជំងឺសរសៃឈាមបេះដូង តម្រងនោមតពូជ ឬជំងឺទឹកនោមផ្អែម។ ដូច្នេះ អ្នកត្រូវថែរក្សាសុខភាពតម្រងនោម ទោះបីជាអ្នកមិនមានហានិភ័យនៃការវិវត្តជំងឺខាងលើក៏ដោយ។
ត្រូវធ្វើម៉េចទើបតម្រងនោមមានសុភាពល្អ?
១. ផឹកទឹកឱ្យបានគ្រប់គ្រាន់ជារៀងរាល់ថ្ងៃ។ គួរផឹកទឹកឱ្យបានច្រើនជាងអ្វីដែលត្រូវបានណែនាំ (៤ ទៅ ៦ កែវ) ដើម្បីរក្សាឲ្យតម្រងនោមមានសុខភាពល្អ ប៉ុន្តែវាគ្មានការសិក្សាស្រាវជ្រាវជាក់លាក់ណាមួយនោះទេ។
២. ហាត់ប្រាណទៀងទាត់ជួយកាត់បន្ថយហានិភ័យឡើងទម្ងន់ និងជំងឺលើសឈាម ដូច្នេះវាក៏ជួយកាត់បន្ថយហានិភ័យកើតជំងឺតម្រងនោមផងដែរ។ សូមចាំថា ការទទួលទានអាហារត្រឹមត្រូវ និងមានតុល្យភាព ជួយកាត់បន្ថយជំងឺទឹកនោមផ្អែម និងសម្ពាធឈាមឡើងខ្ពស់ផងដែរ។ វាអាចជួយរក្សាការពារតម្រងនោមឲ្យមានសុខភាពល្អ។
៣. ទទួលទានអាហារបំប៉ន និងឱសថបុរាណច្រើនហួស អាចបង្កគ្រោះថ្នាក់ដល់តម្រងនោម។ ជាមួយនឹងប្រភេទអាហារបំប៉នជាច្រើនដែលមានលើទីផ្សារបច្ចុប្បន្ន អ្នកត្រូវពិនិត្យជាមួយនឹងអ្នកផ្ដល់សេវាថែទាំសុខភាពរបស់អ្នកជាមុនសិន ដើម្បីបញ្ជាក់ថាអាហារបំប៉នដែលអ្នកប្រើ មានសុវត្ថិភាពសម្រាប់តម្រងនោម។
៤. សូមកុំជក់បារី! ការជក់បារីអាចបំផ្លាញសរសៃឈាម ហើយនៅពេលតម្រងនោមមិនមានលំហូរឈាមគ្រប់គ្រាន់ វាក៏មិនអាចដំណើរការបានត្រឹមត្រូវដែរ។ ក្រៅពីនេះ ហានិភ័យជំងឺលើសឈាមក៏ជាកត្តាដ៏ចម្បងមួយដែរបង្កទៅជាជំងឺតម្រងនោម។
៥. សូមធ្វើតេស្ដថាតើអ្នកមានការប្រឈមនឹងជំងឺតម្រងនោមដែរអត់? ពិនិត្យសម្ពាធឈាមរបស់អ្នកនិងធ្វើតេស្តឈាម (BUN និង creatinine)។ អ្នកក៏អាចពិនិត្យតេស្តទឹកនោមដើម្បីរកមើលគ្រាប់ឈាមក្រហម ការបង្ករោគក្នុងទឹកនោម ឬប្រូតេអ៊ីនក្នុងទឹកនោមរបស់អ្នកផងដែរ។
បើមានសំណួរពាក់ព័ន្ធនឹងអត្ថបទនេះ ឬការថែរក្សាសុខភាព អាចទាក់ទងតាម៖
ចំណាំ៖ រាល់ថ្ងៃសុក្រ Kanha នឹងចេញផ្សាយអត្ថបទសុខភាពពីអ្នកជំនាញផ្នែកសុខភាពរបស់ទស្សនាវដ្តី Healthwise Digest ពី DKSH៕