បើឧស្សាហ៍មានអារម្មណ៍ "ដូចមិនសូវស្រួលខ្លួន" ស្រីៗគួរធ្វើរឿងទាំងអស់នេះ

2017-06-13 04:53:58
ចំនួនមតិ 0 | ចំនួនចែករំលែក 0

ស្ត្រីគឺឧស្សាហ៍មានអាការៈមិនសូវស្រួលខ្លួនច្រើនជាង។ អាការៈមិនសូវស្រួលខ្លួននោះមានដូចជាឈឺក្បាល, វិលមុខ, កណ្ដាស់ ឬត្រជាក់ចុងដៃត្រជាក់ចុងជើងជាដើម។ ដូចនេះដើម្បីបញ្ឈប់អារម្មណ៍ "ដូចមិនសូវស្រួលខ្លួន"នេះ ស្រីៗគួរធ្វើរឿងដូចខាងក្រោម៖

១.ញ៉ាំទឹកក្ដៅឧណ្ណៗ

យើងគួរញ៉ាំទឹកក្ដៅឲ្យបានច្រើនតាមដែលអាចធ្វើទៅបាន ហើយបញ្ឈប់ការផឹកទឹក ឬភេសជ្ជៈដែលដាក់ទឹកកក ឬក្លាសេ។ បើមិនមានទឹកក្ដៅទេទឹកធម្មតាក៏បានដែរ យ៉ាងហោច ២ លីត្រ ឬ ៨ កែវក្នុងមួយថ្ងៃ។

២.ញ៉ាំសារជាតិវីតាមីន

នៅពេលដែលប្រព័ន្ធការពាររាងកាយយើងធ្លាក់ចុះ គឺបណ្ដាលមកពីបញ្ហាកង្វះជាតិវីតាមីនឲ្យបានគ្រប់គ្រាន់។ ដូចនេះគួរញ៉ាំបន្លែផ្លែឈើគ្រប់ប្រភេទឲ្យបានច្រើន។

៣.អាហារ

បើចង់បញ្ឈប់អារម្មណ៍ថាដូចជាចង់ផ្ដាសាយ យើងគួរញ៉ាំអាហារទាំងនេះដូចជា នំបុ័ង, ម្ហូបអាហារដែលមានខ្ញី និងផ្លែចេកជាដើម។ អាហារទាំងនេះជួយផ្ដល់លំនឹងក្នុងពោះ និងមានសារជាតិចិញ្ចឹមត្រឹមត្រូវដែលរាងកាយត្រូវការ។

៤.គេង

ម៉ោង ៩ គួរឆាប់ចូលគេងទើប គេងលក់បានស្កប់ស្កល់។ សូមប្រាកដថាយ៉ាងហោចណាស់ ការលង់លក់ក្នុងដំណេកនេះ ៨ ម៉ោងពេលយប់ តែបើនៅមានអាការៈមិនស្រួលទៀតគួរឆ្លៀតគេងពេលថ្ងៃបន្ថែម។

៥.តែក្ដៅ

ជាធម្មតាពេលឈឺយើងមានអារម្មណ៍ថាត្រជាក់ វិធីមួយដែលអាចបន្ធូរបន្ថយគឺការញ៉ាំទឹកតែក្ដៅ។ ព្រោះក្នុងទឹកតែមានសារធាតុប្រឆាំងអុកស៊ីតកម្ម ជាពិសេសគឺតែបៃតងតែម្ដង។

៦.ទឹកអំបិល

ប្រសិនបើឈឺកយើងគួរដាំទឹកឲ្យពុះ បន្ទាប់មកបង់អំបិលចូល ដោយទុកឲ្យត្រជាក់ល្មម រួចយកទឹកអំបិលនោះមកខ្ពុរមាត់។ ទឹកអំបិលអាចសម្លាប់បាក់តេរីដែលបង្កគ្រោះថ្នាក់ដល់សុខភាព ជាពិសេសល្អសម្រាប់សុខភាពមាត់ធ្មេញ។

៧. ឆ្ពុងមុខ

ការឆ្ពុងនេះមិនចាំបាច់រកឧបករណ៍អ្វីឡើយ មានត្រឹមឆ្នាំង និងភួងមួយគឺបានហើយ។ ដោយជំហានដំបូងដាំទឹកឲ្យពុះ ហើយយើងយកទឹកដែលពុះនោះបិទគ្របឲ្យជិត បន្ទាប់មកឃ្លុំភួងឲ្យជិត និងបង្ហើបគម្របឆ្នាំងបន្តិចដើម្បីឲ្យផ្សែងចេញមកប៉ះផ្ទៃមុខ។ ធ្វើបែបនេះអាចជួយសម្រួលដល់ការដកដង្ហើមបានយ៉ាងស្រួល៕

ប្រភព៖ herinterest ប្រែសម្រួល៖ ទ្រី រ៉ាវី