ចរិយាសម្បត្តិប្រពន្ធ ៥ យ៉ាងដែលធ្វើឲ្យស្វាមីមិនដាច់ចិត្តមានស្រីថ្មី

2017-05-31 04:23:39
ចំនួនមតិ 0 | ចំនួនចែករំលែក 0

ថ្ងៃនេះ កញ្ញា សូមបង្ហាញជូនមតិបុរសៗដែលគាត់មានភរិយាជាស្ត្រីគ្រប់លក្ខណ៍ បើទោះជាភរិយាអ្នកខ្លះមិនសូវស្អាត ក៏ពួកគាត់មិនដែលគិតមានស្រីថ្មីឡើយ។ អានពីការលើកឡើងពីចរិយាសម្បត្តិរបស់ភរិយាទាំង ៥ យ៉ាងខាងក្រោមនេះ៖

លន់ វិជ្ជា៖ «ខ្ញុំពិតជាមានសំណាងណាស់ដែលមានភរិយាមានលក្ខណៈសម្បត្តិសព្វគ្រប់បែបនេះទាំងរូបរាង និងអត្តចរិត។ គាត់គឺជានារីដែលមានភាពអត់ធ្មត់ខ្លាំង,ចេះយល់សាច់ការរាក់ជ្រៅ,មិនបំបាក់មុខប្ដីក្នុងចំណោមមនុស្ស ជាពិសេសគាត់មានសមត្ថភាព កែប្រែបញ្ហាធំមកតូច បញ្ហាតូចមកជាគ្មានបញ្ហា។ និយាយចំគាត់មិនចេះនាំភ្លើងក្រៅមកក្នុងផ្ទះ ហើយក៏មិនចេះនាំភ្លើងក្នុងផ្ទះទៅខាងក្រៅដែរ។ ព្រោះតែចរិយាផូរផង់បែបនេះហើយ ទើបខ្ញុំគ្មានពេលទៅមើលស្រីផ្សេង»។

ទៀង សុភក្រ្តា៖ «បើនិយាយពីរូបសម្រស់ភរិយាខ្ញុំ នរណាក៏ថាគាត់អត់ស្អាតដែរ តែអ្វីដែលអាចចង់ចិត្តខ្ញុំមិនឲ្យរវល់នឹងស្រីផ្សេងបាន គឺគាត់មិនត្រឹមតែស្រលាញ់ខ្ញុំខ្លាំងនោះទេ បងប្អូនញាតិជិតឆ្ងាយខ្ញុំទាំងអស់ ក៏គាត់ស្រលាញ់រាប់អានដូចសាច់បង្កើតដែរ។ បើនិយាយពីការយកចិត្តម៉ាក់ប៉ាខ្ញុំវិញ គឺកូនបង្កើតសុំខ្មាសតែម្ដង ឲ្យតែទៅលេងស្រុកម្ដងៗប្រមែប្រមូលខោអាវពួកគាត់បោកគក់ខ្ទេច ហើយរៀបចំផ្ទះសម្ដែងឡើងស្អាតគ្មានទាស់។ ចំណែកម្ហូបអាហារវិញដឹងតែពេញលើតុហ្មង»។

សុំ មករា៖ «សុំអួតពីប្រពន្ធតិចចុះ ប្រពន្ធខ្ញុំមានអាកប្បកិរិយាល្អឥតខ្ចោះតែម្ដង។ បានជាខ្ញុំហ៊ាននិយាយបែបនេះ ព្រោះគាត់មានសមត្ថភាពអាចធ្វើការងារខាងក្រៅបានប្រាក់ខែខ្ពស់ហើយ ពេលទៅដល់ផ្ទះគាត់អាចរៀបចំផ្ទះបានស្អាតបាត,ពូកែធ្វើម្ហូប,មើលថែទាំប្ដី និងកូនបានល្អ ដោយមិនចាំបាច់មានឈ្នួលជួយសម្រាលកិច្ចការឡើយ បើទោះជាខ្ញុំចង់ឲ្យមានអ្នកមកនៅជាមួយក៏ដើម»។

រស់ សុផានិត៖ «ទោះប្រពន្ធស្អាតប៉ុណ្ណាក៏ដោយ តែបើគ្មានភាពស្មោះត្រង់នឹងគ្នា មនុស្សប្រុសនឹងស្វែងរកអ្នកដែលគេស្មោះត្រង់ជាមួយវិញ។ តាំងពីរៀបការជាមួយម្ដាយកូនប្រុសទាំង ៣ នាក់របស់ខ្ញុំរួចមក គាត់តែងតែមានភាពស្មោះត្រង់ មិនដែលសូម្បីតែគិតថាចង់ក្បត់ខ្ញុំ។ បានជាខ្ញុំដឹងថាគាត់មិនដែលគិតថាក្បត់ ព្រោះពេលពួកខ្ញុំរៀបការថ្មីថ្មោង ពួកខ្ញុំក្រណាស់ ហើយមានប្រុសៗកូនអ្នកមានជាច្រើនតាមញ៉ែងញ៉ង និងអ្នកខ្លះហ៊ានសន្យាថាទិញឡាន,ទិញផ្ទះឲ្យទៀត។ តែគាត់បែរជាបដិសេធ និងចាប់ដៃគ្នារកស៊ីសន្សំពី ១០០៛ ជាមួយខ្ញុំ រហូតដល់ពេលនេះជីវភាពពួកខ្ញុំអាចធូរធារគួរសម»។

សៀន ដាឡាត់៖ «មនុស្សស្រីទោះស្អាតមិនស្អាត ឲ្យតែស្លូតបូត, ចេះក្និកក្នក់,គួរឲ្យស្រលាញ់, ពូកែយល់ចិត្តប្ដី ថាចូលចិត្តពណ៌អ្វី,ចូលចិត្តញ៉ាំម្ហូបបែបណា ឬដឹងពីសុខទុក្ខនោះ ប្ដីស្រលាញ់ងប់ហើយ។ ម្យ៉ាងទៀតគាត់ពូកែអត់ធ្មត់ខ្លាំងណាស់ មិនដែលមានសម្ដីតូច ធំ ដាក់ខ្ញុំទេ ហើយបើនិយាយពីរូបរាងវិញ គ្រួសារខ្ញុំគាត់មិនសូវជាស្អាតអីទេ តែគាត់ពូកែរឿងទាំងនោះ ចឹងហើយបានជាខ្ញុំស្រលាញ់គាត់ខ្លាំង គ្មានពេលណាទៅមើលស្រីផ្សេងនោះ»៕

នេះគ្រានតែទស្សនៈបុរស ៥ នាក់ផ្សេងគ្នាប៉ុណ្ណោះ!

អត្ថបទ៖ ទ្រី រ៉ាវី