ស្រក់ទឹកភ្នែកពេលដឹងរឿងរ៉ាវលោកយាយទិញសំបុត្ររថភ្លើងពីរសន្លឹក តែអង្គុយតែម្នាក់ឯង
- 2017-05-06 08:56:58
- ចំនួនមតិ 0 | ចំនួនចែករំលែក 0
ស្រក់ទឹកភ្នែកពេលដឹងរឿងរ៉ាវលោកយាយទិញសំបុត្ររថភ្លើងពីរសន្លឹក តែអង្គុយតែម្នាក់ឯង
លោកយាយជនជាតិតៃវ៉ាន់វ័យ ៨០ឆ្នាំម្នាក់ និងស្វាមីរបស់គាត់មានបំណងប្រាថ្នាចង់ជិះរថភ្លើងល្បឿនលឿនដើរកម្សាន្តពីទីក្រុងចាងហួ ទៅទីក្រុងកៅស៊ុង។ ចៅស្រីរបស់លោកយាយបានថតវីដេអូរៀបរាប់ពីសេចក្ដីស្នេហារបស់លោកយាយ ប៉ុន្តែនឹកស្មានមិនដល់ថានៅពេលវីដេអូឃ្លីបមួយនេះត្រូវបានបង្ហោះ ក៏ទទួលបានការចាប់អារម្មណ៍ពីបណ្ដាអ្នកលេងអ៊ីនធឺណិតយ៉ាងច្រើន ថែមទាំងធ្វើឲ្យមនុស្សជាច្រើនទប់ទឹកភ្នែកមិនបាន។
ពេលដែលលោកយាយទិញសំបុត្ររថភ្លើង គាត់ក៏មិនភ្លេចទិញទុកសម្រាប់ស្វាមីរបស់គាត់ ដោយប្រាប់ទៅអ្នកលក់សំបុត្រថា "ឲ្យសំបុត្រយាយពីរសន្លឹកមក យកអាកៅអីជាប់គ្នា យាយនាំប្ដីយាយមកជិះរថភ្លើងដែរ"។ ពេលចូលដល់កន្លែងអង្គុយ គាត់ក៏អង្គុយចុះព្រមទាំងបើកកាបូប ទាញរូបថតចេញមកដាក់លើកៅអីក្បែរខ្លួន។ ពេលសម្លឹងមើលជិតៗគេក៏អាចដឹងថា នោះគឺរូបថតប្ដីរបស់លោកយាយនោះឯង។ ស្វាមីរបស់លោកយាយបានស្លាប់មុនពេលដែលអ្នកទាំងពីរអាចធ្វើតាមក្ដីស្រមៃ។ ក្រៅពីនេះ នៅតាមផ្លូវ លោកយាយក៏បានរៀបរាប់ប្រាប់ប្ដីរបស់លោកយាយរហូតថា ពួកគាត់ធ្វើដំណើរមកដល់កន្លែងណាហើយ។
ក្នុងវីដេអូឃ្លីបនោះ ចៅស្រីរបស់លោកយាយបានឲ្យដឹងថា ដោយសារឪពុកម្ដាយនាងត្រូវទៅធ្វើការ ដូច្នេះពួកគាត់ក៏មិនសូវបាននៅផ្ទះ។ នាងបានធំឡើងដោយរស់នៅជាមួយលោកយាយ និងលោកតា។ កាលពីឆ្នាំមុនលោកតាបានលាចាកលោកដោយសារជំងឺមហារីក។ យាយរបស់នាងខូចចិត្តជាខ្លាំង និងតែងទៅអង្គុយនៅតុធ្វើការរបស់លោកតាជាប្រចាំ។ ពេលខ្លះគាត់ក៏លួចយំ ពេលនឹកដល់លោកតា។ ថ្ងៃមួយគាត់និយាយថា "យាយចង់រកពេលមួយថ្ងៃ ទិញសំបុត្ររថភ្លើងពីរសន្លឹក ហើយនាំតាឯងជិះរថភ្លើងដើរលេង"។ កាលស្ថានីយរថភ្លើងល្បឿនលឿន មិនទាន់កសាងរួចរាល់ លោកតាធ្លាប់និយាយថា "ចាំគេធ្វើហើយយើងទៅដើរលេងជាមួយគ្នា ហើយនាំកូនចៅទៅជាមួយផង"។
ដូច្នេះហើយទើបលោកយាយចង់ធ្វើតាមក្ដីសុបិនរបស់លោកតា។ បន្ទាប់ពីវីដេអូនេះត្រូវបានចែកចាយលើបណ្ដាញសង្គមផ្សេងៗ ក៏មានមនុស្សជាច្រើនចូលទស្សនានិងបង្ហាញអារម្មណ៍ក្ដុកក្ដួលរបស់ខ្លួនចំពោះលោកយាយ។ ទស្សនាវីដេអូខាងក្រោមនេះ៖
នេះជាក្ដីស្រឡាញ់យ៉ាងជ្រាលជ្រៅ ហើយក៏ជាការដាស់តឿនដល់មនុស្សគ្រប់គ្នាថា សូមកុំរង់ចាំដល់មានអ្វីគ្រប់យ៉ាង ទើបចំណាយពេលស្វែងរកសេចក្ដីសុខ ត្រូវប្រញាប់ធ្វើទាន់មានឱកាស ដូច្នេះទើបមិនស្ដាយក្រោយនៅពេលគ្រប់យ៉ាងក្លាយជាយឺតពេល ៕
ប្រភព៖ liekr