ដឹងអត់ ជំងឺហឺតបណ្តាលពីអ្វី? អាចព្យាបាលជាដាច់ទេ?
- 2017-05-05 06:56:29
- ចំនួនមតិ 0 | ចំនួនចែករំលែក 0
ដឹងអត់ ជំងឺហឺតបណ្តាលពីអ្វី? អាចព្យាបាលជាដាច់ទេ?
ជំងឺហឺតគឺជាជំងឺផ្លូវដង្ហើម កើតលើសួត ធ្វើឲ្យលំហូរនៃខ្យល់ទៅកាន់ផ្លូវដកដង្ហើមរួមតូច ស្ទះ និងរលាក។ ជំងឺនេះស្តែងឲ្យឃើញតាមរយៈការពិបាកដកដង្ហើម ដកដង្ហើមដង្ហក់ខ្លីៗ ណែនទ្រូង។ ជាអកុសល ជំងឺហឺតមិនអាចព្យាបាលឲ្យជាសះស្បើយបានទេ ប៉ុន្តែគេអាចការពារ និងគ្រប់គ្រងវាបាន។
ចំពោះមូលហេតុដែលបណ្តាលឲ្យកើតមានជំងឺហឺត គឺកត្តាបរិស្ថាន ដូចជាការរស់នៅក្នុងកន្លែងដែលសម្បូរទៅដោយធូលី មេរោគផ្សិត បាត់តេរី រោមសត្វ ផ្សែងបារី ផ្សែងយានយន្ត។ ក្នុងករណីខ្លះទៀតជំងឺហឺតជាជំងឺតពូជ ឬក៏អាចមកពីបញ្ហាស្រ្តេស និងជំងឺបាក់ទឹកចិត្តជាដើម។ អការ និងរោគសញ្ញា៖
ហត់
ពិបាកដកដង្ហើម
តឹងក្នុងទ្រូង
ក្អកខ្លាំង
អ្នកនឹងអាចទទួលរងពីការវាយប្រហារដោយជំងឺហឺត បើសិនជាទងសួតរបស់អ្នកត្បៀត។ ក្នុងករណីអ្នកសង្កេតឃើញមានការប្រែប្រួលខុសធម្មតា ដូចជាជីពចរដើរញាប់ រន្ធច្រមុះឡើងធំ ត្រូវប្រញាប់ស្វែងរកការព្យាបាលជាបន្ទាន់។
ការព្យាបាល៖
ប្រាកដណាស់ជំងឺហឺតមិនអាចព្យាបាលជាដាច់នោះទេ ការគ្រប់គ្រងជំងឺហឺតត្រូវបានផ្តោតលើការការពារ ឬបញ្ឈប់ការរលាក និងបន្ធូរបន្ថយសាច់ដុំលើផ្លូវដង្ហើម។
ប្រើថ្នាំឲ្យបានទៀងទាត់ មានប្រភេទថ្នាំ «បំបាត់អាការឆាប់រហ័ស» និង «គ្រប់គ្រងស្ថានភាព» (ថ្នាំប្រឆាំងការរលាកដូចជាក្រុម Corticosteroids)
ប្រើប្រាស់ឧបករណ៍វាស់លំហូរខ្យល់ចេញពីសួត
ប្រើថ្នាំហិតបើកទងសួត ដូចជា Albuterol Metaproterenol និង Pirbuterol សម្រាប់សម្រួលសាច់ដុំនៅជុំវិញផ្លូវដង្ហើមដើម្បីកែលម្អចរន្តខ្យល់។
ប្រើម៉ាស៊ីនឆ្ពង់ ដើម្បីជួយកាត់បន្ថយចំនួននៃការវាយប្រហាររបស់ជំងឺហឺត
ព្យាបាលតាមវិធីភ្ញោចប្រព័ន្ធការពាររាងកាយ ដោយចាក់ថ្នាំដើម្បីបង្កើនធាតុបង្កអាលែ្លកហ្សីដល់ប្រព័ន្ធរាងកាយឲ្យស្គាល់ និងបន្ថយសកម្មភាពនៅពេលក្រោយ។
ដោយយោងតាមអង្គការសុខភាពពិភពលោក (WHO) មានប្រជាជនប្រហែល 300 លាននាក់នៅទូទាំងពិភពលោកបានទទួលរងពីជំងឺហឺត និងមានអ្នកស្លាប់ដោយសារជំងឺនេះចំនួន250.000 ក្នុងមួយឆ្នាំ។ ដូចគ្នានេះដែរ វាគឺជារឿងទុក្ខសោកមួយដោយដឹងថាចំនួននៃអ្នកដែលមានជំងឺហឺតនឹងអាចកើនឡើងច្រើនជាង 100 លាននាក់នៅឆ្នាំ 2025៕