ចង់ដឹងអត់ ហេតុអ្វីបានជាទឹកដោះដំបូងរាងខាប់ហើយមានពណ៌លឿងថ្លា?

2017-05-03 09:39:24
ចំនួនមតិ 0 | ចំនួនចែករំលែក 0

យើងប្រាកដជាធ្លាប់ឮថាទឹកដោះដំបូងមានប្រយោជន៍ច្រើនហើយសំខាន់បំផុតសម្រាប់ការលូតលាស់របស់ទារកព្រោះវាមានផ្ទុកសារធាតុសំខាន់ៗច្រើន។ ប៉ុន្តែ តើអ្នកមានដឹងទេថាទឹកដោះដំបូងមានសភាពខាប់នឹងមានពណ៌លឿងថ្លាខុសពីទឹកដោះធម្មតា ហេតុអ្វីបានជាដូច្នេះ?

«ចា៎! ទឹកដោះដំបូងមានលក្ខណៈបែបនេះគឺដោយសារតែនៅក្នុងនោះសម្បូរទៅដោយសារធាតុចិញ្ចឹម ជាពិសេសគឺមានអង្គបដិបក្ខប្រាណច្រើន ហើយអ្វីដែលសម្បូរខ្លាំងជាងគេគឺជីជាតិ A ដែលអាចជួយបង្កើតនូវអង់ទីគ័រការពារកុមារប្រឆាំងជំងឺផ្សេងៗ។ វាថែមទាំងជួយបញ្ចេញលាមកព្រៃបានលឿន កាត់បន្ថយជំងឺខាន់លឿង និងជួយភ្នែកទៀងផង។» នេះជាការលើកឡើងរបស់លោកស្រីវេជ្ជបណ្ឌិត ប្រាក់ សោភ័ណនារី នាយករងមជ្ឈមណ្ឌលជាតិគាំពារមាតា និងទារក និងជាប្រធានកម្មវិធីជាតិអាហារូបត្ថម្ភ ក្នុងវេទិកាពិភាក្សាស្ដីពី «ការលើកកម្ពស់ការចិញ្ចឹមទារក និងកុមារ» ដែលបានធ្វើឡើងនៅព្រឹកថ្ងៃទី ៣ ឧសភា ឆ្នាំ២០១៧។

លោកស្រីវេជ្ជបណ្ឌិត ប្រាក់ សោភ័ណនារី

លោកស្រីវេជ្ជបណ្ឌិតបានបន្ថែមថា ទឹកដោះដំបូងរាងខាប់ហើយបរិមាណតិចតួចបំផុតនិងចេញតែក្នុងរយៈពេលពីរទៅបីថ្ងៃដំបូងបន្ទាប់ពីទារកកើនប៉ុណ្ណោះ។ មានម្ដាយទើបសម្រាលមួយចំនួនយល់ច្រឡំថាខ្លួនមិនមានទឹកដោះព្រោះសុដន់មានសភាពធម្មតា ប៉ុន្តែតាមពិតគឺមានទឹកដោះដំបូងក្នុងនោះ។ កាលណាកូនចាប់ផ្ដើមជញ្ជក់ ទឹកដោះក៏ចាប់ផ្ដើមផលិតជាបន្តបន្ទាប់មកដែរ៕