«បងភ្ជាប់ពាក្យហើយ» ជាពាក្យមួយឃ្លាដែលបានទម្លុះបេះដូងស្រីម្នាក់ទាំងគ្មានរឿងអីសោះ

2017-04-20 10:47:18
ចំនួនមតិ 0 | ចំនួនចែករំលែក 0

ជាងមួយឆ្នាំដែលពួកយើងទាក់ទងគ្នា ហើយក៏មិនដែលមានរឿងអ្វីនឹងគ្នាដែរ ប៉ុន្តែហេតុអីក៏សុខៗមានរឿងនេះកើតឡើង?

[….] ខ្ញុំចាំថាពួកយើងយើងស្គាល់គ្នាតាម Facebook ហើយក៏រាប់អានគ្នា និង chat ជាមួយគ្នាជាង២ខែ។ អារម្មណ៍ស្រឡាញ់ក៏ចាប់ផ្ដើមមានទៅវិញទៅមក ប៉ុន្តែដោយសារតែពួកយើងនៅឆ្ងាយពីគ្នាពេកទើបខ្ញុំចេះតែគិតច្រើន ព្រោះគាត់នៅក្រចេះហើយខ្ញុំនៅកំពង់ចាម។ ម្យ៉ាងទៀតរឿងដែលខ្ញុំភ័យខ្លាចជាងគេគឺ រឿងដែលខ្ញុំធ្លាប់រៀបការហើយ ថែមទាំងមានកូនម្នាក់ទៀតផង។ ខ្ញុំខ្លាចគាត់ស្អប់ខ្ពើមខ្ញុំ ប្រកាន់នឹងខ្ញុំ ព្រោះគាត់មិនដែលពាក់ព័ន្ធនឹងរឿងនេះដូចខ្ញុំឡើយ។ ដោយហេតុតែមនុស្សពីរនាក់មានអារម្មណ៍តែមួយ ខ្ញុំក៏មិនចង់លាក់បាំងរឿងជាមួយគាត់ទៀត ខ្ញុំក៏បាននិយាយពីអតីតកាលទាំងអស់របស់ខ្ញុំទៅគាត់ ទោះបីជាគាត់ស្អប់ខ្ពើម ឬយ៉ាងណាក៏ដោយ។

ជារឿងមួយដែលរីករាយបំផុតក្នុងជីវិតខ្ញុំម្ដងទៀត គឺគាត់ថែមទាំងមិនប្រកាន់ខ្ញុំ ថែមទាំងអាណិតស្រឡាញ់ខ្ញុំទ្វេដង។ គាត់ថាអ្នកណាក៏មានអតីតកាលដែរ ហើយគាត់ប្រាប់ខ្ញុំថាគាត់ពិតជាចង់ថែទាំខ្ញុំណាស់មិនចង់ឲ្យខ្ញុំលំបាកម្នាក់ឯងទៀតនោះទេ ហើយថែមទាំងសួរខ្ញុំថា៖

«អូនឯងព្រមរស់នៅជាមួយបងអត់?» គ្រាន់តែឮសំណួរនេះបេះដូងលោតសឹងមិនទាន់ ទឹកភ្នែកចង់ស្រក់ព្រោះមិននឹកស្មានថាគាត់អាចទទួលយកខ្ញុំ និងអតីតកាលខ្ញុំបាននោះទេ។

«ព្រម!» ជាពាក្យដែលខ្ញុំឆ្លើយចេញពីមាត់ និង បេះដូង ហើយបូករួមទាំងស្នាមញញឹមចំពោះក្ដីសង្ឃឹមមួយនេះ។

[…] ពីមួយថ្ងៃទៅមួយថ្ងៃ ការស្រឡាញ់របស់យើងទាំងពីល្អទៅល្អទៅ ទោះបីជាមិនសូវបានជួបគ្នាក៏ដោយ ក៏ខ្ញុំជឿទុកចិត្តគាត់ និងស្រឡាញ់គាត់មិនដែលថយ។ តាំងពីពួកយើងស្រឡាញ់គ្នាមកគឺមិនមែនឈ្លោះគ្នា ឬមានរឿងអីដែលមិនចុះសម្រុងគ្នាឡើយ ហើយទង្វើគាត់គឺតែងតែបង្ហាញមកឲ្យខ្ញុំជឿជាក់ថាគាត់ពិតជាស្រឡាញ់ខ្ញុំមែន ទោះបីជាគាត់គាត់មិនដែលផ្ដល់អ្វីក៏ដោយ ប៉ុន្តែទង្វើ និង ពាក្យសម្ដីរបស់គាត់គឺធ្វើឲ្យខ្ញុំមានភាពកក់ក្ដៅ និងរីករាយជាមួយជីវិតឡើងវិញ។

[…] រយៈពេលជាងមួយឆ្នាំពិតជាដើរលឿនមែន ទោះបីជាលំបាកជួបគ្នា នឹកគ្នាប៉ុណ្ណាក៏ខ្ញុំមិនត្អូញត្អែរ សំខាន់ឲ្យតែការស្រឡាញ់មួយនេះស្ថិតស្ថេរ និង មាននៅក្នុងចិត្តគាត់រហូត។

ខែ មេសា ដែលជារដូវកាលបុណ្យចូលឆ្នាំប្រពៃណីខ្មែរ ក៏ឈានមកដល់ តែមួយរយៈនេះគាត់មិនសូវជាបានទាក់ទងមកខ្ញុំដូចមុនទេ ហើយពេលដែលខ្ញុំទូរស័ព្ទទៅគាត់ក៏គាត់មិនទទួលដែរ។ ខ្ញុំមិនដឹងថាមានរឿងអីនោះទេព្រោះពួកយើងគ្មានរឿងអីជាមួយគ្នានោះទេ ប្រហែលជាគាត់អាចរវល់ជាមួយគ្រួសារព្រោះ ១ ឆ្នាំមានតែប៉ុន្មានថ្ងៃប៉ុណ្ណោះដែលជួបជុំគ្រួសារ ដូច្នេះហើយខ្ញុំក៏មិនបានគិតអីច្រើនទៀតដែរ។

កន្លងបានប៉ុន្មានថ្ងៃមក ចូលឆ្នាំក៏បានចប់ដែរតែគាត់នៅតែមិនបានទាក់ទងមកខ្ញុំដដែល ខ្ញុំពិតជាមិនដឹងថាមានរឿងអីមែន ទឹកភ្នែកក៏ចាប់ផ្ដើមស្រក់ ក្នុងដៃកាន់ទូរស័ព្ទជាប់ព្រោះរង់ចាំគាត់ទាក់ទងមកខ្ញុំ។

«ទីង!» ជាសំឡេង chat ដែលបានលោតចូលក្នុងទូរស័ព្ទខ្ញុំ។

ឃើញឈ្មោះគាត់ ខ្ញុំអរសឹងតែចង់បាក់ក ព្រោះនឹកខ្លាំងណាស់ បារម្ភខ្លាំងណាស់។ ដៃចាប់ផ្ដើមបើកសារដែលគាត់ chat មកខ្ញុំទាំងញញឹមមិនឈប់។

« អូន! »

«ខែក្រោយបងភ្ជាប់ពាក្យហើយ អូនអាចមកចូលរួមបានអត់?» គ្រាន់តែឃើញភ្លាមបេះដូងខ្ញុំសឹងតែធ្លាក់ចុះដល់ដី អួលដើមក មិនដឹងត្រូវនិយាយបែបណា ក្នុងចិត្តដូចគេយកកាំបិតមកបុកទ្រូងអីចឹង។ ទឹកភ្នែកហូរស្ទើរតែខ្វាក់ភ្នែកទៅហើយ ខ្ញុំមិនដឹងថាហេតុអីបានជាគាត់ធ្វើបែបនេះដាក់ខ្ញុំទេ? ខ្ញុំខុសអីមែនទេ? បើគង់តែបែបនេះ ហេតុអីក៏ចាប់ផ្ដើម? ចុះពាក្យដែលថាចង់រស់នៅជាមួយខ្ញុំ មើលថែខ្ញុំទៅណាអស់ហើយ? ដឹងអត់ថាវាឈឺចាប់ខ្លាំង? អ្នកបានបំផ្លាញជីវិតខ្ញុំម្ដងទៀតហើយ ហេតុអី? ហេតុអី?

[…] តាំងពីថ្ងៃនោះមកខ្ញុំមិនបាននិយាយ ឬសួរនាំអ្វីទៀតឡើយ ព្រោះទោះបីជាខ្ញុំខំនិយាយ ខំឃាត់យ៉ាងណាក៏គ្មានន័យដែរ មនុស្សដែលចង់ទៅហើយទោះខំព្យាយាមឃាត់គេ ក៏គេនៅតែទៅ។ គ្រប់ពេលឲ្យតែខ្ញុំនឹកគេខ្ញុំតែងមើល chat ចាស់ៗដែលពួកយើងលេងជាមួយគ្នាពីមុន មើលរួចទឹកភ្នែកក៏ហូរ ចិត្តក៏ឈឺ ប៉ុន្តែមានតែវាទេដែលជាការចងចាំដ៏ល្អបំផុតសម្រាប់ខ្ញុំ។ ខ្ញុំពិតជាចង់ចាកចេញពីស្រមោលដ៏ខ្មៅងងឹតនេះណាស់ តែវានៅតែលងបន្លាចខ្ញុំគ្រប់ពេល។

សង្ឃឹមថាគេនឹងមានសេចក្ដីជាអ្នកថ្មីដែលគេនឹងរៀបការ ខ្ញុំគ្មានអ្វីនោះទេគឺមានតែការជូនពរនេះ គឺជាការជូនពរពីចម្ងាយដល់មនុស្សដែលគេធ្លាប់ប្រាប់ថាស្រឡាញ់ខ្ញុំ និងចង់រស់នៅជាមួយខ្ញុំ៕

ផ្ដល់សាច់រឿងដោយ៖ បងស្រី កញ្ញា ខេត្តកំពង់ចាម

អត្ថបទ៖ ផេង ផលធិតា