ស្នេហា៦បែបដែលមានឥទ្ធិពលបំផុតលើស្ត្រីគ្រប់រូប

2017-03-22 03:39:15
ចំនួនមតិ 0 | ចំនួនចែករំលែក 0

ស្ត្រីគ្រប់រូបអាចមានការគិត ឬការសម្រេចចិត្តខុសគ្នាពីម្នាក់ទៅម្នាក់ តែចំពោះទំនាក់ទំនង៦ប្រភេទខាងក្រោមនេះវិញ ស្ទើរតែគ្រប់គ្នាទៅហើយដែលជួបប្រទះក្នុងជីវិត។ សាកពិនិត្យបន្តិចមើលថាតើអ្នកកំពុងស្ថិតនៅមួយណា?

១. ស្នេហាទាំងសងខាង៖ កើតឡើងពេលអ្នកទាំងពីរចាប់ផ្ដើមដុះពន្លកស្នេហ៍រៀងខ្លួន។ បើអ្នកកំពុងស្ថិតក្នុងស្នេហាប្រភេទនេះ អ្នកគឺជាមនុស្សសំណាងបំផុត។ គួរតែថែរក្សាឲ្យបានគង់វង្សតាមដែលអាចធ្វើបាន។

២. ការស្រឡាញ់បែបស្ងៀមស្ងាត់៖ មនុស្សពីរនាក់អង្គុយជិតគ្នាហើយមានអារម្មណ៍ពិសេសលើគ្នាទៅវិញទៅមកដោយមិនបាច់និយាយ។ ទោះយ៉ាងណា ការយល់អារម្មណ៍បែបនេះគឺពិបាកណាស់ ព្រោះវាត្រូវការពេល និងការប្រឹងប្រែងច្រើន។

៣. ស្រឡាញ់ដើម្បីសម្រេចបំណង៖ ស្នេហ៍ប្រភេទនេះមិនល្អហើយក៏មិនអាក្រក់។ វាជាការស្រឡាញ់ដើម្បីសម្រេចគោលដៅអ្វីមួយតាមការគ្រោងទុក។ ឧទាហរណ៍បុរសម្នាក់មកស្រឡាញ់យើងដោយសារចង់បានតំណែងខ្ពស់ក្នុងក្រុមហ៊ុនប៉ាយើង។ ក្នុងករណីខ្លះ វាអាចវិវត្តន៍ជាស្នេហាពិត តែក្នុងករណីភាគច្រើនវានឹងនាំដល់ការបែកបាក់បន្ទាប់ពីសម្រេចបំណងហើយ។

៤. យកស្នេហាជាការពិសោធន៍៖ កើតឡើងពេលដែលបុរសម្នាក់បង្កើតទំនាក់ទំនងជាមួយយើងដើម្បីចង់ផ្លាស់ប្ដូរ ឬចង់ពិសោធន៍ចិត្តយើងលើរឿងអ្វីមួយ។ ស្នេហាប្រភេទនេះធានាថា ៩៨%បរាជ័យ។

៥. ស្នេហាបែបលិចអណ្ដែត៖ ការឈឺចាប់ពីការបែកគ្នាមិនទាន់រសាយអស់ផង យើងក៏ប្រឹងប្រែងផ្សះផ្សាទំនាក់ទំនងឡើងវិញទោះដឹងថាមិនអាចទៅរួច ឬដឹងថាស្នេហានេះងាយនឹងប្រេះបែកណាស់។ បើអ្នកកំពុងស្ថិតក្នុងស្ថានភាពបែបនេះ វិធីល្អបំផុតគឺបែកគ្នាឲ្យបានឆាប់តាមដែលអាចធ្វើបាន។ មិនត្រូវនៅត្រាំត្រែងក្នុងរឿងបែបនេះទេ។

៦. ស្នេហាបែបប្រកួតប្រជែង៖ ស្នេហាពិតគឺសំដៅដល់ការជួយគ្នាឲ្យរីកចម្រើន តែចំពោះការស្រឡាញ់បែបប្រកួតប្រជែងនេះវិញគឺជាការចង់ឈ្នះចាញ់ដើម្បីបានប្រសើរជាងដៃគូម្ខាងទៀត។ នារីណាក៏ដោយបើកំពុងស្ថិតក្នុងកាលៈទេសៈប្រភេទនេះគួរតែនិយាយថា Good Bye ទៅ៕

ប្រភព៖ Brightside ប្រែសម្រួល៖ Chhai Yarith