យុវតីវ័យក្មេងចែកបទពិសោធន៍ប្រលង IELTS បានពិន្ទុខ្ពស់

2017-03-21 03:35:59
ចំនួនមតិ 0 | ចំនួនចែករំលែក 0

មានអាយុត្រឹម ២៣ឆ្នាំ សុខចេង មានបទពិសោធន៍ការងារជាច្រើន រួមមាន ជាអ្នកបកប្រែ អត្ថបទផង បកប្រដេញពាក្យ ភាសាអង់គ្លេសផង ជាគ្រូបង្រៀនអង់គ្លេសក្រៅម៉ោង នៅសាលាអន្តរជាតិ (Standford American School) ជាអតីតអ្នកបកប្រែ វិគីភីឌាភាសាខ្មែរ (Khmer Wikipedia) និងមុខងារជាច្រើនទៀតទាក់ទងនឹងសមត្ថភាពប្រើប្រាស់ភាសាអង់គ្លេសយ៉ាងល្អប្រសើរ។

មានស្រុកកំណើត នៅខេត្តព្រះសីហនុ បច្ចុប្បន្ន សុខចេង ជានិស្សិតរៀន២សាកលវិទ្យាល័យ គឺសាកលវិទ្យាល័យភូមិន្ទភ្នំពេញ និងសាកលវិទ្យាល័យកម្ពុជា។ កម្រិតភាសាអង់គ្លេសរបស់ សុខចេង ក្នុងក្របខណ្ឌអន្តរជាតិ ស្មើនឹង ៨ ពិន្ទុ នៅក្នុងតេស្ត IELTS។ ថ្ងៃនេះកញ្ញា សុំធ្វើការសំភាសន៍សុខចេង ពីបទពិសោធន៍ការសិក្សា និងការប្រឡងធ្វើតេស្ត IELTS។

សួស្តី សុខចេង! តើអាចប្រាប់បន្តិចបានទេ IELTS ហ្នឹងជាអ្វី?

IELTS គឺមកពីពាក្យពេញថា International English Language Test System។ វាគឺជា ការប្រឡងធ្វើតេស្តលើសមត្ថភាពក្នុងការប្រើប្រាស់ភាសាអង់គ្លេសរបស់យើងក្នុងក្របខណ្ឌអន្តរជាតិ។

សង្ខេបបានខ្លីមែន ! ចុះ ហេតុអ្វីបានជា សុខចេង ដាក់ពាក្យប្រលង IELTS?

ខ្ញុំបានដាក់ពាក្យប្រឡង IELTS កាលពីឆ្នាំ២០១៥ ដោយសារ ខ្ញុំចង់ដឹងថា តើកម្រិតភាសាអង់គ្លេសរបស់ខ្ញុំល្អប៉ុនណាក្នុងក្របខណ្ឌអន្តរជាតិ? កាលនោះ ខ្ញុំមានបំណងចុះឈ្មោះចូលរួមកម្មវិធីផ្លាស់ប្តូរការសិក្សាទៅក្រៅប្រទេស ដែលភាគច្រើនគេត្រូវការឲ្យយើងមានការបញ្ជាក់ពីភាសាអង់គ្លេសរបស់យើងតាមរយៈ IELTS ឬ TOEFL។ កាលនោះ ខ្ញុំទទួលបានពិន្ទុ ៨ នៅក្នុងតេស្ត IELTS ដែលអាចចាត់ទុកថា ជាមោទនភាពមួយរបស់ក្មេងមកពីខេត្តព្រះសីហនុ ដូចជា ខ្ញុំដែរ។

សុខចេង មានអ្វីចង់ចែករំលែកខ្លះទេ ទាក់ទងនឹងការសិក្សាភាសាអង់គ្លេស?

ខ្ញុំចាប់ផ្តើមរៀនភាសាអង់គ្លេស តាំងពីអាយុ ៩ ឆ្នាំ តែដោយជីវភាពខ្វះខាត និងរវល់រៀនខ្មែរផងចិនផង ខ្ញុំបានរៀនអង់គ្លេសត្រឹមសាលាដែលថោកៗប៉ុណ្ណោះ។ ខ្ញុំចាំពាក្យម៉ាក់ធ្លាប់ប្រាប់ថា សាលាល្អមិនសូវសំខាន់ទេ សំខាន់គឺ យើងខំរៀន។ ការទទួលបានពិន្ទុ ៨ លើ ៩ នេះ ក៏បង្ហាញថា ពាក្យម៉ាក់ប្រាប់ត្រឹមត្រូវណាស់។ អ្នកមិនចាំបាច់រៀននៅសាលាល្អៗ ថ្លៃៗ ដើម្បីទទួលបានចំណេះខ្ពស់នោះទេ សំខាន់គឺ យើងខំស្វះស្វែងរៀនសូត្រដោយខ្លួនឯងទើបចាំបាច់បំផុត។

ចុះធ្វើយ៉ាងណា ទើបអាចប្រលង IELTS បានពិន្ទុខ្ពស់?

ដើម្បីបានពិន្ទុខ្ពស់ក្នុងការប្រលង IELTS អ្នកមិនត្រឹមតែប្រើប្រាស់ភាសាអង់គ្លេសប៉ុណ្ណោះទេ អ្នកក៏ត្រូវតែចេះចំណេះដឹងទូទៅច្រើនផងដែរ។ ប្រលង IELTS មាន ៤ ដំណាក់កាលគឺ ការស្តាប់ ការអាន ការសរសេរ និងការនិយាយ។ សម្រាប់ការស្តាប់ និងការអាន យើងគ្រាន់តែត្រូវស្តាប់ និងអានអ្វីដែលគេឲ្យប៉ុណ្ណោះ។ តែសម្រាប់ការសរសេរ និងការនិយាយ បេក្ខជនប្រលង ត្រូវសរសេរ និងនិយាយអំពីប្រធានបទដែលគេកំណត់ឲ្យសរសេរ រួមមានប្រធានបទជាច្រើនទាក់ទងនឹង ចិត្តវិទ្យា ប្រវត្តិសាស្ត្រ សង្គមវិទ្យា វិទ្យាសាស្ត្រ ។ល។

ដូច្នេះ ប្រសិនបើអ្នកមិនយល់មិនធ្លាប់ដឹងអ្វីសោះពី ប្រធានបទទាំងនេះ អ្នកនឹងមិនអាចសរសេរបាន និងមិនអាចទទួលបានពិន្ទុល្អឡើយ។ ប្រសិនបើអ្នកចង់ទទួលបានពិន្ទុល្អ អ្នកគួរប្រឹងអាន ស្តាប់ និងស្រាវជ្រាវប្រធានបទផ្សេងៗ និងត្រូវចាំពាក្យ ឬឃ្លាបច្ចេកទេសផ្សេងៗ។ មុនពេលប្រលង អ្នកគួរសាកល្បងរៀន និងធ្វើតេស្ត IELTS តាមរយៈអ៊ីនធើណែត ឬរៀនបម្រុងក្នុងសាលាមួយចំនួន ដើម្បីធ្វើឲ្យខ្លួនសុំានឹងរបៀបប្រឡង IELTS ពិតប្រាកដ។

សុខចេង ធ្លាប់អនុវត្តតាមវិធីនេះទាំងស្រុង ឬទើបអាចប្រលងបានពិន្ទុខ្ពស់ចឹង?

មុនពេលប្រឡង ខ្ញុំធ្លាប់បានស្រាវជ្រាវ អាន និងគិតទាក់ទងនឹងប្រធានបទជាច្រើន។ ដូច្នេះ មុនប្រលង ខ្ញុំត្រូវការពេលប៉ុន្មានខែប៉ុណ្ណោះ ដើម្បីត្រៀមខ្លួនឲ្យសុំា ជាមួយនឹងការធ្វើតេស្ត។ កាលនោះខ្ញុំប្រឈមតែមួយទេ គឺ ការគ្រប់គ្រងពេលវេលាខ្លួនឯង ដើម្បីធ្វើការហ្វឹកហាត់។ សំណាងល្អដែលខ្ញុំបានបង្ខំខ្លួនឯង ឲ្យធ្វើការហ្វឹកហាត់បានច្រើន។

សុខចេង ប្រាប់ថា ប្រលង IELTS ដើម្បីចង់បានអាហារូបករណ៍ និងទៅរៀននៅក្រៅប្រទេស។ ២ឆ្នាំមកនេះបានទៅប៉ុន្មានប្រទេសហើយ?

ខ្ញុំបានជាប់អាហារូបករណ៍ ទៅចូលរួមការផ្លាស់ប្តូរការសិក្សាចំនួនពីរ កាលពីរឆ្នាំមុននេះ ហើយបានទៅប្រទេសវៀតណាម ថៃ និងឡាវ៕

អត្ថបទៈ ឆដាភា