ប៉ាម៉ាក់អត់ចូលចិត្តសង្សារយើង គួរធ្វើម៉េចទៅ?
- 2017-02-20 08:40:06
- ចំនួនមតិ 0 | ចំនួនចែករំលែក 0
ប៉ាម៉ាក់អត់ចូលចិត្តសង្សារយើង គួរធ្វើម៉េចទៅ?
ពេលដែលមានសង្សារ អ្នកណាក៏ចង់ឲ្យប៉ាម៉ាក់ពេញចិត្តលើសង្សារខ្លួនដែរ ព្រោះថ្ងៃក្រោយអាចក្លាយទៅជាគ្រួសារតែមួយក៏ថាបាន។
ចុះបើពួកគាត់អត់ចូលចិត្តសង្សារខ្លួនវិញគួរធ្វើម៉េចល្អទៅ?
តាមសម្ដីរបស់កញ្ញា លីកា ដែលជានិស្សិតឆ្នាំទី៣នៅសាកលវិទ្យាល័យ ពុទ្ធិសាស្ត្រ បានលើកឡើងថា «ម៉ាក់ខ្ញុំខឹងខ្ញុំពេលដែលទាក់ទងជាមួយសង្សារខ្ញុំ ព្រោះម៉ាក់ថាសង្សារខ្ញុំនៅរាងក្មេង គាត់អត់ពេញចិត្តទេ តែខ្ញុំចេះតែព្យាយាមរកឱកាសឲ្យគាត់ចូលជិតម៉ាក់ខ្ញុំ ហើយខ្ញុំឧស្សាហ៍និយាយពីភាពជោគជ័យរបស់គាត់ឲ្យម៉ាក់ស្ដាប់ ដូចជាពេលដែលគាត់បានការងារធ្វើ ជាប់ជាសិស្សឆ្នើមអីហ្នឹង រហូតដល់ម៉ាក់ខ្ជិលហាមតទៅទៀត» ។
ដោយឡែក និស្សិតស្រីផ្នែកព័ត៌មានវិទ្យា សុគន្ធារី ក៏បានចែករំលែកពីបទពិសោធន៍ផ្ទាល់ខ្លួនជុំវិញបញ្ហានេះថា « ប៉ាខ្ញុំគាត់អត់សូវហាមអីទេ តែម៉ាក់វិញគាត់អត់ឲ្យទាក់ទងគ្នាជាមួយសង្សារខ្ញុំតែម្ដង ព្រោះសង្សារខ្ញុំរៀនខាងអគ្គិសនី ដែលជាជំនាញម៉ាក់ស្អប់ខ្លាំង តែខ្ញុំចេះតែនិយាយប្រាប់គាត់ជារឿយៗថាជំនាញហ្នឹងមែនឡើងតភ្លើងទេម៉ាក់ ហើយក៏ព្យាយាមឲ្យសង្សារខ្ញុំមានទំនាក់ទំនងល្អជាមួយបងប្អូនខាងខ្ញុំ ដោយឲ្យពួកគាត់ជួយនិយាយម៉ាក់ រហូតដល់ម៉ាក់ឈប់ហាមពួកខ្ញុំទៀត។
រីឯ បងស្រី គីមហ័រ ដែលជាម្ចាស់ហាងខោអាវមួយនៅម្ដុំសន្ធរម៉ុក បាននិយាយថា « កាលពីខ្ញុំទាក់ទងជាមួយសង្សារខ្ញុំដំបូង គឺប៉ាម៉ាក់ខ្ញុំដាច់ខាតអត់ឲ្យស្រឡាញ់គ្នាម៉ង ព្រោះគាត់អត់ចូលចិត្តគ្រួសារខាងសង្សារខ្ញុំ តែដោយសារពួកខ្ញុំស្រឡាញ់គ្នា ពួកខ្ញុំក៏សុខចិត្តលួចទាក់ទងគ្នាអត់ឲ្យពួកគាត់ដឹងរហូតដល់ខ្ញុំរៀនចប់ បានខ្ញុំប្រាប់គាត់ថាសង្សារខ្ញុំចង់ចូលស្ដី ហើយខ្ញុំព្យាយាមនិយាយបញ្ចុះបញ្ចូលគាត់រហូតដល់ពួកគាត់យល់ព្រម។»
ដូច្នេះបើសិនជាអ្នកជួបបញ្ហាដែលប៉ាម៉ាក់អត់ពេញចិត្តជាមួយសង្សារអ្នក អ្នកគួរតែរកវិធីដោះស្រាយ មិនគួរបោះបង់ចោលដោយងាយនោះទេបើអ្នកស្រឡាញ់គ្នាពិតមែននោះ។