វិធីស្ងោរម្រះឲ្យមានរសជាតិឆ្ងាញ់មិនសូវល្វីង
- 2017-02-15 09:52:16
- ចំនួនមតិ 0 | ចំនួនចែករំលែក 0
វិធីស្ងោរម្រះឲ្យមានរសជាតិឆ្ងាញ់មិនសូវល្វីង
ល្វីងគឺជាអត្តសញ្ញាណពិសេសរបស់បន្លែម្រះ ដែលរសជាតិល្វីងរបស់វាមានប្រយោជន៍ច្រើនបំផុតសម្រាប់សុខភាព ដូចជាជួយសម្រួលការរំលាយអាហារជាដើម។ ប៉ុន្តែប្រិយមិត្តជាច្រើនប្រហែលមិនចូលចិត្ត ឬសុខចិត្តចៀសបន្លែដ៏មានសារប្រយោជន៍មួយនេះដោយសារតែទ្រាំមិនបាននឹងជាតិល្វីងនេះ។
អីចឹងថ្ងៃនេះយើងមកស្វែងយល់ពីវិធីកាត់បន្ថយរសជាតិល្វីងរបស់ម្រះ ដើម្បីឲ្យងាយទទួលទានទាំងអស់គ្នា។ ប្រិយមិត្តភាគច្រើនប្រហែលជាគិតថាគ្រាន់តែរំងាស់ឲ្យយូរៗ ក៏អាចកាត់បន្ថយរសជាតិល្វីងបានហើយ ក៏ប៉ុន្តែការពិតគឺមានវិធីងាយជាងនេះទៅទៀត។
ជំហានក្នុងកាត់បន្ថយរសជាតិល្វីងក្នុងផ្លែម្រះ៖
១. រើសម្រះណាដែលមានពណ៌ស្រាលៗ ប្រសិនបើម្រះណាមានពណ៌បៃតងចាស់ ឬរាងក្រហមព្រឿងៗតាមក្រឡាខាងក្នុង មានន័យថាម្រះនោះមានរសជាតិល្វីងខ្លាំង។
២. រើសម្រះដែលមានពណ៌ស្រាលបានហើយ ក៏យកចិត ឬហាន់តម្រូវតាមមុខម្ហូប។
៣. យកម្រះទៅក្រឡុកជាមួយអំបិល ដោយប្រើអំបិលប្រមាណ ៣ទៅ៤ស្លាបព្រាកាហ្វេ សម្រាប់ម្រះមួយផ្លែ ដោយអំបិលមាននាទីជម្រះជាតិល្វីងរបស់ម្រះឲ្យចេញមក។ ប្រឡាក់អំបិលទុកចោល៣០នាទី សឹមយកទៅលាងទឹកស្អាត។
៤. ចន្លោះពេលនេះ អាចដាំទឹកឲ្យពុះ ពេលទឹកពុះហើយ បន្ថយភ្លើងឲ្យនៅខ្សោយបន្តិច។
៥. ដាក់ម្រះដែលលាងទឹកស្អាតរួចហើយស្ងោរ ដោយមិនចាំបាច់បិទគម្របឆ្នាំង ដើម្បីក្លិនខ្លាំងៗរបស់ម្រះភាយចេញមកក្រៅ។
៦. ស្ងោរម្រះឲ្យឆ្អិន ដោយមើលតាមពណ៌របស់វា គឺស្ងោររហូតឲ្យឡើងពណ៌ត្នោតតិចៗ។
៧. ការស្ងោរតែមួយដង អាចឲ្យម្រះនៅជាតិល្វីងខ្លះៗ ប៉ុន្តែល្មមនឹងទទួលទានបាន ប៉ុន្តែបើចង់ឲ្យបាត់ជាតិល្វីងជាងនេះទៀត អាចស្ងោរពីរដង ដោយប្ដូរទឹកថ្មី និងស្ងោរម្ដងទៀត។
តែប៉ុណ្ណេះអាចទទួលបានម្រះដែលមានជាតិល្វីងតិចសម្រាប់ធ្វើម្ហូបទទួលទានបានយ៉ាងពេញចិត្ត។ ជាតិល្វីងរបស់ម្រះ ក្រៅពីជួយសម្រួលការរំលាយអាហារហើយ ក៏អាចជួយបន្ថែមការចង់ញ៉ាំអាហារបានថែមទៀតផង ដូច្នេះគួរបង្រៀនឲ្យក្មេងៗញ៉ាំបន្លែនេះ ដើម្បីជួយឲ្យពួកគេមិនធុំអាហារ និងជាការទម្លាប់ឲ្យពួកគេញ៉ាំបន្លែបានច្រើនប្រភេទផង ៕
ប្រភព៖ food.mthai