របាំក្បាលពោះផ្តល់ប្រយោជន៍ចំពោះស្ត្រីហួសស្មាន
- 2017-02-14 02:30:30
- ចំនួនមតិ 0 | ចំនួនចែករំលែក 0
របាំក្បាលពោះផ្តល់ប្រយោជន៍ចំពោះស្ត្រីហួសស្មាន
«របាំក្បាលពោះ» ឬ «របាំចម្រុះក្បាច់» គឺជារបាំដែលមានមកពីប្រទេសអាស៊ីកណ្ដាលខាងកើត របាំនេះបានមកដល់ប្រទេសកម្ពុជានៅឆ្នាំ២០១៣ ដោយគូ្របង្វឹករាំអាជីពម្នាក់ជនជាតិអេហ្ស៊ីប-ឆេក ។
របាំនេះត្រូវចំណាយពេលច្រើនឆ្នាំក្នុងការហាត់រៀន ដើម្បីក្លាយខ្លួនជាអ្នករបាំជំនាញ ដូចគ្នានឹងរបាំបាល់ឡេ ឬរបាំដទៃទៀតដែរ។
កញ្ញា លីនដា អាសា អាប់ដាលា (Linda Asha Abdalla) ជាគ្រូបង្វឹករបាំក្បាលពោះនៅ Advance Learning Academy បានឲ្យដឹងថា «ទាល់តែសាក ទើបដឹង! អ្វី ដែលអ្នកត្រូវធ្វើ គឺអង្កេតនិងសាកល្បង ពី ២ ទៅ៣មេរៀនដំបូង។ សិស្សទាំងអស់នឹងមានអារម្មណ៍ងាយស្រួលក្នុងការហាត់រៀន និងវិវត្តន៍ខ្លួនយ៉ាងឆាប់រហ័ស»។
បើនិយាយពីអត្ថប្រយោជន៍នៃរបាំក្បាលពោះ លីដា បញ្ចាក់ថា អ្នកហាត់នឹងទទួលបានផលលើសពីការគិត របាំនេះជួយសម្រួលសរសៃឈាម ជាតិខ្លាញ់ ធ្វើឲ្យមានសុខភាពល្អ សម្រួលអារម្មណ៍តានតឹង និងល្អចំពោះស្រ្តីមានផ្ទៃពោះ ងាយស្រួលក្នុងការសម្រាលកូនផងដែរ។
ជាងនេះទៅទៀត របាំក្បាលពោះ ជួយដល់ការពន្លាសាច់ដុំ កប់សរសៃ សម្រកទម្ងន់ស្រ្តីមុនសម្រាលកូន កាត់បន្ថយភាពតានតឹង តប់ប្រមល់ និងជំនួយដល់ប្រព័ន្ធរំលាយអាហារជាដើម។ ចង្កេះទន់ល្វតល្វន់ បត់ចុះបត់ឡើង ជំនួយដល់សាច់ដុំ ជាពិសេសក្បាលពោះ ឆ្អឹងត្រគាក ឆ្អឹងដងខ្លួន ឆ្អឹងខ្នង និងឆ្អឹងកងក ដែលធ្វើចលនាជាមួយគ្នានឹងដងខ្លួន ខុសពីរបាំផ្សេងៗទៀត ដែលចលនាទាំងអស់បញ្ច្រាសគ្នា។ របាំក្បាលពោះ គឺជាមូលដ្ឋានចលនា ដែលកើតមានពីធម្មជាតិចំពោះស្រ្តី អំណោយផលដល់សុខភាពស្រ្តីដែលអនុវត្តទម្រង់នៃរបាំក្បាលពោះជាប្រចាំ។
លីនដា បានឲ្យដឹងថាបន្តថា ការរៀនរាំរបាំក្បាលពោះនេះ អាស្រ័យលើការចំណាយពេល និងការយកចិត្តទុកដាក់របស់សិស្សផ្ទាល់ យ៉ាងហោចណាស់ត្រូវចំណាយពេល២ទៅ៣ខែ ដើម្បីរៀនក្បាច់គ្រឹះ ឬក្បាច់ដំបូងដែរ។
គួរឲ្យដឹងដែរថា របាំក្បាលពោះមិនមែនជារបាំរាំស្រាត/របាំសិច របាំប្រលោម/របាំឱប កំប្លែង ឬ លែងសើច ទម្រង់របាំឥណ្ឌា ឬរបាំហាវ៉ៃទេ។ សព្វថ្ងៃរបាំក្បាលពោះ គឺជាការលាយចូលគ្នានូវការរាំបែបបូរាណ មកពីប្រទេសអេហ្ស៊ីប ស៊ីរី ទួគី អារ៉ាប៊ីសាអូឌីត អាហ្រ្វិកខាងជើង និង ក្បាច់រាំមកពីអាស៊ីកណ្ដាលភាគខាងកើត៕