ពេលវេលាសំខាន់ទាំង ៧ ក្នុងជីវិតរបស់មនុស្សស្រី

2017-01-19 08:10:43
ចំនួនមតិ 0 | ចំនួនចែករំលែក 0

ក្នុងមួយជីវិតមនុស្សស្រី អាចមានពេលវេលាសំខាន់ៗប៉ុន្មានដង ចាប់តាំងពីនាងធំដឹងក្ដីរហូតក្លាយជាម្ដាយរបស់គេ? បើទោះបីជាពេលខ្លះនាងមិនអាចទទួលបានអ្វីដែលដូចតាមការរំពឹងទុករបស់នាងក៏ដោយក្ដី តែវានៅតែជាអ្វីដែលនាងចង់បាន និងរង់ចាំជានិច្ច។

តើពេលវេលាសំខាន់ៗទាំងនោះមានអ្វីខ្លះទៅ?

១ ពេលវេលាដែលឪពុកម្ដាយនាងមានមោទកភាពលើនាង

សេចក្ដីត្រេកអរដែលកើតចេញពីភាពជោគជ័យរបស់កូនជាអ្វីដែលឪពុកម្ដាយប៉ងប្រាថ្នា ដូច្នេះមនុស្សស្រីតែងស្រមៃ និងព្យាយាមអស់ពីកម្លាំងកាយចិត្តក្នុងការសម្រេចបានអ្វីមួយដើម្បីឱ្យឪពុកម្ដាយរបស់នាងមានមោទកភាពចំពោះនាង។ មិនថាតែការទទួលបានពិន្ទុល្អនៅសាលារៀន ការទទួលបានការងារដែលមានប្រាក់ខែច្រើននោះទេ។

២ ពេលវេលាដែលនាងធ្លាក់ក្នុងអន្លង់ស្នេហ៍

នេះជាពេលវេលាដ៏សំខាន់ដែលបង្ហាញថានាងជាមនុស្សម្នាក់ដែលធំដឹងក្ដី និងចេះមានក្ដីស្រលាញ់ហើយ។ អាការថប់បារម្ភ ក្ដីសង្ឃឹម ក្ដីសុបិន និងភាពភ័យខ្លាចបានកើតឡើងក្នុងចិត្តរបស់នាង។ ការធ្លាក់ក្នុងអន្លង់ស្នេហ៍ជាអារម្មណ៍ដ៏អស្ចារ្យមួយជាពិសេសនៅពេលដែលនាងទទួលបានការស្រលាញ់ត្រឡប់មកវិញ។

៣ ពេលវេលាដែលគាត់សុំនាងរៀបការ

គ្មានអ្វីរីករាយជាងការសុំរៀបការពីមនុស្សដែលនាងស្រលាញ់ឡើយ។ អារម្មណ៍នៅពេលនោះពិតជាអស្ចារ្យ និងជាសុបិនដែលនាងប្រាថ្នាចង់បានសម្រាប់សាងសុភមង្គលគ្រួសារដ៏ពេញលេញមួយផងដែរ។ នាងចងចាំពេលវេលាដ៏ផ្អែមល្ហែមបែបនេះមិនភ្លេចទេ ហើយវាថែមទាំងធ្វើឱ្យនាងស្រលាញ់គាត់កាន់តែខ្លាំងថែមទៀតផង។

៤ ពេលវេលាទទួលបានជោគជ័យក្នុងការងារ

នេះជាពេលវេលាដែលពិសេសបំផុតសម្រាប់ជីវិតរបស់នាង និងជាពេលវេលាដែលធ្វើឱ្យនាងមានអារម្មណ៍ថាខ្លួននាងជាមនុស្សស្រីដែលជោគជ័យ។ ការដែលទទួលបានការដំឡើងឋានៈ និងការកោតសរសើរគឺពិតជាអស្ចារ្យបំផុតសម្រាប់នាង។

៥ ពេលវេលាដែលនាងរៀបអាពាហ៍ពិពាហ៍ ពិធីរៀបមង្គលការដ៏អធិកអធមជាក្ដីសុបិនរបស់នារីគ្រប់រូប។ ថ្ងៃរៀបមង្គលការជាថ្ងៃដែលនាងនឹងក្លាយខ្លួនជាព្រះនាង និងជាថ្ងៃដែលនាង និងមនុស្សប្រុសដែលនឹងក្លាយជាអនាគតស្វាមីរបស់នាងប្រកាសប្រាប់ពិភពលោកថាអ្នកទាំងពីរនឹងក្លាយជាប្ដីប្រពន្ធស្របច្បាប់ ព្រមទាំងបានបំពេញមុខ បំពេញមាត់ដល់ឪពុកម្ដាយទាំងសងខាងផងដែរ។

៦ ពេលវេលាដែលនាងក្លាយជាម្ដាយគេ

វាជាពេលវេលាដ៏ពិបាក និងអស្ចារ្យមួយដែលមនុស្សស្រីត្រូវពរពោះកូនក្នុងផ្ទៃរយៈពេល ៩ ខែ ១០ ថ្ងៃ។ រហូតដល់ថ្ងៃដែលនាងបានឃើញមុខកូនរបស់នាងជាលើកដំបូងបំផុត។ ការដែលនាងក្លាយជាម្ដាយគេ គឺជាវិថីជីវិតថ្មី និងជាកាតព្វកិច្ចធំសម្រាប់នាងផងដែរ។

៧ ពេលវេលាដែលកូននាងធំដឹងក្ដីតាមដំណាក់កាលនីមួយៗ

ពេលវេលាដែលកូនរបស់នាងចេះក្រឡាប់ ចេះអង្គុយ ចេះវារ ចេះដើរ និងចេះហៅនាងថា "ម៉ាក់" ជាពេលវេលាដែលនាងទន្ទឹងរង់ចាំ និងចង់ឃើញចង់ឮបំផុត។ការដែលមើលឃើញកូនៗធំធាត់ ដឹងក្ដី គឺពិតជាពេលវេលាដែលសំខាន់ និងរីករាយសម្រាប់ជីវិតរបស់មនុស្សស្រីក្នុងនាមជាម្ដាយ។ មិនត្រឹមតែប៉ុណ្ណោះ ពេលវេលាដែលកូននាងធំចម្រើនវ័យ ចូលសិក្សា និងជោគជ័យក្នុងការងារក៏ជាពេលវេលាដែលសំខាន់ និងជាពេលវេលាដែលនាងចង់ឃើញបំផុតផងដែរ៕

ប្រភព៖ Likelovequotes

ប្រែសម្រួលៈ ណាលីតា