ផ្លុំ ឬប៉ាក់ចិញ្ចើម មួយណាដែរជាជម្រើសរបស់ស្រីៗ?

2017-01-18 08:15:17
ចំនួនមតិ 0 | ចំនួនចែករំលែក 0

ការសាក់ ផ្លុំ ឬប៉ាក់ចិញ្ចើមជារឿងធម្មតាទៅហើយសម្រាប់ស្ត្រីយើង ជាពិសេសអ្នកដែលមានគ្រួសាររួចហើយ។ តែបច្ចុប្បន្ននេះ សូម្បីតែយុវវ័យក៏មានចំណាប់អារម្មណ៍លើការធ្វើចិញ្ចើមដែរ ព្រោះតែការធុញទ្រាន់ក្នុងការគូរវាជាប្រចាំ ហើយថែមទាំងប្រើពេលយូរទៀត។

ម្ចាស់ហាង Fancy Salon & Brows អ្នកស្រី ផាវី បានប្រាប់កញ្ញាថា ពីមុនសម្បូរបងៗដែលជាស្រ្តីវ័យខ្ទង់៣០ទៅ៤០ឆ្នាំ ពួកគាត់ចូលចិត្តមកផ្លុំ ឬប៉ាក់ចិញ្ចើម តែមួយរយៈចុងក្រោយនេះសម្បូរតែយុវវ័យភាគច្រើន ។«តែបើនិយាយពីចំណង់ចំណូលចិត្តវិញភ្ញៀវដែលមក និយមប៉ាក់ជាងផ្លុំ ព្រោះការប៉ាក់ចិញ្ចើមជាប្រភេទសរសៃៗមើលទៅឃើញបែបធម្មជាតិ ជាជាងការផ្លុំដែលមើលទៅដូចជាគូរចឹង»។

មានវ័យ២៥ឆ្នាំ កញ្ញា យ៉ាន់ លីណា បានប្រាប់កញ្ញាថា ដោយតែពិបាកក្នុងការគូរចិញ្ចើម ហើយមិនសូវមានពេលផងនោះ ក៏សម្រេចចិត្តទៅប៉ាក់ចិញ្ចើមតែម្តង។ កញ្ញាបន្តថា «ចូលចិត្តប៉ាក់ចិញ្ចើមជាងផ្លុំព្រោះវាមើលទៅសាមញ្ញ បែបធម្មជាតិៗ បើផ្លុំវាក្រាស់ពេក អត់ចូលចិត្តទេ ។

កញ្ញា យ៉ាន់ លីណា

ផ្ទុយពីលីណា កញ្ញា សុគន្ធធាវី ដែលជាបុគ្គលិកផ្នែកលក់គ្រឿងសំណង់បាននិយាយថា «សម្រាប់ខ្ញុំវិញ ស្រលាញ់ផ្លុំព្រោះវាដិតជាងប៉ាក់ មិនពិបាកគូរពេល Make up ហើយជាពិសេសសម័យនេះគេនិយមចិញ្ចើមរាងក្រាស់ ចឹងហើយបានខ្ញុំផ្លុំចិញ្ចើម។

កញ្ញា សុគន្ធធាវី

ទើបតែនឹងសាក់ចិញ្ចើមហើយថ្មីៗ អ្នកស្រី លីនី អាជីវករនៅផ្សារទួលទំពូងវិញអះអាងថា «បងទៅសាក់កន្លះខែមុនហ្នឹង តាមពិតរារែកដែរហ្នឹងមិនចង់សាក់ទេ តែយើងអត់សូវមានរោមចញ្ចើម អាក្រក់មើល ហើយត្រូវសម័យឥលូវគេនិយមសាក់ចិញ្ចើមក្រាស់ៗទៀត ក៏ទៅសាក់នឹងគេទៅ»។

ចំណែកពិធីការីនីកូនមួយប្រចាំទូរទស្សន៍អាស៊ីអាគ្នេយ៍ គិតខុសស្រឡះពីមតិខាងលើ អ្នកនាង កង ចាន់សុភ័ក្រ និយាយថា អត់ចូលចិត្តទេបង ផ្លុំឬប៉ាក់ចិញ្ចើមអីហ្នឹង ព្រោះខ្ញុំមានចិញ្ចើមក្រាស់ស្រាប់ហើយ ណាមួយមិនចង់ចំណាយលុយលើរឿងចឹងៗទេ។