រូបមន្តពិសេសដែលធ្វើឲ្យស្រ្តីជនជាតិឥណ្ឌាមានសក់វែង

2017-01-18 02:56:42
ចំនួនមតិ 0 | ចំនួនចែករំលែក 0

សក់ខ្មៅរលើបរលោងអ្នកណាក៏ចង់បានដែរ មែនទេស្រីៗគ្នាយើង។ ពេលមើលរឿងឥណ្ឌា ចេះតែឆ្ងល់ថាហេតុអីសក់របស់ស្រីៗជនជាតិឥណ្ឌាវែងៗ និងខ្មៅរលើបរលោងយ៉ាងនេះ មានអ៊‍ីចឹងដែរឬអត់ហ្នឹង? តាមពិតពួកគេមានគន្លឹះពិសេសៗដើម្បីថែរក្សាសក់របស់ពួកគេ។

ថ្ងៃនេះ កញ្ញា នឹងលើកយកអាថ៌កំបាំងរបស់ស្រីឥណ្ឌាក្នុងការថែរក្សាសក់ដ៏ស្រស់ស្អាតមកបង្ហាញជូនមិត្តនារីទាំងឡាយ៖

១. ប្រទាលកន្ទុយក្រពើ៖ ប្រទាលកន្ទុយក្រពើជួយជំរុញដល់ការលូតលាស់របស់សក់ ធ្វើឱ្យសក់កាន់តែដុះវែងបានលឿន និងជួយថែរក្សាស្បែកក្បាលថែមទៀតផង។

ចិតសម្បកប្រទាលកន្ទុយក្រពើចេញ ដោយយកតែសាច់ប៉ុណ្ណោះ
ច្របាច់យកតែទឹក
ម៉ាស្សាទឹកប្រទាលកន្ទុយក្រពើលើស្បែកក្បាលរួចផ្អាប់ចោលរយៈពេលពីរម៉ោង ឬមួយយប់តែម្ដង។

២. ប្រើស្ព្រៃយ៍ Panthenol៖ ស្ព្រៃយ៍ D-panthenol មានជាតិវីតាមីន B5 និងអាស៊ីដ Pantothenic ដែលត្រូវបានគេស្គាល់ថាជាសារធាតុគីមីល្អបំផុតសម្រាប់ស្បែកក្បាល និងពន្លឿនដល់ការបណ្តុះសក់។

កក់សម្អាតសក់របស់អ្នកឱ្យស្អាត
បាញ់ស្ព្រៃយ៍ Panthenol លើសក់ត្រង់គល់សក់រួចញីឱ្យសព្វល្អ ឬអាចលាបពីចុង ដល់គល់សក់តែម្ដងក៏បាន។

៣. លាងសក់ជាមួយទឹកត្រជាក់៖ ទឹកត្រជាក់អាចធ្វើឱ្យចរន្តឈាមរត់ស្រួលដែលធ្វើឱ្យសក់ដុះលឿន និងភ្លឺរលើបរលោងជាងប្រើទឹកក្ដៅឧណ្ហៗទៅទៀត។ ក្រោយពេលកក់សក់អ្នកត្រូវលាងសម្អាតសក់នឹងទឹកត្រជាក់ ឬប្រើទឹកត្រជាក់មកលាងសម្អាតថ្នាំអប់សក់ ឬក្រែមបន្ទន់សក់

៤. លាងសម្អាតសក់ជាមួយនឹងទឹកខ្មេះផ្លែប៉ោម៖ ទឹកខ្មេះផ្លែប៉ោមជួយពន្លឿនដល់ការបណ្តុះសក់។ សូមកុំបារម្ភវាមិនជាប់ក្លិនដូចទឹកខ្មេះធម្មតាទេ ហើយអនុវត្តវិធីនេះពីរដងក្នុងមួយខែ។

កក់សម្អាតសក់ឱ្យស្អាត
ប្រើទឹកខ្មេះនេះជំនួសក្រែមបន្ទន់សក់ រួចលាងសម្អាតឱ្យស្អាត

៥. ប្រូតេអ៊ីននៃស៊ុតផ្នែកពណ៌ស៖ វិធីដ៏ល្អក្នុងការដោះស្រាយនឹងការកង្វះជាតិប្រូតេអ៊ីនសក់

យកស៊ុតពីរគ្រាប់ក្នុងសីតុណ្ហភាពបន្ទប់ធម្មតា
រំលែកផ្នែកពណ៌ស និងពណ៌លឿងចេញពីគ្នា រួចយកផ្នែកពណ៌ស មកលាបលើគល់សក់
គ្របសក់ដោយមួកងូតទឹក ទុកមួយសន្ទុះរួចលាងសម្អាតចោល។

៦. ប្រើស៊ុតផ្នែកពណ៌ស និងស្រាគោញាក់៖ ស៊ុតគឺពោរពេញដោយប្រូតេអ៊ីន ហើយស្រាគោញាក់មានជាតិតានីនដែលធ្វើឱ្យសក់ដុះកាន់តែឆាប់វែង និងក្រាស់។ យកស៊ុតពីរគ្រាប់លាយជាមួយនឹងស្រាគោញាក់មួយកែវ យកមកលាបគល់ ដល់ចុងសក់ ដោយលាបប្រេងអូលីវពីលើបន្ថែម ទុកមួយសន្ទុះ រួចលាងសម្អាតជាការស្រេច៕

ប្រភព៖ Brightside

ប្រែសម្រួលៈ ណាលីតា