ជៀសវាងខូចមុខមាត់ និងមានគ្រោះថ្នាក់ មុនកែសម្ផស្សគួរគិតគូរពីអ្វីខ្លះ?
- 2017-01-16 11:16:23
- ចំនួនមតិ 0 | ចំនួនចែករំលែក 0
ជៀសវាងខូចមុខមាត់ និងមានគ្រោះថ្នាក់ មុនកែសម្ផស្សគួរគិតគូរពីអ្វីខ្លះ?
ការកែសម្ផស្សបានក្លាយទៅជារឿងសាមញ្ញទៅហើយនាសម័យនេះ ជាពិសេសក្នុងចំណោមនារីៗ។ ជារឿយៗយើងបានឃើញពួកគេស្អាតជាងមុន ក្រោយការកែសម្ផស្ស។ ប៉ុន្តែយើងក៏បានបានឮ និងបានឃើញពីផលអាក្រក់ដែលកើតចេញពីការកែសម្ផស្សដែរ។
មានមួយចំនួនប្រែក្លាយជាអាក្រក់ជាងមុន និងខ្លះទៀតសំណាងអាក្រក់រហូតដល់ស្លាប់ក៏មាន។ ដូច្នេះចង់គេចចេញពីផលអាក្រក់ទាំងអស់នេះ ច្បាស់ណាស់រក្សាសម្រស់ធម្មជាតិរបស់យើង ប៉ុន្តែប្រសិនបើអ្នកពិតជាចង់កែសម្ផស្សមែននោះ ថ្ងៃនេះកញ្ញា សូមបង្ហាញជូនពីចំណុចសំខាន់ៗមួយចំនួនដែលអ្នកគួរសិក្សាឲ្យបានច្បាស់មុនសម្រេចចិត្តកែសម្ផស្ស៖
១.សួរខ្លួនឯងឲ្យច្បាស់ថាហេតុអ្វីបានជាចង់កែសម្ផស្ស? តើវាចាំបាច់ប៉ុណ្ណា? ពីព្រោះរឿងកែសម្ផស្ស មិនមែនធ្វើថ្ងៃនេះ បន្ទាប់លាងចេញដូចយើងផាត់មុខនោះទេ វាគឺជាដំណើរការដែលនឹងមានឥទ្ធិពលរយៈពេលវែង ឬមួយជីវិតក៏មាន។ ដូច្នេះសួរខ្លួនឯងឲ្យច្បាស់មុននឹងសម្រេចចិត្ត។
២.ដឹងថាខ្លួនឯងចង់បានអី? កុំគ្រាន់តែចង់កែសម្ផស្ស ត្រូវដឹងថាយើងចង់បានលទ្ធផលយ៉ាងម៉េច។ អាចគូរ ឬបង្ហាញរូបគំរូដល់គ្រូពេទ្យ ព្រោះវាជាការងាយស្រួលដល់ពេទ្យក្នុងការពន្យល់អ្នកអំពីផលប៉ះពាល់ ឬភាទៅរួចចំពោះលទ្ធផលដែលអ្នកចង់បាន។
៣.ត្រូវដឹងថាកែសម្ផស្សគឺជារឿងប្រថុយប្រថាន មួយចានទឹកមួយចានគោគ៖ ដូច្នេះអ្វីដែលអ្នកគួរធ្វើគឺត្រូវស្រាវជ្រាវឲ្យបានច្រើនតាមដែលអាចធ្វើទៅបាន។ មើលព័ត៌មានតាម internet សួរមិត្តភ័ក្រដែលធ្លាប់កែសម្ផស្ស ពិភាក្សាជាមួយអ្នកជំនាញ-ល-។
៤.ជ្រើសរើសគ្រូពេទ្យដែលល្អបំផុតមួយ៖ មានគ្រូពេទ្យក្នុងវិស័យនេះមិនតិចនោះទេ ប៉ុន្តែរើសម្នាក់ដែលល្អបំផុតជាអ្វីដែលអ្នកគួរធ្វើ។ មើលបទពិសោធន៍របស់គ្រូពេទ្យ ស្ថានភាពគ្លីនិកដែលគាត់ធ្វើការ លទ្ធផលដែលគាត់ធ្វើបាន។ ចុងក្រោយសួរខ្លួនឯង តើអ្នកមានទំនុកចិត្តលើគាត់ប៉ុណ្ណា? ត្រូវចាំថាមនុស្សម្នាក់នេះនឹងមានសិទ្ធិ កាត់ កកាយរាងកាយ និងមុខមាត់របស់អ្នក។ ទុកចិត្តចាំសាក។
៥.តើស្ថានភាពអ្នកអាចកែសម្ផស្សបានឬអត់? តើអ្នកមានជំងឺប្រចាំកាយ ឬកំពុងប្រើប្រាស់ថ្នាំអ្វីដែលមិនតម្រូវឲ្យមានការកែសម្ផស្សឬទេ? សាកសួរពេទ្យជំនាញអំពីរឿងនេះឲ្យច្បាស់។
៦.ប្រថុយ៖ ការកែសម្ផស្សអាចផ្លាស់ប្តូរជីវិតអ្នកទៅល្អ ឬអាក្រក់ជាងមុន ផ្អែកទៅលើលទ្ធផលរបស់វា។ មែនទែនទៅមុនកែសម្ផស្ស គ្រូពេទ្យនឹងនិយាយប្រាប់អ្នកអំពីផលប៉ះពាល់មួយចំនួនរួចហើយ។ ដូច្នេះត្រូវត្រៀមចិត្តចំពោះលទ្ធផល។
៧.តម្លៃ៖ កែសម្ផស្សមិនអស់តិចនោះទេ។ ហើយបើសិនជាអ្នករកសេវាកម្មដែលអស់តិច គុណភាពក៏ជាក្តីកង្វល់។ ចឹងគិតដល់រឿងកែសម្ផស្សកុំភ្លេចក្រឡេកមើលកាបូប តើគ្រាន់អត់?
៨.ផលរំខានក្រោយការវះកាត់៖ គេថាចង់ស្អាតទាល់តែទ្រាំឈឺ គឺជារឿងត្រឹមត្រូវ។ មិនមែនវះកាត់ហើយអ្នកក៏ស្អាតភ្លាម អាចទៅណាម៉ោណាបានភ្លាមនោះទេ។ មានការវះកាត់ខ្លះទាមទារឲ្យអ្នក ថ្នម ខ្លួនរាប់អាទិត្យ ដូច្នេះអ្នកមិនអាចទៅធ្វើការបាន និងត្រូវការអ្នកមើលថែទៀត។ ដោយឡែកការវះកាត់ខ្លះទៀត អ្នកមិនអាចត្រលប់ទៅប្រើប្រាស់វាដូចធម្មតាបានទេ ដូចគេតែងតែនិយាយ មើលបានហាមប៉ះ។
គិតឲ្យអស់ពីចំណុចទាំងប្រាំបីខាងលើ បើគិតហើយអូខេ កែទៅ។ ជូនពរទទួលបានជោគជ័យ៕
ប្រភព៖ Sofeminine