គន្លឹះសំខាន់ៗសម្រាប់គម្រោងអាពាហ៍ពិពាហ៍
- 2017-01-16 09:51:07
- ចំនួនមតិ 0 | ចំនួនចែករំលែក 0
គន្លឹះសំខាន់ៗសម្រាប់គម្រោងអាពាហ៍ពិពាហ៍
អាពាហ៍ពិពាហ៍គឺជារឿងសំខាន់មួយសម្រាប់យុវវ័យ ព្រោះវាជារឿងអនាគតដែលមិនអាចធ្វើតាមតែការនឹកឃើញនោះទេ។ ជីវិតគ្រួសារមានសុភមង្គលឬទៅជាយ៉ាងណាក៏អាស្រ័យទៅការគ្រប់គ្រងរបស់អ្នកនិងដៃគូរបស់អ្នកដែរ ដូច្នេះអ្នកគួរតែមានគម្រោងខ្លះមុនពេលឈានដល់អាពាហ៍ពិពាហ៍។ ទាំងនេះសុទ្ធតែជាអ្វីដែលអ្នកគួរតែពិភាក្សាជាមួយគ្នាមុនពេលសម្រេចចិត្តរៀបការ៖
1. ពិភាក្សាចំពោះការប្រើប្រាស់លុយកាក់ និងគម្រោងការងារ៖ អ្នកគួរតែគិតគូរអំពីការចាត់ចែងលុយកាក់ដែលអ្នកមាន ថាតើគួរតែបើកគណនេយ្យសន្សំ ឬក៏វិនិយោគទៅលើអ្វីមួយដើម្បីរក្សា ឬរកចំណូលបានខ្លះទៀត។ ម្យ៉ាងទៀត អ្នកក៏គួរតែពិភាក្សាគ្នាអំពីការងារដែលត្រូវធ្វើ និង អ្វីដែលអ្នកទាំងពីររំពឹងទុកថានឹងមានផងដែរ។ តើអ្នកសម្រេចចិត្តធ្វើការទាំងពីរអ្នក? តើការងារដែលអ្នកធ្វើមានស្ថិរភាពដែរឬទេ? ហើយថាតើ ប្រាក់ខែអ្នកអាចផ្គត់ផ្គង់គ្រួសារអ្នកបានដែរឬក៏អត់?
2. គម្រោងនៅពេលដែលអ្នកមានកូន៖ ពិភាក្សាថាតើអ្នកគួរតែយកកូននៅពេលណា? រៀបការហើយភ្លាមឬក៏ក្រោយរៀបការរយៈពេលយូរ?ហើយគម្រោងយកកូនប៉ុន្មាន? ព្រោះវាអាចឲ្យអ្នកងាយស្រួលនៅពេលដែលអ្នករៀបចំទុកដាក់រឿងនេះរួច។
3. ទីតាំងដែលអ្នកចង់រស់នៅ៖ តើអ្នកជាមួយនិងដៃគូចង់រស់នៅកន្លែងណា? ទីក្រុង ឬ ជនបទ?ហើយពន្យល់ពីហេតុផលដែលអ្នកជ្រើសរើសទីនោះព្រោះវាអាចប៉ះពាល់ដល់ការធ្វើការរបស់អ្នក ការផ្ដល់សេវាការអប់រំដល់កូនអ្នក ហើយវាអាចជិតឬឆ្ងាយពីគ្រួសារអ្នក។
4. ពិភាក្សាលើជំនឿសាសនាដែលអ្នកទាំងពីរប្រកាន់យក៖ បើសិនជាអ្នកទាំងពីរកាន់សាសនាដូចគ្នានោះមិនជាបញ្ហាទេ តែបើខុសគ្នាវិញអ្នកគួរតែពិភាក្សាគ្នាថាតើវាអាចប៉ះពាល់ដល់ចំណងអាពាហ៍ពិពាហ៍អ្នកដែរឬទេ? តើអ្នកអាចសម្របខ្លួនបានឬក៏អត់? ហើយប្រសិនបើអ្នកមានកូនតើនឹងឲ្យកូននោះកាន់សាសនាអ្វី?
5. ពិភាក្សាលើការបែងចែកការងារ៖ វាជាការល្អបើអ្នកអាចនិយាយពីការងារដែលអ្នកអាចធ្វើបាន ហើយដៃគូអ្នកអាចធ្វើបាន ដូចជាការធ្វើការងារផ្ទះ ចម្អិនអាហារ ដើរផ្សារទិញអាហារឬក៏សម្ភារៈផ្សេងៗ។ អ្នកអាចជួយគ្នាធ្វើវា កុំប្រចាំថាវាជាការងារស្រី ឬប្រុស ដូច្នេះវានឹងធ្វើឲ្យគ្រួសារអ្នកមានសុភមង្គល។
6. ពិភាក្សាអំពីគ្រួសារ៖ អ្នកគួរតែគិតពីគ្រួសារទាំងមូលមិនមែនតែប្ដីប្រពន្ធ និងកូននោះទេ តែវារួមផ្សំទាំងឪពុកម្ដាយសាច់ញាតិសងខាង ថាតើអ្នកអាចផ្ដល់ពេលឲ្យពួកគាត់បានកម្រិតណា? ដូចជាការដើរកម្សាន្ត ជួបជុំគ្នា ចែករំលែកឲ្យគ្នាបានប៉ុណ្ណា? ដើម្បីកុំឲ្យមានបញ្ហានៅថ្ងៃក្រោយ។
ចំណុចទាំងប៉ុន្មានខាងលើអាចជាគន្លឹះដើម្បីឲ្យអ្នកគិតពិចារណាក្នុងការបង្កើតគ្រួសារមួយ ដើម្បីកុំឲ្យចំណងគ្រួសារនោះងាយនឹងប្រេះស្រាំដែលធ្វើឲ្យអ្នកមានការសោកស្ដាយនិងឈឺចាប់។
ប្រភព៖ Marriage