ហេតុផលដែលអ្នកម្តាយគួរតែបំបៅដោះកូន យ៉ាងហោចណាស់ឲ្យបាន៦ខែដំបូង

2023-09-05 00:03:00
ចំនួនមតិ 0 | ចំនួនចែករំលែក 0

ការបំបៅដោះកូនជាកាតព្វកិច្ចមួយដែលម្តាយគ្រប់រូបត្រូវតែផ្តល់ទៅឲ្យកូនក្នុងអំឡុងពេល៦ខែដំបូង ប៉ុន្តែដោយសារសម័យកាលកាន់តែវិវត្តទៅមុខ ម្សៅទឹកដោះគោក៏កំពុងចរាចរណ៍ច្រើននៅលើទីផ្សារ ណាមួយអ្នកម្តាយខ្លះទៀតក៏មមាញឹកនឹងការងារ ដូច្នេះហើយម្តាយមួយចំនួននាពេលបច្ចុប្បន្ន បានប្រើប្រាស់ទឹកដោះគោដើម្បីជំនួសវិញ។

បញ្ហានេះ គឺជាការសម្រេចចិត្តរបស់បុគ្គល ជាពិសេសស្ត្រីដែលត្រូវក្លាយទៅជាម្តាយគេ ថាគួរតែផ្តល់ការបំបៅដោះ ឬមិនគួរ។ប៉ុន្តែអ្វីដែលសំខាន់នោះគឺស្ត្រីជាមាតាគួរតែយល់ដឹងពីសារៈសំខាន់នៃការបំបៅដោះកូន។ តើការបំបៅដោះកូនមានសារៈប្រយោជន៍អ្វីខ្លះ?

ទឹកដោះម្តាយគឺជាអាហារ និងទឹកដ៏ល្អបំផុតដែលទារកត្រូវការសម្រាប់៦ខែដំបូង។ ក្នុងអំឡុងពេលនេះ ការផ្តល់ទឹក ឬភេសជ្ជៈផ្សេងៗគឺពុំអនុញាតឡើយ ព្រោះវាអាចបណ្តាលឲ្យទារករាគរូស និង កើតជំងឺដទៃទៀតជាច្រើន។ បើយោងតាមអង្គការសុខភាពពិភពលោក (WHO) បានឲ្យដឹងថាការបំបៅដោះកូនគឺជាវិធីដ៏សាមញ្ញមួយដែលផ្តល់នូវសារធាតុចិញ្ចឹមគ្រប់គ្រាន់ ដូចជា វីតាមីន ប្រូតេអ៊ីន ខ្លាញ់ និងជាតិទឹក ដែលជាតម្រូវការរបស់ទារកក្នុងការលូតលាស់ ដូច្នេះហើយយើងមិនចាំបាច់មានអាហារពីខាងក្រៅជំនួយទៀតនោះទេ។ លើសពីនេះ ទឹកដោះម្តាយគឺជាអាហារដែលងាយស្រួលសម្រាប់ឲ្យទារករំលាយ ហើយវាធ្វើឲ្យទារកលូតលាស់ធំធាត់ មាន IQ ខ្ពស់ក្នុងការសិក្សា និង មានប្រព័ន្ធភាពស៊ាំដែលអាចប្រឆាំងនឹងជំងឺជាច្រើនទៀតផង។

ម្យ៉ាងវិញទៀតបើតាម WebMD ដែលជាវិបសាយសុខភាពបាននិយាយថាការបំបៅដោះកូនបានផ្តល់អត្ថប្រយោជន៍ដល់ម្តាយដូចជា មានសុខភាពល្អ មានភាពជិតដិតជាមួយកូន ឆ្អឹងរឹងមាំ សន្សំសំចៃថវិកា ដុតបំផ្លាញកាឡូរី ហើយអ្វីដែលសំខាន់នោះគឺ កាត់បន្ថយហានិភ័យនៃការកើតជំងឺមហារីក ដែលសូម្បីតែ WHO ក៏បានលើកឡើងបែបនេះដែរ។

សរុបជារួមមក ការបំបៅដោះកូនពិតជាមានសារៈសំខាន់ណាស់ ព្រោះវាបានផ្តល់នូវគុណប្រយោជន៍ជាច្រើនដល់ទារក និងម្តាយ។ ដូច្នេះម្តាយគ្រប់រូបគួរតែជ្រើសរើសវិធីនេះ និងព្យាយាមផ្តល់ឲ្យរហូតដល់ទារកយ៉ាងហោចណាស់៦ខែ ជាជាងការប្រើប្រាស់ទឹកដោះគោឬអាហារផ្សេងៗជំនួសបើសិនជាអាច៕

អត្ថបទៈ ធីតា