ឈប់កុហកខ្លួនឯង នេះជាសញ្ញាបង្ហាញថា ស្នេហាមួយនេះគឺចេញពីអ្នកតែម្ខាង
- 2020-04-08 03:40:00
- ចំនួនមតិ 0 | ចំនួនចែករំលែក 0
ឈប់កុហកខ្លួនឯង នេះជាសញ្ញាបង្ហាញថា ស្នេហាមួយនេះគឺចេញពីអ្នកតែម្ខាង
មនុស្សឆ្លាតនឹងគ្មានថ្ងៃកុហកខ្លួនឯងឡើយ ជាពិសេសគឺទាក់ទងនឹងបញ្ហាមនោសញ្ចេតនា។ បើមានសញ្ញាទាំងនេះក្នុងស្នេហារបស់អ្នកទាំង២ បង្ហាញឲ្យឃើញថា មានតែអ្នកដែលកំពុងនៅតោងទាមចំណងមួយនេះ តែគេមិនបានស្រណោះឡើយ។
**១. គេធ្វើឲ្យអ្នកគ្មានផ្លូវចេញ**
អ្នកកំពុងមានអារម្មណ៍ខឹងចង់ផ្ទុះ គេបែរជាដើរចេញ គ្មានពាក្យសូមទោសមួយម៉ាត់ ហើយក៏មិនខ្វល់ពីអារម្មណ៍របស់អ្នក។ នេះបង្ហាញឲ្យឃើញថា គេមិនបានយកចិត្តគេមកដាក់ក្នុងអារម្មណ៍របស់យើងឡើយ។ សូម្បីតែពេលអ្នកចង់ដោះស្រាយបញ្ហា គេនៅតែធ្វើហី ទុកអ្នកឲ្យនៅតែឯង។ នារីៗត្រូវចាំថា នៅពេលមនុស្សប្រុសដាច់ចិត្តហើយ ទោះអ្នកនៅបន្ត ក៏ប្រៀបដូចជាអោបដើមដំបងយក្សដែរ គឺមានតែបន្លាចាក់ខ្លួនប៉ុណ្ណោះ។
២. គេកម្រតបស្នងមនោសញ្ចេតនាមកវិញ ឬចែករំលែកពីអាថ៍កំបាំងរបស់គេ
ប្រសិនបើគេមិនតបស្នងមនោសញ្ចេតនារបស់អ្នក ឬមិនដែលចែករំលែកពីចិត្តរបស់គេ នោះគឺជាសញ្ញានៃដំណាក់កាលចុងក្រោយនៃស្នេហាមួយនេះហើយ។ ត្រូវចាំថា ដើម្បីរក្សាស្នេហាមួយ គឺត្រូវចេញពីភាគីសងខាង ដ្បិតបើមានតែម្នាក់ ព្យាយមតែឯងនោះ បុគ្គលម្នាក់នោះ មិនយូរមិនឆាប់ប្រាកដជាហត់ ហើយបោះបង់ជាមិនខាន។ ហើយអ្នកក៏មិនគួរឆោតដល់ថ្នាក់ លះបង់តែម្ខាងដូចគ្នា។
៣. គេមិនដែលទាក់ទងមកមុន
ភាគច្រើន នៅក្នុងមនោសញ្ចេតនាមួយ មនុស្សប្រុសនឹងជាមនុស្សដែលនាំមុខ ហើយតែងទាក់ទងមកខាងស្រីមុនជានិច្ច។ ដូចនេះ បើគេនៅមានចិត្តស្រលាញ់យើង គេនឹងជាអ្នកផ្ញើសារ ក៏ដូចជាទូរសព្ទមកមុនហើយ។ មនុស្សស្រីឆ្លាត នឹងមិនឆោត ធ្វើមុខក្រាស់រត់តាមអ្វីដែលលែងជារបស់ខ្លួនឡើយ ដ្បិតនាងស្គាល់តម្លៃរបស់ខ្លួនច្បាស់ជាងអ្នកណាទាំងអស់៕
អានបន្ត៖ កំហុសធំបំផុតរបស់មនុស្សប្រុសគឺ គិតថាមនុស្សស្រីស្រលាញ់ហើយ គ្មានថ្ងៃចាកចេញ