គេនាំគ្នាបញ្ឈប់បុគ្គលិកព្រាតដោយសារ Covid 19 តែវិស័យទាំង៤នេះ នៅរើសបុគ្គលិករាប់សែននាក់

2020-04-06 02:35:00
ចំនួនមតិ 0 | ចំនួនចែករំលែក 0

Amazon រើសបុគ្គលិក១សែននាក់ Walmart រើសបុគ្គលិក ១សែន ៥ម៉ឺននាក់ និងវិស័យជាច្រើនទៀតកំពុងសម្រុករើសបុគ្គលិកទោះវីរុស Covid 19 កំពុងរាតត្បាតខ្លាំងក៏ដោយ។

ប៉ុន្មានខែដើមឆ្នាំ ២០២០នេះ សេដ្ឋកិច្ចកំពុងដាំក្បាលចុះយ៉ាងខ្លាំងដោយសារការរាលដាលនៃវីរុស Covid 19។ ដោយវិស័យជាច្រើននៅលើពិភពលោកត្រូវកាត់បន្ថយចំនួនបុគ្គលិក ឬបញ្ឈប់ទាំងអស់ក៏មានដោយសារគ្មានចំណូល។ ប្រការបែបនេះបានធ្វើឲ្យមនុស្សជាច្រើនធ្លាក់ចូលគ្រាលំបាក ដ្បិតគ្មានថវិការសម្រាប់ប្រើប្រាស់ប្រចាំថ្ងៃ។

នៅសហរដ្ឋអាមេរិកបានមានមនុស្សចំនួន ៣,៤លាននាក់ដាក់ពាក្យសុំជំនួយដោយសារបាត់បង់ការងារហើយ។ នេះគឺជាតួលេខធំមិនដែលមានពីមុនមក។ យ៉ាងណាក្ដី ខុសពីវិស័យដទៃ នៅមានវិស័យ៤ទៀតដែលកំពុងសម្រុកបុគ្គលិកខ្លាំងដោយសារសេវាកម្មកើនឡើង តែខ្វះធនធានមនុស្ស។ ខាងក្រោមនេះគឺវិស័យ៤ដែលនៅបន្តរើសបុគ្គលិករាប់សែននាក់។

១. វិស័យម្ហូបអាហារ និងម៉ាត

ជំងឺរាតត្បាតកើនឡើង ធ្វើឲ្យមនុស្សនាំគ្នាទិញម្ហូបអាហារស្ដុកទុក។ អាស្រ័យហេតុនេះហើយ ធ្វើឲ្យផ្សារទំនើបជាច្រើនខ្វះកម្លាំងធ្វើការ។ Lowe’s ដែលជាបណ្ដាញផ្សារលក់រាយនៅអាមេរិកកំពុងរើសបុគ្គលិក ៣ម៉ឺននាក់សម្រាប់ហាងនៅទូទាំងសហរដ្ឋអាមេរិក។ ទន្ទឹមនឹងនេះ បណ្ដាញម៉ាត 7-Eleven ក៏កំពុងរើសបុគ្គលិកយ៉ាងតិចបំផុត២នាក់ដូចគ្នា ដើម្បីផ្គត់ផ្គង់ឲ្យអតិថិជនរបស់ខ្លួន។

២. វិស័យដឹកជញ្ជូន

ទន្ទឹមនឹងការទិញស្ដុកទំនិញទុកនោះ មនុស្សជាច្រើនបានកម្ម៉ង់ឥវ៉ាន់ឲ្យដឹកមកផ្ទះវិញ ជំនួសឲ្យការចេញទៅទិញខ្លួនឯង។ ជាក់ស្ដែងក្រុមហ៊ុនផលិតឱសថ CVS Health បានប្រកាសរើសបុគ្គលិក៥ម៉ឺននាក់ ទាំងពេញម៉ោង និងក្រៅម៉ោងដើម្បីបម្រើដឹកជញ្ជូនឲ្យក្រុមហ៊ុនខ្លួន។ ក្រុមហ៊ុនភីហ្សាធំលេខ១អាមេរិក Pizza Hut កំពុងរើសបុគ្គលិក៣ម៉ឺននាក់ ព្រោះខ្វះអ្នកដឹកភីហ្សា។

៣. វិស័យអ៊ីនធឺណិត

ដោយសារតែនៅផ្ទះយូរ អផ្សុកពេក ទើបមនុស្សជាច្រើនរំពឹងលើប្រព័ន្ធ អ៊ីនធឺណិតនេះហើយដើម្បីកម្សាន្ត ក៏ដូចជាធ្វើការពីផ្ទះ។ ក្រុមហ៊ុនអ៊ីនធឺណិតនៅអាមេរិកស្ទើរតែទាំងអស់ កំពុងរើសបុគ្គលិកបន្ថែមទាំងអស់ដ្បិតតម្រូវការតម្លើងអ៊ីនធឺណិតមានការកើនឡើង។

៤. វិស័យផលិត

តម្រូវការផលិតគ្រឿងសុខាភិបាលដូចជាម៉ាស៊ីនអុកស៊ីសែន ម៉ាស និងទឹកលាងកំពុងកើនឡើងជាខ្លាំង។ ហេតុនេះហើយ រាល់ក្រុមហ៊ុនដែលធ្វើការនឹងវិស័យនេះ សុទ្ធតែរើសបុគ្គលិកបន្ថែម ក៏ដូចជាថែមម៉ោងឲ្យបុគ្គលិកទាំងអស់ ដើម្បីផលិតគ្រប់តម្រូវការលើទីផ្សារ៕

អានបន្ត៖ ខាងក្នុងឡានសង្គ្រោះបន្ទាន់អ្នកជំងឺ Covid 19 ពេទ្យអ៊ីតាលីលើកទឹកចិត្តអ្នកជំងឺថា៖ កុំខ្លាច កុំខ្លាច

ប្រភព៖ Kenh14 ប្រែសម្រួល៖ Caramel