កាហ្វេលាយក្រូចឆ្មា ជារូបមន្តដ៏ប្រសើរមួយសម្រាប់សុខភាព មែនឬមិនមែន?
- 2020-03-31 04:55:00
- ចំនួនមតិ 0 | ចំនួនចែករំលែក 0
កាហ្វេលាយក្រូចឆ្មា ជារូបមន្តដ៏ប្រសើរមួយសម្រាប់សុខភាព មែនឬមិនមែន?
កាហ្វេ និង ក្រូចឆ្មាគឺជាគ្រឿងផ្សំពីរមុខដែលងាយនឹងរកនៅតាមផ្ទះ ព្រោះសុទ្ធសឹងជារបស់ប្រើប្រាស់ប្រចាំថ្ងៃ។ កាហ្វេ ជាភេសជ្ជៈដែលមនុស្សភាគច្រើននិយមទទួលទាន ជាពិសេសនៅពេលព្រឹក ដើម្បីដាស់ស្មារតីរបស់ពួកគេឲ្យស្វាងពីការងងុយ និង យកចិត្តទុកដាក់លើកិច្ចការដែលត្រូវបំពេញ។ រីឯក្រូចឆ្មា គឺជាប្រភពនៃជាតិ វីតាមីន C ដែលមិនត្រឹមតែជាគ្រឿងផ្សំដ៏សំខាន់នៅក្នុងផ្ទះបាយ វាក៏ត្រូវបានគេយកទៅចម្រាញ់ជាផលិតផលឱសថនានាផងដែរ។
ឥឡូវ មកដឹងពីការបកស្រាយពីអ្នកជំនាញផ្នែកសុខភាព ដើម្បីដឹងថា គុណប្រយោជន៍ទាំង៤ ខាងក្រោម ពិតជាបណ្ដាលមកពីការផឹកកាហ្វេលាយក្រូចឆ្មារ មែន ឬ មិនមែន។
១. ជួយកាត់បន្ថយការឈឺក្បាល
អ្នកស្រាវជ្រាវបានបកស្រាយថា គ្មានការអះអាងណាមួយដែលបង្ហាញថា ការផឹកកាហ្វេលាយក្រូចឆ្មា គឺអាចជួយកាត់បន្ថយអាការៈឈឺក្បាលនោះទេ ព្រោះថាជាតិកាហ្វេអុីននៅក្នុងកាហ្វេអាចជួយកាត់បន្ថយភាពតានតឹងនៃស្មារតីរបស់មនុស្សមួយចំនួន តែវាក៏អាចធ្វើពួកគេមានអាការៈឈឺក្បាលដែរ។ ដូច្នេះ ការលាយក្រូចឆ្មាចូលកាហ្វេ មិនមែនជារូបមន្តបំបាត់ការឈឺក្បាលនោះទេ។
២. ជួយរំលាយជាតិខ្លាញ់ក្នុងរាងកាយ
ការសិក្សាស្រាវជ្រាវបានបង្ហាញថា ការផឹកកាហ្វេអាចធ្វើឲ្យអ្នកសម្រកទម្ងន់ ដោយវាមានតួនាទីជួយសម្រួលដល់ការរំលាយអាហារ និង ការដុតរំលាយកាឡូរីក្នុងរាងកាយ។ ដូច្នេះ បើតាមអ្នកជំនាញ ការផឹកកាហ្វេតែមួយមុខក៏អាចផ្ដល់ឲ្យអ្នកនូវលទ្ធផលគាប់នេះចិត្តដែរ មិនចាំបាច់តែលាយជាមួយក្រូចឆ្មានោះទេ។
៣. ជួយបំបាត់អាការៈរាគរូស
ចំណុចនេះ ក៏ដូចគ្នាដែរ គឺគ្មានការអះអាងដែលអាចសន្មតថាកាហ្វេក្រូចឆ្មាពិតជាអាចជួយសម្រួលដល់ការរាគរូសឡើយ។ អ្នកជំនាញបានបន្តទៀតថា ជាតិកាហ្វេអុីននៅក្នុងកាហ្វេអាច នឹងធ្វើឲ្យអាការៈរាគរូសនោះធ្ងន់ធ្ងរលើសដើម។
៤. ជួយឲ្យស្បែកស្រស់ស្អាត
កាហ្វេត្រូវបានរកឃើញថា ជួយឲ្យស្បែកម៉ដ្ឋស្អាត និង ជួយបំពេញជីវជាតិដល់ស្រទាប់ស្បែក។ រីឯជាតិវីតាមីន C នៅក្នុងក្រូចឆ្មាអាចជួយសម្រួលដល់ផលិតខូឡាជែន ដែលជួយឲ្យស្បែករឹងមាំ តឹងណែន និង កាត់បន្ថយការខូចខាតនៃស្បែកដែលបណ្ដាលមកពីការប៉ះត្រូវពន្លឺថ្ងៃ។ ថ្វីដ្បិតតែ ទាំងពីរមុខនេះសុទ្ធតែមានអត្ថប្រយោជន៍សម្រាប់ស្បែក ក៏ប៉ុន្ដែអ្នកជំនាញបានធ្វើការណែនាំឲ្យធ្វើការពិសារវាដាច់ដោយឡែកពីគ្នា។
ដូច្នេះ យោងតាមការបកស្រាយរបស់អ្នកជំនាញផ្នែកសុខភាព ការផឹកកាហ្វេលាយនឹងក្រូចឆ្មា គឺមិនមែនជាភេសជ្ជៈសុខភាពដែលមានការអះអាងត្រឹមត្រូវពីអត្ថប្រយោជន៍របស់វាឡើយ៕
ចុចអានបន្ត៖ ៨ វិធីជួយបង្កើនប្រព័ន្ធសុំាឲ្យរឹងមាំប្រឆាំងនឹង COVID-19