នៅផ្ទះកុំថ្ងូរថាអផ្សុក ព្រោះមានកន្លែងជាច្រើនដែលអ្នកត្រូវសម្អាត ដើម្បីកម្ចាត់មេរោគ

2020-03-27 10:20:00
ចំនួនមតិ 0 | ចំនួនចែករំលែក 0

កុំចាត់ទុកផ្ទះជាកន្លែងឃុំឃាំង ធ្វើឲ្យអ្នកធុញថប់ ដោយសារចេញទៅណាមិនបាន។ ក្នុងអំឡុងពេលនេះ ត្រូវគិតគូរខ្វល់ខ្វាយពីសុខភាពច្រើនជាងអ្វីទាំងអស់។ ជាពិសេសសម្រាប់អ្នកដែលចំណាយពេលនៅផ្ទះយូរ គ្មានអ្វីត្រូវរអ៊ូរទាំ ឬគិតថាអផ្សុកនោះទេ។ មានការងារផ្ទះច្រើនណាស់ ដែលអ្នកគួរធ្វើ ដូចជាការរៀបចំរបស់របរឲ្យមានរបៀបរៀបរយ និងការសម្អាតកន្លែងសំខាន់ៗ ដើម្បីធានានូវអនាម័យពេញលេញ គ្មានមេរោគបាក់តេរីមិនល្អ ដែលនាំឲ្យអ្នកឈឺថ្កាត់។

កន្លែងទាំងនោះរួមមាន៖

បន្ទប់គេង៖ បោកគក់កម្រាលពូក ស្រោមខ្នើយ ឬមុង...យ៉ាងហោចណាស់ឲ្យបានម្តងក្នុងមួយសប្តាហ៍។

បន្ទប់ទទួលភ្ញៀវ៖ បោះចោលឥវ៉ាន់ដែលមិនចាំបាច់ ជូតសម្អាតដីនិងធូលីកខ្វក់ ឲ្យបានស្អាតល្អ។

ផ្ទះបាយ៖ ជូតឥដ្ឋការ៉ូជាប្រចាំ អនាម័យម្ហូបអាហារដោយការរក្សាទុកនិងគ្របឲ្យបានត្រឹមត្រូវ លាងសម្ភារផ្ទះបាយជាមួយសាប៊ូបន្ទាប់ពីប្រើរួច សម្អាតទូទឹកកក កុំទុកចំណីអាហាររហូតដល់ខូចគុណភាព។

តុបាយ៖ ត្រូវជូតសម្អាតជាប្រចាំ មុននឹងក្រោយពេលញ៉ាំអាហាររួច។

បន្ទប់ទឹក៖ ត្រូវដុសលាងដោយប្រើទឹកសម្លាប់មេរោគក្នុងបន្ទប់ទឹក។ ជាពិសេស ចានបង្គន់ ឥដ្ឋការ៉ូ ដៃទ្វារ ជញ្ជាំង និងអាងទឹកត្រាំខ្លួនជាដើម។

ពេលចេញទៅខាងក្រៅ៖ ដាច់ខាតកុំទៅកន្លែងដែលមានមនុស្សច្រើនផ្តុំគ្នា ពាក់ម៉ាស់និងស្រោមដៃការពារ ដាក់អាល់កុលសម្លាប់មេរោគតាមខ្លួន កាត់បន្ថយសកម្មភាពនៅខាងក្រៅ។