នៅពេលស្រឡាញ់អ្នកណាម្នាក់ខ្លាំង អ្នកនឹងក្លាយជាអ្នកចាញ់ ទាំងខ្លួនគ្មានកំហុស
- 2020-03-27 01:35:00
- ចំនួនមតិ 0 | ចំនួនចែករំលែក 0
នៅពេលស្រឡាញ់អ្នកណាម្នាក់ខ្លាំង អ្នកនឹងក្លាយជាអ្នកចាញ់ ទាំងខ្លួនគ្មានកំហុស
សំណួរមួយដែលខ្ញុំតែងតែសួរខ្លួនឯងគ្រប់ពេលដែលខ្ញុំឈ្លោះគ្នាជាមួយគេ « ហេតុអីខ្ញុំត្រូវជាអ្នកទៅសុំទោសគេ ទាំងគេជាអ្នកខុស?» ចម្លើយដែលខ្ញុំបានមកវិញគឺ «មកពីខ្ញុំស្រឡាញ់គេ ខ្ញុំអត់ចង់បាត់បង់គេ»
ពេលខ្លះខ្ញុំក៏មានអារម្មណ៍ថាអន់ចិត្ត ហើយគិតថាហេតុអីខ្ញុំត្រូវទ្រាំនៅជាមួយមនុស្សដែលមិនខ្លាចនឹងបាត់បង់ខ្ញុំ ដូចខ្ញុំខ្លាចបាត់បង់គេ?
ខ្ញុំក៏ព្យាយាមណាស់ដែរ តែពេលខ្ញុំបែកពីគេអារម្មណ៍របស់ខ្ញុំហាក់ដូចចុះនរកអីចឹង រហូតត្រូវឲ្យខ្ញុំត្រឡប់ទៅសុំទោសគេ ទាំងគេមិនដែលសុំទោសខ្ញុំទោះគេជាអ្នកធ្វើខុសក៏ដោយ។
នៅពេលដែលអ្នកស្រឡាញ់អ្នកណាម្នាក់ខ្លាំង ពេលនោះអ្នកនឹងក្លាយជាអ្នកចាញ់ ហើយអ្នកនឹងលែងខ្វល់ថាអ្នកណាឈ្នះ អ្នកណាចាញ់ អ្វីដែលអ្នកដឹងនោះគឺអាចស្រុះស្រួលគ្នាតែប៉ុណ្ណោះ។
ប្រហែលពេលនេះខ្ញុំនៅស្រឡាញ់គេខ្លាំងរហូតធ្វើឲ្យខ្ញុំលែងមើលឃើញតម្លៃខ្លួនឯង ប៉ុន្តែត្រូវចាំថាអ្វីក៏ដោយក៏មានព្រំដែន និងទីបញ្ចប់ដែរ។
នៅពេលមួយដែលគេធ្វើឲ្យខ្ញុំឆ្អែតខ្លាំង ខ្ញុំជឿថាខ្ញុំនឹងមិនអាចទ្រាំទៅសុំទោសគេ ដើម្បីចង់តែត្រូវគ្នាវិញនោះទេ។
ត្រូវចាំណា ការស្រឡាញ់តែម្ខាងមិនអាចរស់នៅបានយូរអង្វែងទេ វានឹងបញ្ចប់នៅពេលណាមួយ។ ពេលខ្លះទោះខ្ញុំស្រឡាញ់គេខ្លាំងប៉ុណ្ណាក៏ដោយ បើអ្វីដែលគេផ្ដល់ឲ្យខ្ញុំលើសពេក ខ្ញុំនឹងសុខចិត្តខាំមាត់ដើរចេញ។
ពេលដែលខ្ញុំស្រឡាញ់គេខ្លាំង ខ្ញុំមើលឃើញគេដូចជាគ្រាប់ពេជ្រ តែគេមើលឃើញខ្ញុំវិញដូចជាដុំដីមួយដុំ ដែលគ្មានន័យអីទាំងអស់ក្នុងកែវភ្នែកគេ។ ខ្ញុំមិនបន្ទោសគេទេ នេះគឺមកពីខ្ញុំខ្លួនឯង ដែលលង់ស្រឡាញ់គេខ្លាំង រហូតធ្វើឲ្យគេគិតថាខ្ញុំគ្មានគេ ខ្ញុំរស់មិនបាន។
ជួយស្រឡាញ់ខ្ញុំវិញផង ទាន់ពេលនេះខ្ញុំស្រឡាញ់ខ្លាំង កុំចាំដល់ពេលមួយដែលខ្ញុំដើរចេញ ទើបសួរខ្ញុំថាហេតុអី៕
ចុចអាន៖ចំពោះខ្ញុំ រឿងស្នេហាគ្មានឡើយពាក្យថា “ចែករំលែក”