ប្រសិនបើខែនេះអ្នកនៅបើកប្រាក់ខែពេញនោះ សូមអរគុណជីវិតនេះទៅ
- 2020-03-26 06:30:00
- ចំនួនមតិ 0 | ចំនួនចែករំលែក 0
ប្រសិនបើខែនេះអ្នកនៅបើកប្រាក់ខែពេញនោះ សូមអរគុណជីវិតនេះទៅ
ក្រៅពីក្ដីព្រួយបារម្ភជាច្រើនពាក់ព័ន្ធនឹងវីរុស Covid 19 នោះ មេរោគមួយនេះក៏ជាហានិភ័យសម្រាប់មនុស្សរាប់លាននាក់ ដោយការងាររបស់ពួកគេត្រូវប៉ះពាល់យ៉ាងធ្ងន់ធ្ងរ។
មុននេះ ២ថ្ងៃ មិត្តភ័ក្ដិខ្ញុំនៅតែដើរចូលក្រុមហ៊ុនជាធម្មតា ដូចគ្មានអ្វីកើតឡើង តែទៅចូលដល់កន្លែងធ្វើការ ទើបគាត់ទទួលបានដំណឹងដូចជារំជួយផែនដីថា ក្រុមទីផ្សាររបស់គាត់ នឹងត្រូវក្រុមហ៊ុនផ្អាកជាបណ្ដោះអាសន្នរយៈពេល៣ខែ ឬវែងជាងនេះ រហូតទាល់តែសភាពការដំណើរការធម្មតាវិញ ដោយសារតែបច្ចុប្បន្នក្រុមហ៊ុនគ្មានចំណូល។ នៅពេលនេះ មិត្តខ្ញុំមានជម្រើស២នោះគឺ ទៅរកការងារថ្មី ឬនៅចាំចូលធ្វើការវិញ ដោយក្រុមហ៊ុននឹងជំនួយមួយខែ ៥០ដុល្លារ។ ពីចំណូលជាង៥០០ដុល្លារ សល់ត្រឹមជំនួយ៥០ដុល្លារ មិត្តខ្ញុំឮដំណឹងហើយ ហាក់ឈរលែងនឹងដោយសារនៅជំពាក់ធនាគារផង ហើយផ្ញើជូនឪពុកម្ដាយចាស់ជរានៅស្រុកទៀត។
រឿងខាងលើ គឺជាឧទាហរណ៍ជាក់ស្ដែង ដែលខ្ញុំបានប្រទះខ្លូនឯង ហើយនៅមានករណីធ្ងន់ធ្ងរជាងនេះជាច្រើនទៀត ដែលកំពុងកើតឡើងនៅជុំវិញខ្លួនខ្ញុំ។ ឈានជើងចូលឆ្នាំ ២០២០នេះ អ្នកណាក៏ចាប់ផ្ដើមដោយក្ដីសង្ឃឹម និងការរង់ចាំអ្វីដែលថ្មី និងល្អជាងឆ្នាំចាស់កន្លងទៅ តែមិនបាន១០០ថ្ងៃ ស្រួលបួលផង ដោយសារតែមេរោគថ្មីមួយ បានធ្វើឲ្យមនុស្សជាច្រើនបាត់បង់ការងារ ម្ចាស់អាជីវកម្ម ធ្លាក់ខ្លួនឡុងចុង ជំពាក់បំណុលជុំទិស។
មកដល់ពេលនេះ ទើបយើងឃើញថា តម្លៃនៃលុយថ្លៃប៉ុណ្ណា។ លុយដែលយើងធ្លាប់ចាយមិនសន្សំដៃនោះ បានប្រែទៅជាពិបាករកបាន។ នៅពេលនេះ ទោះបីជាតិចតួចយ៉ាងណាក៏វាជាសុភមង្គលមួយដែរ សម្រាប់អ្នកដែលអត់។
យ៉ាងណាក្ដី នៅមានមជ្ឈដ្ឋានមិនតិចឡើយ ដែលនៅតែរអ៊ូរទាំថា គ្មានលុយចាយ ដោយសារតែស្ងាត់ទីផ្សារ។ អ្នកមានដឹងថាទេថា នៅពេលនេះ បើយើងនៅមានជីវិត គឺជាសំណាងមួយទៅហើយ ដូចនេះ សូមរស់ដោយគិតតាមកាលៈទេសៈ កុំគិតដូចពេលកំពុងមានហូរហៀរទៀត។ អាស្រ័យហេតុនេះហើយ ប្រសិនបើអ្នកជាបុគ្គលិកស្ថាប័នណាមួយ ហើយនៅតែទទួលបានប្រាក់បៀរវត្តន៍ពេញនោះ សូមអរគុណជីវិតនេះទៅ ព្រោះក្នុងពេលលំបាកបែបនេះហើយ គេមិនទាន់កាត់បន្ថយបុគ្គលិក ហើយនៅរក្សាយើងដូចដើម៕
ចុចអានបន្ត៖ ផ្តើមចេញពីក្មេងស្រីដែលធ្លាប់តែអៀនខ្មាសច្រើន រហូតក្លាយជាសហស្ថាបនិកនៃសហគ្រាសសង្គម រួមទាំងស្នាដៃជាច្រើនទៀត