ភាពអស្ចារ្យរបស់មនុស្សស្រី ដាច់ខាតមិនស្ថិតនៅលើ ៣ យ៉ាងនេះឡើយ!

2020-03-03 07:20:00
ចំនួនមតិ 0 | ចំនួនចែករំលែក 0

នៅក្នុងសម័យកាល ឬ សង្គមមួយដែលពោរពេញទៅដោយការប្រកួតប្រជែង ពេលខ្លះវាអាចធ្វើឱ្យអ្នកភ្លេចថាខ្លួនឯងជាអ្នកណា មកពីណា ក្តីស្រមៃខ្លួនជាអ្វី។ យ៉ាងណាមិញ មនុស្សម្នាក់ៗឈរលើតម្លៃផ្សេងៗគ្នា ការដែលអ្នកដទៃឱ្យតម្លៃទៅលើអ្វីម៉្យាងខ្ពស់ វាជាសិទ្ធរបស់គេ ហើយការដែលអ្នកឱ្យតម្លៃនូវអ្វីដែលខ្លួនមាន ក៏ជាក្តីសុខផ្ទាល់ខ្លួនរបស់អ្នក។ ជួនកាល នៅពេលដែលមនុស្សជុំវិញអ្នកមានអ្វីដែលអ្នកគ្មាន អ្នកអាចនឹងចាប់ផ្ដើមមានការយល់ច្រឡំថាខ្លួនគ្មានភាពជោគជ័យ ឬ ភាពអស្ចារ្យដូចគេ។ ចូរកុំមានទស្សនៈបែបនេះឱ្យសោះ! ភាពអស្ចារ្យរបស់អ្នកមិនបានពឹងផ្អែកលើរឿង ៣ យ៉ាងនេះឡើយ៖

១. ស្វាមី ឬ សង្សារ

រូបតំណាង

នារីគ្រប់រូបគួរចាំថា ស្នេហាមិនមែនជាអ្វីគ្រប់យ៉ាងក្នុងឆាកជីវិតឡើយ។ មនុស្សម្នាក់ៗឱ្យតម្លៃទៅលើស្នេហាក្នុងកម្រិតផ្សេងគ្នា។ អ្នកខ្លះចាំបាច់ត្រូវតែស្វែងរកដៃគូស្នេហាសម្រាប់ខ្លួន ព្រោះវាមានអត្ថន័យសំខាន់ក្នុងជីវិតពួកគេ។ ផ្ទុយទៅវិញសម្រាប់អ្នក បើអ្នកជាមនុស្សឯករាជ្យ មិនត្រូវការដៃគូ ឬ ក៏មិនទាន់រកឃើញអ្នកណាដែលខ្លួនពេញចិត្តពិតប្រាកដ សូមកុំប្រៀបធៀបរឿងរ៉ាវរបស់ខ្លួនទៅនឹងអ្នកដទៃឱ្យសោះ ព្រោះភាពអស្ចារ្យមិនបានស្ថិតនៅលើជីវិតស្នេហាតែ១មុខឡើយ។

២. ទ្រព្យសម្បត្តិ និង សម្រស់

រូបតំណាង

ចំណុចមួយទៀតដែលអ្នកមិនគួរប្រៀបធៀបជាមួយគេឯងនោះគឺ ទ្រព្យសម្បត្តិ និង សម្រស់ ព្រោះថាទាំង ២ ចំណុចនេះសុទ្ធសឹងជាអ្វីដែលមនុស្សភាគច្រើននៅក្នុងសង្គមឱ្យតម្លៃខ្ពស់ជ្រុល រហូតដល់ធ្វើឱ្យអ្នកខ្លះបាត់បង់នូវទំនុកចិត្តក៏ដូចជាភាពជឿជាក់របស់ខ្លួនផងដែរ។ នារីគ្រប់រូប មិនថាក្មេង ឬចាស់ មិនគួរមានការយល់ច្រឡំថា តម្លៃរបស់អ្នកគឺស្ថិតនៅលើ ២ យ៉ាងនេះឡើយ ព្រោះវាជាគ្រាន់តែរបស់ក្រៅខ្លួនប៉ុណ្ណោះ។

៣. បរាជ័យរបស់អ្នកដទៃ

រូបតំណាង

ចំណុចចុងក្រោយ ហើយក៏ជាចំណុចសំខាន់ណាស់ដែរនោះគឺ ភាពអស្ចារ្យរបស់អ្នកមិនពឹងផ្អែកលើបរាជ័យរបស់អ្នកដទៃឡើយ។ បើការយកឈ្នះ ឬ សម្រេចនូវអ្វីមួយ តម្រូវឱ្យអ្នកផ្តួលរលំ ឬ ទម្លាក់តម្លៃរបស់អ្នកដទៃ នោះវាមិនមែនជាជោគជ័យឡើយហើយក៏គ្មានភាពអស្ចារ្យអ្វីនោះដែរ។ ភាពអស្ចារ្យមិនតម្រូវឱ្យអ្នកបន្ទាបតម្លៃនរណាម្នាក់ ហើយលើកតម្កើងតែខ្លួនឯង។ ភាពអស្ចារ្យមិនតម្រូវឱ្យអ្នកបង្ខំខ្លួនឯងដើម្បីឱ្យមានខ្សែជីវិតដូចអ្នកដទៃ។ ភាពអស្ចារ្យពិតប្រាកដនៃមនុស្សស្រីគឺស្តែងចេញពីខាងក្នុងតាមរយៈសីលធម៌ អត្តចរិត ទឹកចិត្ត ព្រមទាំងពាក្យសម្ដីជាដើម។

រូបតំណាង

ចូរស្រឡាញ់ និង ពេញចិត្តនូវអ្វីដែលខ្លួនមាន ព្រោះថាអ្នកក៏ជានារីអស្ចារ្យម្នាក់ដែរ ជាមួយនឹងអ្វីដែលអ្នកកំពុងមាន។ កុំបណ្តោយឱ្យបរិបទសង្គមធ្វើឱ្យអ្នកបាត់បង់ភាពជាខ្លួនឯងឱ្យសោះ៕