នៅពេលពរពោះមិនគួរធ្វើរឿង ៧ យ៉ាងនេះទេ បើមិនចង់ឲ្យប៉ះពាល់ដល់កូនក្នុងផ្ទៃ

2020-02-28 08:00:00
ចំនួនមតិ 0 | ចំនួនចែករំលែក 0

នៅពេលមានផ្ទៃពោះ អ្នកម្តាយគ្រប់រូបមិនត្រឹមតែត្រូវគិតគូរយកចិត្តទុកដាក់ចំពោះសុខភាព ចំណីអាហារប៉ុណ្ណោះទេ សូម្បីតែទម្លាប់ប្រចាំថ្ងៃមួយចំនួន ក៏ត្រូវមានការប្រុងប្រយ័ត្នខ្ពស់ ដើម្បីការពារមិនឲ្យប៉ះពាល់ដល់គភ៌ក្នុងផ្ទៃ។

មានទង្វើ ៧យ៉ាង ដែលមិនគួរមើលរំលងដើម្បីអាចធានាទាំងសុវត្ថិភាពម្តាយនិងកូន។

១. ត្រាំខ្លួនក្នុងអាងទឹកក្តៅឬទៅកន្លែងស្ទីមសូណា

កម្តៅក្តៅខ្លាំង នៅក្នុងអាងទឹកឬកន្លែងស្ទីមសូណា អាចជួយធ្វើឲ្យអ្នកមានអារម្មណ៍ធូរស្រាល ប៉ុន្តែវាមិនល្អសម្រាប់គភ៌ឡើយ ព្រោះសូម្បីតែនៅក្នុងផ្ទៃ ក៏កូនរបស់អ្នកអាចរងផលប៉ះពាល់ពីសីតុណ្ហភាពបានដែរ។ ជាពិសេសកម្តៅខ្លាំងពេក អាចបណ្តាលឲ្យជះផលអាក្រក់ដល់ខួរក្បាលនិងខួរឆ្អឹងខ្នងរបស់ក្មេងទៅថ្ងៃមុខ។

អ្វីដែលអ្នកគួរធ្វើ៖

មិនត្រូវឲ្យរាងកាយត្រូវកម្តៅលើសកម្រិត ហើយកុំត្រាំខ្លួនជាមួយនឹងទឹកក្តៅលើសពី១០នាទីឲ្យសោះ។
ងូតទឹកដែលមានកម្រិតសីតុណ្ហភាពដូចគ្នាជាមួយនឹងរាងកាយរបស់អ្នក។
អាចសួរនាំពីគ្រូពេទ្យជំនាញ ដើម្បីឲ្យច្បាស់ថា តើអ្នកអាចចំណាយពេលបានប៉ុន្មាន សម្រាប់ស្ទីមសូណាឲ្យស័ក្តិសមទៅនឹងសុខភាពរបស់ខ្លួន។

២. ញ៉ាំជាតិស្ករច្រើនពេក

ប្រសិនបើអ្នកញ៉ាំអាហារដែលមានជាតិស្ករច្រើនពេក ក្នុងអំឡុងពេលមានផ្ទៃពោះ នោះវានឹងបង្កផលប៉ះពាល់ដល់ការសិក្សារៀនសូត្រនិងការចងចាំរបស់កូននាពេលអនាគត។

អ្វីដែលអ្នកគួរធ្វើ៖

ញ៉ាំផ្លែឈើឲ្យបានច្រើន ជំនួសឲ្យអាហារផ្អែម។
កាត់បន្ថយភេសជ្ជៈដែលមានជាតិសូដាឲ្យនៅកម្រិតទាបបំផុត។

៣. ឈ្លោះប្រកែកគ្នា

ការឈ្លោះប្រកែកគ្នា អាចធ្វើឲ្យអ្នកស្មុគស្មាញ តប់ប្រមល់ និងបាក់ទឹកចិត្ត ដែលជាហេតុនាំឲ្យប៉ះពាល់ដល់គភ៌ ជាពិសេសប្រព័ន្ធការពារភាពស៊ាំ និងខួរក្បាលតែម្តង។

អ្វីដែលអ្នកគួរធ្វើ៖

សម្រាកឲ្យបានច្រើន
គេងឲ្យបានគ្រប់គ្រាន់
ធ្វើសមាធិ តាំងចិត្តឲ្យស្ងប់
ដើរលំហែអារម្មណ៍ ចេញស្រូបយកខ្យល់អាកាសស្រស់ស្រាយ។

៤. យំ

ការយំក្នុងអំឡុងពេលមានផ្ទៃពោះជារឿងទូទៅ ព្រោះខណៈនេះអារម្មណ៍របស់អ្នកនឹងមានការប្រែប្រួលឆាប់ខឹងឆេវឆាវជាងមុន។ យ៉ាងណាមិញ បើសង្កេតឃើញថាខ្លួនឯង មិនឃ្លានអ្វីទាល់តែសោះ ហើយចេះតែមានអារម្មណ៍ថាសោកសៅ ឬគេងច្រើនជ្រុល និងលែងចង់ធ្វើអ្វីផ្សេងៗទៀត វាអាចជាសញ្ញានៃជំងឺធ្លាក់ទឹកចិត្ត ដែលបង្កទៅជាបញ្ហាធ្ងន់ធ្ងរដោយមិនដឹងខ្លួន។

អ្វីដែលអ្នកគួរធ្វើ៖

បើករណីនេះកើតឡើងលើសពី២សប្តាហ៍ អ្នកគួរទៅពិគ្រោះជាមួយគ្រូពេទ្យឲ្យបានទាន់ពេលវេលា។
ស្វែងរកដៃគូសម្រាប់លើកទឹកចិត្ត និងព្យាយាមនិយាយលេងជាមួយអ្នកមានកូនឬអ្នកមានផ្ទៃពោះឯទៀត។

៥. ពិបាកគេង

តាមការសិក្សាស្រាវជ្រាវបានបង្ហាញថា មានស្ត្រីពោះធំដល់ទៅ ៧៨% ដែលជួបបញ្ហាគេងពុំលក់។ អាការៈបែបនេះ បានធ្វើឲ្យអារម្មណ៍មិនល្អនិងវិលមុខចង់ក្អួត។ សម្រាប់ស្រ្តីដែលគេងបានតិចជាង ៦ម៉ោងក្នុងមួយយប់ អាចធ្វើឲ្យការសម្រាលមានរយៈពេលយូរជាងធម្មតា។

អ្វីដែលអ្នកគួរធ្វើ៖

រៀបចំម៉ោងចូលគេងឲ្យបានត្រឹមត្រូវសាជាថ្មី
ព្យាយាមហាត់ប្រាណឲ្យបានហាងហោចណាស់ ៣០នាទី ក្នុងមួយថ្ងៃ
បើគេងមិនលក់ទេ កុំបង្ខំខ្លួនឯងខ្លាំងពេក អាចចំណាយពេលអានសៀវភៅល្អៗ ប៉ុន្តែកុំអានយូរពេក
ព្រឹក្សាជាមួយគ្រូពេទ្យជំនាញ ដើម្បីដឹងពីទីតាំងសមរម្យសម្រាប់គេង។

៦. មិនសូវបញ្ចេញសកម្មភាពនិងញ៉ាំច្រើនលើសកម្រិត

ការឡើងទម្ងន់ខ្លាំងពេកក្នុងអំឡុងពេលមានផ្ទៃពោះ អាចបណ្តាលឲ្យប៉ះពាល់ដល់ការលូតលាស់របស់គភ៌ ហើយសម្រាប់អ្នកម្តាយវិញ ក៏ពិបាកនឹងរក្សាទម្ងន់ដែរ។

អ្វីដែលអ្នកគួរធ្វើ៖

វេជ្ជបណ្ឌិតបានណែនាំឲ្យអ្នកមានផ្ទៃពោះ ត្រូវឆ្លៀតពេលហាត់ប្រាណយ៉ាងហោចណាស់ឲ្យបាន៣០នាតីក្នុងមួយថ្ងៃ។
កុំភ្លេចចេញដើរទៅខាងក្រៅខ្លះ ដើម្បីរក្សារាងឲ្យស្អាតបានយូរ ជាពិសេសបានឲ្យខួរក្បាលស្រូបយកខ្យល់អុកស៊ីហ្សែនផងដែរ។
គ្រប់គ្រងរបបអាហារឲ្យបានត្រឹមត្រូវ។ មិនគួរញ៉ាំលើសពី ២០០០ កាឡូរីក្នុងមួយថ្ងៃ សម្រាប់៦ខែដំបូង។ ក្រៅពីនេះសម្រាប់ខែបន្តបន្ទាប់ អ្នកអាចបន្ថែម ២០០ កាឡូរីទៀតជាប្រចាំ។

៧. ផឹកកាហ្វេលើសកម្រិត

រាល់ពេលដែលអ្នកផឹកកាហ្វេ ត្រូវចាំថា ជាតិកាហ្វេអ៊ីន នឹងចូលទៅដល់សុកនិងចរន្តឈាមរបស់គភ៌ក្នុងផ្ទៃ។ ជាទូទៅបើអ្នកផឹកកាហ្វេចាប់ពី ៨កែវឬលើសពីនេះ អត្រាធ្វើឲ្យទារកស្លាប់គឺស្ថិតក្នុងកម្រិតខ្ពស់បំផុត។

អ្វីដែលអ្នកគួរធ្វើ៖

គួរញ៉ាំអាហារឬផឹកភេសជ្ជៈណាដែលមានជីវជាតិបំប៉ន ជំនួសឲ្យកាហ្វេ។ បើអ្នកមិនអាចខ្វះកាហ្វេបាន អាចផឹកត្រឹម១-២កែវក្នុងមួយថ្ងៃ។

ចំណុចដែលបានរៀបរាប់ខាងលើ គ្រាន់តែផ្នែកសំខាន់មួយដែលអ្នកត្រូវប្រុងប្រយ័ត្ន ប៉ុន្តែនៅមានទម្លាប់មួយចំនួនទៀត ដែលអ្នកមិនគួរធ្វេសប្រហែស ឬអាចសាកសួរព័ត៌មានពីវេជ្ជបណ្ឌិតជំនាញនូវអ្វីផ្សេងទៀតដែលគួរជៀសវាង ដើម្បីអាចការពារសុវត្ថិភាពឲ្យបានពេញលេញទាំងម្តាយនិងកូន៕

ចុចអានបន្ត៖ សញ្ញា ១០ យ៉ាង បង្ហាញថារាងកាយរបស់អ្នកកំពុងគ្មានភាពប្រក្រតី

ប្រភព៖ Brightside ប្រែសម្រួល៖ ដេត ឈុនអ៉ី