ហេតុផល៥យ៉ាង នារីគួរនៅ Single ជាជាងទៅស្រលាញ់មនុស្សខុស
- 2020-02-20 07:15:00
- ចំនួនមតិ 0 | ចំនួនចែករំលែក 0
ហេតុផល៥យ៉ាង នារីគួរនៅ Single ជាជាងទៅស្រលាញ់មនុស្សខុស
ធ្លាប់ឆ្ងល់អត់ ហេតុអីអ្នកខ្លះអាយុច្រើនហើយ តែមិនឃើញអើពើមានគូដូចគេ? មិនមែនមកពីគ្មានអ្នកស្រលាញ់ទេ តែអាចមកពីពួកគេគិតថា បើនៅម្នាក់ឯងអាចនឹងល្អជាងមានស្នេហា ហើយត្រូវកើតទុក្ខរាល់ថ្ងៃនោះ។ ខាងក្រោមនេះ គឺជាមូលហេតុទាំង៥យ៉ាងដែលនារីៗយល់ឃើញ ហើយសុខចិត្តនៅ Single មិនព្រមរវីរវល់នឹងរឿងស្នេហា។
១.មិនបាច់ខ្វល់ខ្វាយពីមូលហេតុដែលនាំឱ្យបែកគ្នា
នៅម្នាក់ឯង មិនចាំបាច់ភ័យព្រួយថាធ្វើទង្វើរាល់ថ្ងៃអាចនាំឱ្យអ្នកណាឈឺចាប់ ឬខឹង ងរង៉ក់ត្រូវទៅលួងឡើយ។ អ្នកមិនក៏បាច់ត្រូវពិបាកចិត្តថានឹងត្រូវបែកគ្នាជាមួយអ្នកណា ហើយត្រូវមកអង្គុយខូចចិត្ត ឬយំសោកបោកខ្លួនដែរ។ សម្រាប់អ្នកដែលធ្លាប់ឈឺចាប់ដោយស្នេហា វិធីដែលអាចបំភ្លេចគេបាន គឺរម្លឹកដល់ទង្វើអាក្រក់ដែលធ្លាប់ធ្វើមកលើអ្នក នោះអាចជួយឱ្យអ្នកភ្លេចគេបានលឿន។
២. នៅ Single ក៏មិនប៉ះពាល់លើការស្រលាញ់ខ្លួនឯងឬអត់ដែរ
តើអ្នកធ្លាប់ឮទេថា ពេលមានស្នេហាទើបមនុស្សចេះស្រលាញ់ខ្លួន ចេះតែងខ្លួនឱ្យគេឃើញស្អាត ទាំងដែលការពិត យើងចេះស្រលាញ់ខ្លួនតាំងពីមិនទាន់មានគេ ឬមានស្នេហាម្ល៉េះ។ ការចេះថែរក្សាខ្លួនឯងមិនមែនទាល់តែមានស្នេហា ឬមានបុរសនៅក្បែរទេ។ ចុះបើយើងប្រឹងតែងខ្លួនដើម្បីមនុស្សជាទីស្រលាញ់ តែបើស្នេហានេះមិនចុះសម្រុងគ្នាទៅវិញ មានន័យអីទៅ? សំខាន់មិនថា មានស្នេហាឬអត់ យើងនៅតែចេះថែរក្សាខ្លួនឱ្យរឹងមាំបានគឺគ្រប់គ្រាន់ទៅហើយ។
៣. នៅម្នាក់ឯងអាចឱ្យអ្នកដឹងពីចំណុចខ្លាំងនិងចំណុចខ្សោយខ្លួនឯងបាន
នៅ Single បានន័យថា អ្នកកំពុងផ្ដល់ពេលវេលាសម្រាប់ខ្លួនឯង និងចេះរកឃើញចំណុចខ្លាំងនិងខ្សោយរបស់ខ្លួន ក៏ដូចជាការដែលត្រូវកែតម្រូវ។ អ្នកនៅមានពេលច្រើនដើម្បីបញ្ចូលខ្លួនឯងទៅក្នុងអ្វីដែលថ្មីដោយមិនបាច់ខ្លាចអ្នកណាហាមឃាត់។ បើពេលនេះអ្នកបានបែកគ្នាជាមួយគេហើយ ហេតុអីត្រូវមកអង្គុយកើតទុក្ខ? រកពេលវេលាសម្រាប់ខ្លួនឯងឱ្យក្លាយជាមនុស្សថ្មីវិញល្អជាង។ កុំទៅកើតទុក្ខនាំមុខជាំ។
៤. មានពេលច្រើនក្នុងការដឹងច្បាស់ថា អ្នកណាស្រលាញ់អ្នកពិតប្រាកដ
បើគ្រាន់តែខ្លាចគេថាក្រមុំចាស់ ឬអត់គូនឹងគេ ហើយប្រញាប់ទទួលក្ដីស្រលាញ់ពីបុរសណាម្នាក់ ដោយមិនបានគិតគូរឱ្យច្បាស់លាស់ អ្នកកំពុងតែគិតខុសហើយ។ ការនៅលីវយូរ មិនមែនជារឿងមិនល្អ ឬមកពីគ្មានអ្នកស្រលាញ់ទេ តែអ្នកអាចមានពេលច្រើនដើម្បីសង្កេតមើលថា អ្នកណាដែលអ្នកត្រូវជ្រើសរើសសម្រាប់ជាដៃគូអនាគត ជៀសវាងការស្រលាញ់ដែលមានក្ដីសុខតែមួយភ្លែត ហើយត្រូវបែកគ្នាវិញក៏ឆាប់ដែរនោះ។
៥.មានពេលវេលាបង្រៀនខ្លួនឯងឱ្យចាស់ចិត្តចាស់គំនិតជាងមុន
ពេលវេលាអាចបង្រៀនអ្នកឱ្យយល់ដឹងកាន់តែច្រើន។ ជាមួយនឹងរឿងរ៉ាវដែលអ្នកបានជួប និងអ្វីដែលអ្នកបានស្ដាប់ពីមិត្តភក្ដិកន្លងមក នឹងជួយឱ្យអ្នកស្វែងយល់ពីរសជាតិជីវិតបានច្រើន ហើយចេះរៀបចំខ្លួន និងសម្រេចចិត្តបានល្អ មិនមែនជាការសម្រេចចិត្តដោយអារម្មណ៍មួយឆាវដូចពេលនៅក្មេងទៀតឡើយ៕