អត់ស្នេហាក៏អត់បញ្ហា! ៧វិធីធ្វើឲ្យជីវិត Single រីករាយ និងមានន័យបំផុត

2020-02-14 10:00:00
ចំនួនមតិ 0 | ចំនួនចែករំលែក 0

ជីវិត Single ឬអត់គូគឺជាអ្វីដែលមនុស្សជាច្រើនភ័យខ្លាច ហើយគេតែងឮពាក្យចំអកចំអន់អ្នកអត់មានគូជាហូរហែដូចជា ចូលសារមន្ទីរ អត់លិទ្ធ លក់អត់ចេញ និងពាក្យជាច្រើនទៀតដែលស្ដាប់ទៅហាក់មានតែភាពអវិជ្ជមាន។ ប៉ុន្តែការពិត ការអត់គូវាមិនអាក្រក់ដល់ម្ល៉ឹងទេ ប៉ុន្តែវាជាពេលវេលាដែលយើងអាចបំពេញផ្នែកផ្សេងៗជាច្រើនទៀតក្នុងជីវិត។

១. ដើរលេងឲ្យអស់ដៃ

សម្រាប់អ្នកមានគូ គឺនឹងអាចជួបប្រទះបញ្ហាដែលត្រូវនៅផ្ទះមើលថែគ្រួសារ ឬចង់ទៅណាមកណាត្រូវចាំភាគីម្ខាងទៀតអនុញ្ញាតសិនទើបទៅបាន។ ប៉ុន្តែសម្រាប់អ្នកមិនទាន់មានគូ ពេលវេលានេះគឺជាឱកាសដែលអ្នកអាចដើរហើរ ស្គាល់សង្គម បានយ៉ាងពេញទំហឹង ដូច្នេះត្រូវឆ្លៀតពេលដែលសេសសល់ពីការងារដើរលេងលំហែឲ្យអស់ចិត្ត ទាន់អ្នកនៅមានពេលវេលា។

២. ប៉ាវខ្លួនឯងដើរ Shopping ឲ្យសប្បាយចិត្ត

មិនទាន់មានគូ មានន័យថាយើងមិនចាំបាច់ចែករំលែកការចំណាយជាមួយអ្នកណាទាំងអស់។ ដូច្នេះបើកប្រាក់ខែម្ដងៗ យើងអាចទិញរបស់ដែលខ្លួនចង់បាន ទិញសម្លៀកបំពាក់ថ្មីៗដើម្បីជារង្វាន់ខ្លួនឯងបានយ៉ាងពេញចិត្ត។ បើការ Shopping គឺជាក្ដីសុខរបស់យើងទៅហើយ យើងត្រូវរកលុយឲ្យបានច្រើន ហើយចំណាយលុយខ្លះដើម្បីក្ដីសុខនេះ។

៣. ចំណាយពេលជាមួយមិត្តភ័ក្ដិតាមចិត្ត

ពេលវេលាដែលអាចសប្បាយរីករាយជាមួយមិត្តភ័ក្ដិបានយ៉ាងពេញទីគឺមានតែពេលនៅ single នេះហើយ ដូច្នេះបើមានឱកាសគួរជួបជុំមិត្តភ័ក្ដិពង្រឹងទំនាក់ទំនងឲ្យបានច្រើន ល្អជាងស្ដាយក្រោយនៅពេលដែលអ្នកលែងមានពេលសម្រាប់ពួកគេ។

៤. ផ្ដល់ពេលវេលាឲ្យគ្រួសារឲ្យបានច្រើន

បើគិតតាមអាយុ នៅពេលនេះឪពុកម្ដាយយើងក៏ចាស់ហើយដែរ ពួកគាត់មិនអាចនៅជាមួយយើងរហូតទេ។ ដូច្នេះជាជាងអង្គុយកើតទុក្ខរឿងអត់គូស្រករ អ្នកគួរចំណាយពេលមើលថែពួកគាត់ឲ្យបានល្អ និងបង្កើនភាពរីករាយសម្រាប់ពួកគាត់ឲ្យបានច្រើនបំផុត ព្រោះនៅពេលអ្នកមានគ្រួសារ ពេលវេលារបស់អ្នកសម្រាប់ពួកគាត់លែងមានច្រើនទៀតហើយ។

៥. ធ្វើអ្វីដែលខ្លួនចូលចិត្តដោយមិនបាច់ខ្លាចអ្នកណា

បំណាច់នឹងគ្មានគូទៅហើយ អ្នកគួរតែធ្វើអ្វីដែលខ្លួនចូលចិត្ត និងចង់ធ្វើឲ្យហើយ មិនថារៀនត រៀនជំនាញផ្សេងៗ ញ៉ាំអ្វីដែលខ្លួនចង់ញ៉ាំ ជប់លៀងជាមួយមិត្តភ័ក្ដិ ឬធ្វើដំណើរបែប Adventure ផ្សេងៗ ព្រោះអ្នកអាចធ្វើវាបានដោយមិនមានការរំខានដូចពេលមានគូឡើយ។

៦. មើលថែខ្លួនឯងឲ្យស្អាត

ពេលវេលាស្រស់ស្អាតបំផុតរបស់មនុស្សស្រីគឺពេលនៅលីវនេះហើយ ព្រោះក្រោយរៀបការ មិនមែនថាអ្នកមិនមានពេលមើលថែខ្លួនឯងនោះទេ ប៉ុន្តែវានឹងពិបាក ដូចជាពេលអ្នកមានកូនជាដើម។ ញ៉ាំអាហារល្អៗ ហាត់ប្រាណ លាបក្រែមបំប៉ន និងការពារស្បែក ឲ្យនៅស្រស់ស្អាត ដូច្នេះមិនបាច់ភ័យទៀតឡើយថាគ្មានអ្នកណាមកស្រលាញ់។

៧. ស្វែងរកចំណេះដឹងបន្ថែម

ស្អាតតែម្យ៉ាងមិនគ្រប់នោះទេ មនុស្សស្រីសម័យនេះគឺត្រូវពូកែ និងឆ្លាតទៀតទើបកាន់តែមានតម្លៃ និងភាពរឹងមាំសម្រាប់ខ្លួនឯង។ អ្នកមិនរវល់ជាមួយស្នេហា ដូច្នេះវាគួរតែជាឱកាសក្នុងការ ស្វែងរកចំណេះដឹងអភិវឌ្ឍខ្លួនជានិច្ច ព្រោះពេលណាយើងមានចំណេះដឹងខ្ពស់ មុខតំណែងការងារយើងក៏វិវត្តទៅតាមនោះ ហើយក្នុងការរកស៊ីទៀតសោត ក៏ធ្វើឲ្យយើងមានឱកាស និងជោគជ័យកាន់តែច្រើនដែរ។

ឃើញទេ ការនៅលីវបើទោះបីឯកោនៅពេលខ្លះ ប៉ុន្តែវាក៏ជាការបើកឱកាសជាច្រើនសម្រាប់ខ្លួនឯង។ ដូច្នេះកុំទៅខ្លាចអត់គូអី ប៉ុន្តែត្រូវអត់គូដោយមានក្ដីសុខ ធ្វើអ្វីល្អៗសម្រាប់ខ្លួនឯងនិងអ្នកដទៃ នោះនឹងមានមនុស្សល្អៗចូលមកក្នុងជីវិតយើងដោយឯកឯង។ កុំប្រញាប់ចង់បានគូខ្លាំងពេក ព្រោះការមានគូហើយមានទុក្ខ វាគួរឲ្យខ្លាចជាងការនៅម្នាក់ឯងទៅទៀត ៕

ប្រភព៖ Spiceee ប្រែសម្រួល៖ ស្វាយ វ៉ាន់ថន