នារីបង្កប់មន្តស្នេហ៍គួរឲ្យស្រលាញ់ និងធ្វើអ្វីជាខ្លួនឯង តែងមានទម្លាប់ល្អ ៤ យ៉ាងនេះ

2020-02-11 11:00:00
ចំនួនមតិ 0 | ចំនួនចែករំលែក 0

មនុស្សស្រីមួយចំនួន ដែលខ្វះទំនុកចិត្តនិងភាពជឿជាក់លើខ្លួនឯង តែងតែរិះរកវិធីផ្សេងៗដើម្បីបង្កើនមន្តស្នេហ៍និងភាពទាក់ទាញរបស់ខ្លួន។ តាមការពិតរបស់អស់ទាំងនោះ មិនពិបាករកដូចជាអ្នកគិតឡើយ។ ដរាបណាអ្នកប្រកាន់ខ្ជាប់នូវអ្វីដែលជាខ្លួនឯង និងមានទម្លាប់ល្អៗ វានឹងរត់មករកអ្នកដោយឯងៗ។

១. ញញឹមជានិច្ច

តើអ្នកធ្លាប់ឭគេនិយាយទេថា ឲ្យតែមនុស្សយើងញញឹម ផ្ទៃមុខពិតជាស្រស់ស្អាតខុសពីធម្មតា? ដោយសារតែស្នាមញញឹម ធ្វើឲ្យអ្នកក្លាយជាមនុស្ស គួរឲ្យស្រលាញ់ចូលចិត្តរាប់អាន។ ញញឹមដាក់អ្នកជុំវិញខ្លួន ញញឹមដាក់បញ្ហា ញញឹមដាក់មនុស្សដែលអ្នកស្រលាញ់ ហើយក៏គួរព្យាយាមញញឹមដាក់មនុស្សដែលអ្នកមិនចូលចិត្តផង។ ធ្វើបែបនេះ អ្នកប្រាកដជាឈ្នះអស់រាល់ឧបសគ្គ ដែលកើតមាននៅនឹងមុខ ជាក់ជាមិនខាន។

២. ចេះសរសើរលើកទឹកចិត្តអ្នកដទៃ

មានមាត់ត្រូវចេះប្រើឲ្យមានប្រយោជន៍ដូចគ្នា។ បើឃើញគេស្អាតឬជោគជ័យគួរនិយាយចេះសរសើរ ចេញពីចិត្តពិត ហើយបើឃើញគេបរាជ័យ ឬជួបបញ្ហាក៏តែគួរមានពាក្យពេចន៍ដើម្បីលើកទឹកចិត្តដូចគ្នា។ ប្រព្រឹត្តតែអំពើល្អ មិនបាច់ដេកភ័យខ្លាចថាគ្មានញាតិមិត្តរាប់អានពិតប្រាកដ។

៣. ទទួលយកអ្វីដែលជាខ្លួនឯង

មុនពេលស្រលាញ់នរណាម្នាក់ កុំភ្លេចស្រលាញ់ខ្លួនឯងជាមុន។ មុនសម្រេចចិត្តរាប់អានអ្នកដទៃ ត្រូវប្រាកដណា អ្នកមិនព្យាយាមផ្លាស់ប្តូរ ដើម្បីផ្គាប់ចិត្តរបស់គេ។ ទទួលស្គាល់អ្វីដែលខ្លួនមាន ធ្វើជាខ្លួនឯង ឈប់ស្តីបន្ទោស និងមានគំនិតវិជ្ជមានលើខ្លួនឯងតទៅទៀត។ នេះហើយជាមន្តស្នេហ៍មិនសាបសូន្យ។

៤. ផ្តល់សេរីភាពដល់ខ្លួនឯងនិងមនុស្សដែលខ្លួនស្រលាញ់

ឈប់គិតពីទំហំនៃការស្រលាញ់បន្តិចសិន ហើយងាកមកផ្តល់សេរីភាព និងពេលវេលាគ្រប់គ្រាន់សម្រាប់ខ្លួនឯង និងមនុស្សដែលខ្លួនស្រលាញ់។ មិនថាជាការធ្វើដំណើរ ចេញទៅជួបមនុស្សនៅខាងក្រៅ ឬធ្វើអ្វីផ្សេងក៏ដោយ ត្រូវតែមានពេលវេលាផ្ទាល់ខ្លួនមួយ ដែលពុំចាំបាច់តម្រូវឲ្យមានដៃគូតាមជាប់ខ្លួនរហូតនោះទេ៕