ពន្លឺ ៧ យ៉ាងនៃស្នេហា ជួយការពារអ្នកមិនឲ្យឈឺចាប់ខ្លាំង
- 2020-01-29 07:30:00
- ចំនួនមតិ 0 | ចំនួនចែករំលែក 0
ពន្លឺ ៧ យ៉ាងនៃស្នេហា ជួយការពារអ្នកមិនឲ្យឈឺចាប់ខ្លាំង
និយាយដល់រឿងស្នេហា នរណាៗក៏អាចមានបានដែរ គ្រាន់តែកម្រិតនៃការយល់ដឹងនិងក្តីស្រលាញ់មានទំហំខុសៗគ្នាប៉ុណ្ណោះ។ ហេតុនេះហើយ ដើម្បីស្វែងរកពន្លឺ ធ្វើឲ្យស្នេហា កាន់តែភ្លឺថ្លាស្រស់ថ្លា និងការពារមិនឲ្យឈឺចាប់ខ្លាំង គួរចងចាំចំណុចសំខាន់ៗទុកកុំបីខាន។
១. ស្នេហាអាចធ្វើឲ្យមានអារម្មណ៍ល្អ ប៉ុន្តែកុំនៅទ្រាំទ្រអី បើវាធ្វើឲ្យអ្នកឈឺចាប់
ត្រូវចេះបែងចែករវាងក្តីស្រលាញ់និងទំនាក់ទំនងស្នេហា។ ពេលខ្លះស្រលាញ់ខ្លាំង ឈឺចាប់ក៏កាន់តែខ្លាំង បង្ហូរទឹកភ្នែកអស់កាន់តែច្រើន អ្វីៗមិនដូចជាការរំពឹងទុក។ អ្នកច្បាស់ជាមានអារម្មណ៍រំភើប ពេលបាននៅជិតមនុស្សដែលខ្លួនប៉ងប្រាថ្នា ប៉ុន្តែបើគេមានក្តីស្រលាញ់តបមកវិញបន្តិចផង កុំនៅទ្រាំទ្រ ខ្ជះខ្ជាយពេលវេលាអីល្អជាង។ ស៊ូនៅម្នាក់ឯង ប្រសើរជាងខំប្រឹងទះដៃតែម្ខាង។ រងចាំជួបមនុស្សដែលមានចិត្តលើអ្នកដូចគ្នា ទើបមិនឈឺចាប់។
២. កុំស្រលាញ់គេច្រើនជាងខ្លួនឯង
ម្តាយឪពុកបានបង្កើតនិងស្រលាញ់អ្នកលើសពីអ្វីៗទាំងអស់ ដូច្នោះហើយអ្នកក៏ត្រូវចេះស្រលាញ់មើលថែខ្លួនឯងឲ្យបានល្អដែរ ដើម្បីកុំឲ្យលោកទាំងពីរខកបំណង។ ដាច់ខាតកុំព្រោះតែក្តីស្រលាញ់ សុខចិត្តលះបង់គ្រប់យ៉ាងឲ្យទៅគេ រហូតដល់រីងរៃខ្សោះអស់ពីខ្លួន ចុងក្រោយដល់តែវិប្បដិសារី។
៣. បើស្រលាញ់កុំលាក់អាថ៌កំបាំងនឹងគ្នាអី
បើជាស្នេហាពិត អាថ៌កំបាំងច្បាស់ជាគ្មាននោះទេ។ រឿងឯកជនមួយចំនួនអាចនឹងលាក់ប៉ុន្តែបញ្ហាខ្លះ គួរបើកចំហចំៗប្រសើរជាង ពុំដូច្នោះទេ មន្ទិលសង្ស័យ ភាពខ្វះទំនុកចិត្ត នឹងបង្កទៅជាបញ្ហាធំរង្គោះរង្គើនឹងគ្នាមិនខាន។
៤. ស្នេហាមិនមែនជាការផ្លាស់ប្តូរទាំងស្រុង តែជាការបំពេញចន្លោះខ្វះខាតឲ្យគ្នា
ដើរនៅលើផ្លូវតែមួយ មិនចាំបាច់ផ្លាស់ប្តូរឲ្យដូចគ្នាទាំងស្រុងក៏មិនអីដែរ សំខាន់ឲ្យតែគូស្នេហ៍អាចចំណាយពេលវេលា ស្វែងយល់ពីគ្នា ជួយបំពេញចន្លោះខ្វះខាត និងចេះសម្របខ្លួន គ្រប់យ៉ាងនឹងប្រសើរឡើង។
៥. ស្នេហាជាការចេះទទួលយក ប៉ុន្តែមិនមែនអត់ធ្មត់តែម្ខាង
អ្វីដែលអ្នកផ្សេងចូលចិត្ត មិនប្រាកដថាអាចត្រូវគ្នាជាមួយនឹងចំណង់ចំណូលចិត្តរបស់អ្នកឡើយ។ ដូចជាពេលខ្លះ មានរឿងមួយចំនួន ដែលអ្នកមិនចង់ឲ្យដៃគូធ្វើ ប៉ុន្តែគាត់នៅតែធ្វើដដែល វាមិនមែនជាបញ្ហាធំឡើយ។ យ៉ាងណាមិញ ដរាបណាគាត់នៅតែរឹងទទឹង មិនព្យាយាមសម្របខ្លួនទាល់តែសោះ ហើយបណ្តោយឲ្យអ្នកខំប្រឹងអត់ធ្មត់ទទួលយកសម្ពាធតែម្នាក់ឯង ថ្ងៃណាមួយស្នេហាច្បាស់ជាដាច់រហែក។
៦. ស្នេហាមិនអាចខ្វះភាពស្មោះត្រង់
គូស្នេហ៍ក្រៅពីមានភាពផ្អែមល្ហែមហើយ ភាពស្មោះត្រង់ក៏មិនអាចខ្វះបានដែរ ព្រោះវាបញ្ជាក់ពីការផ្តល់កិត្តិយស ការគោរពនិងទុកចិត្តគ្នាទៅវិញទៅមក។
៧. មិននៅតោងទាមជាមួយស្នេហាដែលមិនសមនឹងតម្លៃរបស់អ្នក
ស្រលាញ់ខ្លាំងពេកអាចនឹងធ្វើឲ្យមនុស្សបាត់បង់សតិ។ បើខំប្រឹងធ្វើល្អយ៉ាងណា នៅតែគេមើលមិនឃើញតម្លៃរបស់អ្នក ទោះបីជាលះបង់លើសពីសមត្ថភាពទៀត ក៏នៅតែគ្មានន័យអីដែរ។ គួរប្រគល់ក្តីស្រលាញ់ទៅឲ្យនរណាម្នាក់ ដែលយល់ច្បាស់និងមើលឃើញពីតម្លៃពិតប្រាកដរបស់អ្នក ទើបមិនហត់នឿយ នឹងរត់តាមឬត្រូវផ្គាប់ចិត្តគេគ្រប់បែបយ៉ាង។
ដឹងពីពន្លឺសំខាន់ៗខាងលើហើយ សង្ឃឹមថាអ្នកអាចធ្វើការសម្រេចចិត្តត្រឹមត្រូវ មុននឹងមានទំនាក់ទំនងស្នេហា៕
ចុចអានបន្ត៖ មុនប្រគល់ការស្រលាញ់ទៅបុរសណា ពិនិត្យមើល ៧ ចំណុចនេះឲ្យមែនទែន បើមានគួរតែដកខ្លួនឲ្យ...