ដំណោះស្រាយ៥យ៉ាងនេះគួរប្រើ ពេលឃើញមិត្តប្រុសបង្ហាញទង្វើប្លែកៗ មិនដូចមុន
- 2020-01-20 06:05:00
- ចំនួនមតិ 0 | ចំនួនចែករំលែក 0
ដំណោះស្រាយ៥យ៉ាងនេះគួរប្រើ ពេលឃើញមិត្តប្រុសបង្ហាញទង្វើប្លែកៗ មិនដូចមុន
តើអ្នកគួរតែធ្វើដូចម្ដេចនៅពេលឃើញមិត្តប្រុសរបស់អ្នកផ្លាស់ប្ដូរ? នារីភាគច្រើន ចាប់ផ្ដើមគិតច្រើនពេលឃើញមិត្តប្រុសខ្លួន ខុសប្លែកមិនដូចមុន។ ធ្លាប់តែទូរសព្ទមកនិយាយលេងរាល់យប់ ៣ម៉ោង ឥលូវបែរកាត់បន្ថយកាន់តែខ្លីៗទៅ។ ធ្លាប់តែឆាតមកនិយាយពាក្យថា Goodnight មុនចូលគេង បែរជាលែងមាន ហើយសូម្បីថ្ងៃសំខាន់ៗដូចជា ខួបស្នេហ៍ ឬថ្ងៃកំណើតរបស់មិត្តស្រី ក៏គេមិនធ្វើអ្វីឲ្យ Surprise ដូចមុន។ អារម្មណ៍ពេលនេះ ប្រាកដថាគិតថា តើគាត់ឈប់ស្រលាញ់ខ្លួនហើយ ឬយ៉ាងណា?
ខាងក្រោមនេះ ជាវិធីខ្លះៗសម្រាប់នារី ដែលកំពុងជួបប្រទះស្ថានភាពស្នេហាបែបនេះ៖
**១. សួរអារម្មណ៍ខ្លួនឯង**
នៅពេលស្ថានភាពស្នេហាអ្នកដល់ដំណាក់កាលនេះ អ្នកគួរសួរខ្លួនឯងថាតើសកម្មភាពផ្លាស់ប្ដូររបស់គាត់ប៉ុណ្ណឹង អ្នកអាចទទួលយកបានឬអត់? តើវាធ្វើឲ្យអារម្មណ៍អ្នកឈឺចាប់ខ្លាំងឬទេ? ពេលខ្លះ គាត់ប្រែប្រួល ដោយសារគាត់ចង់ផ្លាស់ប្ដូរទម្លាប់របស់គាត់ពីមុន ដែលគាត់យល់ថា ទង្វើបែបនេះមិនសូវល្អសម្រាប់គាត់។ ម្ល៉ោះហើយ អ្នកសួរខ្លួនឯងសិនថា ទម្លាប់ថ្មីរបស់គាត់បែបនេះ អ្នកពេញចិត្តឬអត់? ទទួលយកបានឬទេ ហើយអ្នកនៅស្រលាញ់គាត់ទៀតអត់ ? សួរខ្លួនឯងសិន បន្ទាប់មកសម្រេចចិត្តថា តើគួរបន្ត ឬបញ្ចប់?
២. ទុកគម្លាតឲ្យគ្នាជាងមុន
ជួនកាលគាត់ផ្លាស់ប្ដូរ អាចថាមកពីអ្នក។ សាកគិតពីខ្លួនឯងសិនថា តើអ្នកបានផ្ដល់សេរីភាព ឬជីវិតឯកជនឲ្យគាត់គ្រប់គ្រាន់ឬទេ? បើអ្នកងប់ស្រលាញ់មិត្តប្រុសពេក រហូតឃ្លាំមើលគាត់ស្ទើរគ្រប់ផុស តាមគាត់ស្អិតពេក រហូតគាត់គ្មានពេលសម្រាប់ខ្លួនឯង នោះគាត់ផ្លាស់ប្ដូរគឺជារឿងត្រឹមត្រូវហើយ។
អ្នកគួរឲ្យគាត់នូវពេលវេលាផ្ទាល់ខ្លួន និងយល់ពីគាត់ឲ្យបានច្រើន។ មនុស្សបើចង់ខូច ទោះអ្នកឃ្លាំយ៉ាងណា ក៏គេនៅតែខូចឲ្យទាល់តែបាន។ ដូច្នេះ អ្នកគួរទុកចិត្តគ្នាទៅវិញទៅមក ទើបជាជម្រើសល្អ។
៣. កុំយករឿងដែលអ្នកគ្រាន់សង្ស័យមិត្តប្រុសទៅវែកញែកជាមួយមិត្តភ័ក្ដិ
មនុស្សស្រីពេលឃើញមិត្តប្រុសផ្លាស់ប្ដូរ ចាប់ផ្ដើមកើតស្រេ្តស អត់សប្បាយចិត្ត ហើយក៏យករឿងស្នេហាខ្លួនឯងទៅពិភាក្សាជាមួយមិត្តភក្ដិ។ ដំបូន្មានរបស់មិត្តភ័ក្ដិអ្នកឲ្យ ច្បាស់ណាស់ ៩៩% សុទ្ធតែប្រាប់ថា មិត្តប្រុសអ្នកបែកចិត្តហើយ ឲ្យអ្នកឈប់ទាក់ទងគេទៅ។ ពេលលឺពាក្យទាំងនេះហើយ កាន់តែស្រេ្តសលើសដើមមិនខាន។
ត្រូវចាំណា ! អ្នកគ្រាន់តែកត់សម្គាល់ថាគាត់បានផ្លាស់ប្ដូរខុសពីមុន តែមិនចាប់បានថា គាត់មានក្រៅនោះទេ។ តាមពិត ក្នុងនាមជាសង្សារ គ្មានអ្នកណាដឹងច្បាស់ពីគាត់ច្បាស់ជាងអ្នកនោះឡើយ ដូច្នេះត្រូវជឿជាក់ខ្លួនឯង កុំជឿសំដីអ្នកដទៃច្រើនពេក ធ្វើឲ្យស្នេហាបរាជ័យទាំងមិនដឹងខ្លួន។
៤. ព្យាយាមយល់ពីគាត់ឲ្យកាន់តែច្រើន
ចំណុចនេះ ទាមទារឲ្យអ្នកចំណាយពេលយល់ពីគាត់ឲ្យច្រើនបន្តិច ព្រោះស្នេហាភាគច្រើនឈ្លោះគ្នា ដោយសារមិនសូវយល់ពីគ្នាហ្នឹងហើយ។ ជួនកាលគាត់អាចរវល់ ឬមានរឿងរ៉ាវច្រើនពាក់ព័ន្ធនឹងការងារ ឬការសិក្សាដែលទាមទារឲ្យគាត់យកពេលច្រើនទៅចំណាយលើវា ហើយគ្មានពេល Take care អ្នកដូចមុន។ អ្នកត្រូវតែយល់ពីគាត់ឲ្យបានច្រើន ហើយត្រូវចាំថា មនុស្សស្រលាញ់គ្នាត្រូវតែយល់ពីគ្នាទៅវិញទៅមក។
៥. សួរគាត់ត្រង់ៗ
វិធីនេះ ទទួលបានផលជាងគេ ព្រោះអ្នកអាចទទួលបានចម្លើយពិត ហើយច្បាស់លាស់។ សួរគាត់ត្រង់ៗថា តើមានរឿងអ្វីមែនទេ បានជាគាត់មិនដូចមុន? តើគាត់កំពុងមានបញ្ហាអ្វីមិនសប្បាយចិត្តមែនទេ?។ កុំខ្លាចក្នុងការសួរ ហើយទុកពេលឲ្យគាត់ពន្យល់ និងប្រាប់ហេតុផលដល់អ្នកឲ្យយល់ច្បាស់ ជាជាងកាត់ស្មានខ្លួនឯង ហើយអង្គុយកើតទុក្ខម្នាក់ឯង៕
អានបន្ត៖ ៥ យ៉ាងនឹងធ្វើឲ្យអ្នកជួបស្នេហ៍ពិត សម្រាប់អ្នកចង់ចាប់ផ្តើមម្តងទៀត