តើត្រូវជ្រើសយកមនុស្សដែលយើងស្រលាញ់ ហើយគេមិនតបវិញ ឬមនុស្សដែលស្រលាញ់យើង?

2019-12-17 10:15:00
ចំនួនមតិ 0 | ចំនួនចែករំលែក 0

មនុស្សដែលយើងស្រលាញ់ មិនប្រាកដថានឹងស្រលាញ់យើង។ ឬគេក៏មានចិត្តលើយើងដែរ តែមិនអាចស្មើនឹងមនោសញ្ចេតនាដែលយើងឲ្យគេទេ។ អាក្រក់ជាងនេះទៀតគឺវាអាចគ្រាន់តែជាស្នេហាដែលចេញពីតែម្ខាង។ រូបរាងគេនៅជិតយើង តែបេះដូងបែរជានៅកន្លែងផ្សេង។ ដូចនេះ ហេតុអ្វីយើងត្រូវរើសគេនោះ?

រូបតំណាង

អ្នកអាចស្រលាញ់គេតែម្ខាងបានយូរប៉ុណ្ណា? អ្នកអាចស៊ូទ្រាំនឹងមនោសញ្ចេតនាដែលកំពុងនៅផ្លូវទាល់នេះដល់ពេលណាទៀត។ ដូចគេនិយាយមិនខុស អ្នកដែលស្រលាញ់គេច្រើនជាង តែងជាបុគ្គលដែលឈឺជាងគេ។ នៅពេលដែលយើងស្រលាញ់មនុស្សម្នាក់ច្រើនជាងគេស្រលាញ់យើង អ្វីគ្រប់យ៉ាងដែលធ្វើ ទោះបីជាអស្ចារ្យយ៉ាងណាក៏ប្រែជាសាមញ្ញក្នុងកែវភ្នែករបស់គេ ហើយគេក៏មិនបានឲ្យតម្លៃគ្រប់ទង្វើទាំងនោះដែរ។

រូបតំណាង

ពេលខ្លះមិនមែនមកពីគេមិនចង់ស្រលាញ់យើងទេ គ្រាន់តែគេមិនអាច។ មកពីយើងស្រលាញ់គេច្រើនពេក គ្មាននៅសល់ចន្លោះ ឲ្យគេតបស្នងមកវិញ។ ដល់ទីបញ្ចប់ យើងបានត្រឹមទទួលភាពមិនអើពើ និងសាបរលាបពីគេ។ និយាយឲ្យចំទៅ ជ្រើសយកមនុស្សដែលយើងស្រលាញ់គឺត្រឹមត្រូវ តែមនុស្សនោះក៏ត្រូវស្រលាញ់យើងវិញទើបត្រូវ។ ព្រោះបើស្រលាញ់គេម្ខាង យើងឈានមួយជំហាន គេថយមួយរយជំហាននោះ បេះដូងមានតែរបួសមិនខាន។

បើមានតែឈឺចាប់នោះ តាំងពីដំបូង គួររើសយកមនុស្សដែលស្រលាញ់យើងឲ្យហើយ។ មនុស្សដែលពីដំបូងយើងអាចមិនស្រលាញ់់គេជ្រាលជ្រៅ តែគេនឹងមិនចាកឆ្ងាយយើង សូម្បីតែក្នុងការគិត។ គេនឹងគ្មានថ្ងៃស្ដីបន្ទោស ឬហ៊ានធ្វើឲ្យយើងឈឺ ទោះបីពេលខ្លះយើងជាអ្នកខុសក៏ដោយ។

រូបតំណាង

តាមការពិតទៅ ស្នេហាដែលមានតែការឲ្យទៅ នៅពេលដំបូងមើលទៅគឺស្រស់បំព្រងខ្លាំងណាស់។ តែយូរទៅ គេនឹងមិនគោរពវា ហើយដែលអ្នកដែលឲ្យទៅ នឹងប្រែជាហត់នឿយ។ យើងអាចនិយាយថា ឲ្យតែយើងស្រលាញ់គេគឺគ្រប់គ្រាន់ហើយ គេមិនតបវិញក៏បាន តែជាក់ស្ដែង គឺយើងរំពឹងមនោសញ្ចេតនារបស់គេខ្លាំងបំផុត។ ដូចនេះ រើសយកអ្នកដែលយើងស្រលាញ់ ឬអ្នកស្រលាញ់យើង គឺអ្នកដឹងលទ្ធផលស្រាប់ហើយ នៅសល់តែការសម្រេចចិត្តប៉ុណ្ណោះ៕

អានបន្ត៖ ស្នេហានៅអាយុ១៧ឆ្នាំ និងនៅអាយុ២៥ឆ្នាំ ខុសគ្នាដូចម្ដេច?

ប្រភព៖ Guu ប្រែសម្រួល៖ Caramel