ខ្លាចប្ដីដឹងថាខ្លួនរលូតកូន នារីថៃលួចកូនគេហើយ លួចរត់ចេញពីមន្ទីរពេទ្យ
- 2019-12-16 03:15:00
- ចំនួនមតិ 0 | ចំនួនចែករំលែក 0
ខ្លាចប្ដីដឹងថាខ្លួនរលូតកូន នារីថៃលួចកូនគេហើយ លួចរត់ចេញពីមន្ទីរពេទ្យ
ដោយសារតែមិនហ៊ានប្រាប់តាមត្រង់ថាខ្លួនបានរលូតកូនហើយនោះ នារីម្នាក់មកពីប្រទេសថៃបានសម្រេចចិត្តលួចកូនរបស់គ្រួសារអ្នកដទៃតែម្ដង។
នារីជនជាតិថៃម្នាក់ឈ្មោះ Sriwaluck Akethamsatien អាយុ២៧ឆ្នាំបានរលូតកូនរបស់ខ្លួនកាលពីខែមុន។ ដោយសារតែមិនចង់ឲ្យប្ដី ដែលកំពុងចង់ក្លាយជាឪពុកខកបំណងនោះ អ្នកម្ដាយខាងលើនៅតែធ្វើពុតថាខ្លួនកំពុងពពោះនៅឡើយ។ ក្រោយមក នាងបានមកមន្ទីរពេទ្យមួយនៅខេត្ត Phang Nga ហើយបានស្គាល់ប្ដីប្រពន្ធមួយគូដែលទើបសម្រាលកូនរួច។
នារីដដែលបានប្រាប់ប្ដីថា ខ្លួនត្រូវនៅមន្ទីរពេទ្យដើម្បីសម្រាលកូន។ យ៉ាងណាក្ដី ក្រោយពេលសុំមើលថែរក្សាកូនរបស់ប្ដីប្រពន្ធខាងលើរួច នាងបានពរទារកនេះរត់គេចខ្លួនតែម្ដង បើតាមកាមេរ៉ាសុវត្ថិភាពថតបាន។ ក្រោយពេលចេញពីមន្ទីរពេទ្យ នាងបានជិះម៉ូតូឌុបតម្រង់ទៅផ្ទះ ដែលមានប្ដីកំពុងទន្ទឹងរង់ចាំនាងយ៉ាងសប្បាយចិត្តខ្លាំង។ យ៉ាងណាក្ដី ក្រោយពេលបាត់កូនខ្លួន ប្ដីប្រពន្ធខាងលើបានឆែកកាមេរ៉ាសុវត្ថិភាព ហើយតាមដល់ផ្ទះរបស់អ្នកលួចកូនរបស់ខ្លួន ដែលនៅឃ្លាតមន្ទីរពេទ្យ៨០០ម៉ែត្រ។
ក្រោយពេលប៉ូលិសសាកសួរ Sriwaluck បានសារភាពថា ក្រោយពេលត្រូវរលូតកូន ខ្លួនមិនហ៊ានប្រឈមមុខនឹងប្ដីឡើយ ដូចនេះនៅតែបន្តកុហករហូតមក។ ដល់ពេលត្រូវសម្រាលកូន ទើបនាងបានទៅលួចកូនគេបែបនេះ។ ដោយសារសកម្មភាពខាងលើ នាងត្រូវបានកាត់ទោសជាប់គុក៥ឆ្នាំ ពីបទចាប់ជំរិតកូនក្មេង៕
អានបន្ត៖ ១៥ សន្លឹកដែលជាងគំនូរបានប្រែភេទតួអង្គល្បីៗក្នុងរឿងគំនូរជីវចល