ធ្លាប់ទេ? អង្គុយស្តាប់រឿងគេឡើងចង់ហូរទឹកភ្នែក ស្អែកឡើងគេត្រូវគ្នាបាត់!
- 2019-12-16 03:20:00
- ចំនួនមតិ 0 | ចំនួនចែករំលែក 0
ធ្លាប់ទេ? អង្គុយស្តាប់រឿងគេឡើងចង់ហូរទឹកភ្នែក ស្អែកឡើងគេត្រូវគ្នាបាត់!
តើអ្នកធ្លាប់លើកទូរសព្ទមកឮសំឡេងមិត្តរបស់អ្នកយំរៀបរាប់រឿងស្នេហា ហើយ ចង់ឱ្យអ្នកទៅកំដរទេ? តើអ្នកធ្លាប់ដាក់ចិត្តដាក់កាយស្តាប់រឿងទុក្ខសោករបស់គេ ហើយ អាណិតអាសូររហូតយំតាមទេ? ហើយធ្លាប់ឱ្យយោបល់គេ ដល់ស្អែកឡើង ឃើញគេបង្ហោះរូបលើហ្វេសបុក (Facebook) យ៉ាងស្អិតរមួតវិញបាត់ទៅហើយ។
កាលពីមុន ពេលមិត្តភ័ក្តិហៅទៅកំដរព្រោះឈ្លោះគ្នាជាមួយសង្សារ ឬ បែកគ្នាម្តងៗគឺ ប្រញាប់ទៅភ្លាម ហើយ អង្គុយស្តាប់គេរៀបរាប់វិបត្តិដោយយកចិត្តទុកដាក់ រហូតពេលខ្លះចូលតួឡើងស្រក់ទឹកភ្នែកជំនួសទៀតក៏មាន ប្រយួសឱ្យគេបែកគ្នាក៏មាន ក្តៅក្រហាយជាមួយភាគីសង្សារនោះក៏មាន។ ស្រាប់តែស្អែកឡើងមិនទាន់ ឃើញគេផុសរូបជាមួយសង្សារគេវិញធ្វើមិនដឹង ទាំងយើងឡើងត្រដាបត្រដួសជាមួយអស់មួយយប់។ ណ្ហើយ! មិនដឹងនិយាយថាម៉េចឱ្យសមទេ។
តួនាទីជាមិត្តមានតែអ៊ីចឹង។ ថ្ងៃណាគេត្រូវគ្នា អង្គុយចាំតែ Like រូបផ្អែមល្អែមគេទៅ ហើយថ្ងៃណាគេឈ្លោះគ្នា អង្គុយចាំតែលើកទូរសព្ទទៅ។ យ៉ាងណាមិញ មិនមែនទៅខឹង ឬ អន់ចិត្តនឹងមិត្តខ្លួនឯងអ្វីនោះទេ គ្រាន់តែពេលខ្លះ ស្ថានការណ៍ផ្លាស់ប្តូរលឿនពេក ស្ទើរធ្វើចិត្តមិនទាន់ ។ អ៊ីចឹងហើយបានថា ពេលគេឈ្លោះគ្នា យើងកុំចូលតួជាមួយគេខ្លាំងពេក ពេលឲ្យយោបល់ថាគួរបែកគ្នាទៅ ដល់ពេលគេត្រូវគ្នាវិញ គឺយើងនឹងហើយជាអ្នកនៅចំកណ្តាលនៃរឿងនេះ ពិបាកមុខខ្លាំងជាងគេ៕
អានបន្ត៖ អារម្មណ៍នៅពេលដែលគេលែងស្រលាញ់យើងទៀត