កូនៗគួរបង្កើតភាពជិតស្និទ្ធដល់ឪពុកម្តាយព្រោះមនុស្សចាស់ងាយនឹងប្រឈមអារម្មណ៍ឯកោបំផុត

2019-12-04 09:00:00
ចំនួនមតិ 0 | ចំនួនចែករំលែក 0

សម្រាប់អ្នកវ័យជរា ពិភពលោកពិតជាតូចណាស់។ កាន់តែចូលវ័យច្រើន ឪពុកម្ដាយរបស់អ្នកកាន់តែមានអារម្មណ៍ឯកោឡើងៗ ព្រោះមិនសូវមានអ្នកជិតស្និទ្ធ និងគ្មានអ្នកចែករំលែករឿងរ៉ាវជាមួយ។

រូបតំណាង

** មនុស្សចាស់ដែលរស់នៅក្នុងភាពឯកោយូរ ច្រើនតែប្រឈមនឹងអត្រាមរណភាពខ្ពស់ យោងតាមការសិក្សាពីសាកលវិទ្យាល័យនៅប្រទេសសហរដ្ឋអាមេរិក បង្ហាញលទ្ធផលថា ២៣% នៃមនុស្សចាស់ជរាឯកោ បានស្លាប់ក្នុងរយៈពេល ៦ ឆ្នាំ និង ១៤% នៃមនុស្សចាស់មានសាច់ញាតិនិងមិត្តភក្កិបានស្លាប់ក្នុងអំឡុងពេលនេះ។

ការសិក្សាបន្ថែមទៀត ក្នុងចំណោម៣នាក់ មាន ១នាក់នៃមនុស្សចាស់ជរាមានអារម្មណ៍ឯកោ។ ដូច្នេះបើអ្នកមានឱកាសនិងពេលវេលា គួរតែឧស្សាហ៍តេទៅលេងឪពុកម្ដាយ ឧស្សាហ៍មានការហូបអាហារជុំគ្នា ដែលគ្រាន់តែធ្វើរឿងទាំងនេះ បានជួយបង្កើតគុណភាពជីវិតដល់លោកទាំងពីរឲ្យស្រស់បំព្រងនិងរស់រានបានយូរ។

រូបតំណាង

ប្រសិនបើអ្នកចង់ឲ្យឪពុកម្ដាយរស់នៅជាមួយអ្នកបានយូរ អ្នកត្រូវចំណាយពេលឲ្យបានច្រើនជាមួយលោកទាំងពីរ។ នេះជាឱសថទិព្វជួយបង្កើនអាយុដល់អ្នកមានគុណបាន។ បន្ថែមពីនេះ អ្នកក៏គួរចែករំលែករឿងល្អៗ អារម្មណ៍សប្បាយរីករាយ រួមទាំងការជជែកលេងឲ្យបានច្រើនជាមួយឪពុកម្ដាយ។

បើសិនអ្នកមានកូនតូចនៅផ្ទះ ក៏ត្រូវបង្ហាត់កូនឲ្យមានទំនាក់ទំនងជាមួយលោកតាលោកយាយរបស់គេ។ កុំគិតតែពីការងារ មុខជូរហួញ ធ្វើឲ្យឪពុកម្ដាយមិនសប្បាយចិត្តដែរ។ ម្យ៉ាងទៀត គួរឆ្លៀតពេលនាំឪពុកម្ដាយទៅដើរលេង សម្រេចបំណងប្រាថ្នាដែលលោកចង់ធ្វើជាយូរមកហើយ។ ទាំងនេះជាតម្លៃនៃអនុស្សាវរីយ៍ដែលមិនអាចកាត់ថ្លៃបាន។

រូបតំណាង

ភាពឯកោមិនមែនជាជំងឺទេ តែជាអារម្មណ៍សោកសៅដែលប៉ះពាល់ដល់សុខភាពបាន។ ម្ល៉ោះហើយ មុនពេលបាត់បង់លោកទាំងពីរ អ្នកត្រូវបង្កើតភាពជិតស្និទ្ធ យកចិត្តទុកដាក់លោកទាំងពីរបន្ថែម។ ឪពុកម្ដាយពិតជាត្រូវការក្ដីស្រលាញ់ និងការខ្វល់ខ្វាយពីអ្នកណាស់ ។ ដូច្នេះបើចង់ឲ្យអ្នកមានគុណរស់បានយូរ កុំទុកឲ្យលោកទាំងពីរឯកោ៕

អានបន្ត៖ មួយជីវិតរស់នៅតែម្ដង សូមកុំធ្វើរឿងទាំងនេះឲ្យខ្លួនស្ដាយក្រោយឲ្យសោះ

ប្រភព៖ bestie ប្រែសម្រួល៖ លឹម សុនា