ឆ្លងកាត់ការឈឺចាប់ច្រើនប៉ុណ្ណា មនុស្សស្រីនឹងកាន់តែរឹងមាំប៉ុណ្ណឹង
- 2019-11-27 04:40:00
- ចំនួនមតិ 0 | ចំនួនចែករំលែក 0
ឆ្លងកាត់ការឈឺចាប់ច្រើនប៉ុណ្ណា មនុស្សស្រីនឹងកាន់តែរឹងមាំប៉ុណ្ណឹង
ប្រសិនបើអ្នកគិតថា ក្រោយពេលឆ្លងកាត់ការឈឺចាប់ច្រើន មនុស្សស្រីនឹងកាន់តែទន់ជ្រាយ គិតអ្វីលែងត្រូវនោះ អ្នកគិតខុសហើយ ដ្បិតការឈឺចាប់ទាំងអស់នឹងបង្រៀនឲ្យគេក្លាយជាមនុស្សដែលមិនងាយចាញ់នឹងព្រហ្មលិខិត។
បើនិយាយថាជាស្ត្រីមួយរូបទៅហើយ គឺបានឆ្លងកាត់នូវគ្រប់រសជាតិជីវិតទាំងអស់ ដូចជាសុភមង្គល ឈឺចាប់ ខកចិត្ត គាំទ្រូង នឹកឥតល្ហែ។ គ្រាន់តែថា នារីពូកែលាក់អារម្មណ៍ខ្លួនមិនឲ្យបង្ហាញចេញតែប៉ុណ្ណោះ ទោះបីជាបេះដូងពួកគេកំពុងបែកជាចំរៀកក៏ដោយ។ ស្នាមញញឹមមួយតែងនៅលើបបូរមាត់នោះជានិច្ច ដើម្បីធ្វើជាម៉ាសបិទបាំងបានយ៉ាងល្អនូវរាល់ទុក្ខកង្វល់របស់ពួកគេ ព្រោះនារីដែលបានឆ្លងកាត់រឿងច្រើន គេដឹងច្បាស់ថា ការយំ ឬត្អូញត្អែរនៅលើបណ្ដាញសង្គមនឹងមិនអាចជួយដោះស្រាយបានអ្វីទាំងអស់។
នៅពេលមនុស្សដែលខ្លួនស្រលាញ់ចាកចេញទៅ បេះដូងដែលសឹករិចរិលហើយនោះ នឹងធ្វើឲ្យមនុស្សស្រីកាន់តែមោះមុតជាងមុន។ ពួកគេប្រាប់ខ្លួនឯងថា នឹងមិនឲ្យបេះដូងរំពឹងអ្វីទៀតទាំងអស់ មិនឲ្យឈឺម្តងទៀតនោះទេ ព្រោះពួកគេដឹងហើយថា អ្វីដែលឆាប់មក ក៏នឹងឆាប់ទៅវិញដូចគ្នា។
ឆ្លងអស់រឿងទាំងនេះ គេដឹងថា បើស្រលាញ់ខ្លាំងពេក លះបង់ខ្លាំងពេក ពួកគេនឹងត្រូវគេបោះបង់ដោយគ្មានស្ដាយស្រណោះ។ សុខចិត្តអាត្មានិយមបន្តិច គិតពីខ្លួនឯងច្រើនបន្តិច ទើបបេះដូងមួយនេះមិនគ្រាំខ្លាំង។
និយាយបែបនេះ មិនមែនមានន័យថា មនុស្សស្រីនឹងស៊ីខ្សែលើ លើមនោសញ្ចេតនារបស់គេឡើយ គ្រាន់តែថា មុនពេលសម្រេចចិត្តលើស្នេហាណាមួយ ពួកគេនឹងពិចារណាឲ្យបានល្អិតល្អន់ជាងកាលដែលនៅមើលឃើញអ្វីក៏ជាពណ៌ស៊ីជម្ពូ។
សម័យដែលមនុស្សស្រីបរាជ័យរឿងស្នេហាប្រែជាទន់ខ្សោយ បានក្លាយជាអតីតកាលទៅហើយ នៅពេលនេះ ក្រោយពេលដួល គ្មានអ្នកណាលើកក៏ពួកគេអាចងើបឡើងដោយខ្លួនឯង ហើយមាំជាងមុនទៀតផង៕
ចុចអាន៖ ឆោតបំផុតក្នុងរឿងស្នេហាគឺទទួលយកចំណងមនោសញ្ចេតនាដែលមិនច្បាស់លាស់