ហេតុផលធំៗ ធ្វើឲ្យមនុស្សស្រីមានចំណេះដឹងខ្ពស់ និងឆ្លាតវៃ កាន់តែពិបាករកប្តីទៅៗ

2019-11-22 03:05:00
ចំនួនមតិ 0 | ចំនួនចែករំលែក 0

មនុស្សស្រីដែលមានភាពវ័យឆ្លាត រៀនបានខ្ពង់ខ្ពស់ គឺជារឿងមួយដ៏អស្ចារ្យ និងមានភាពទាក់ទាញពីមនុស្សនៅជុំវិញខ្លួន។ នារីបែបនេះ ក៏អាចសម្រេចនូវអ្វីដែលខ្លួនចង់បានផងដែរ ប៉ុន្តែចំពោះរឿងស្នេហាវិញនោះ ដូចជាមិនសូវកាក់កបឡើយ។ ហេតុផលទាំង ៩ ខាងក្រោមនេះ អាចបញ្ជាក់ពីមូលហេតុដែលពួកគេមិនចង់ប្រឡូកប្រឡាក់រឿងស្នេហា ហើយគិតថាការនៅលីវល្អជាង៖

១. ចង់មានដែរ ប៉ុន្តែមិនមានពេលគិត

មនុស្សស្រីខ្លះ គឺដេកចាំតែរស់ស្រួលពឹងលើប្តី ប៉ុន្តែមនុស្សស្រីឆ្លាតវិញ នាងតែងមានជំហរដ៏រឹងមាំ មានការងារ ឬក៏មុខជំនួញដែលអាចគ្រប់គ្រងដោយខ្លួនឯងបាន ហើយស្រលាញ់សេរីភាព ទើបមិនបានចាប់អារម្មណ៍ពីរឿងស្នេហា។

រូបតំណាង

**២. គិតថានៅលីវគ្រាន់បើជាងមានប្តី**

កាន់តែចេះ កាន់តែរើសខ្លាំង ហើយក៏មិនសូវខ្វល់ពីគំនាបសង្គម ដែលគិតថាដល់អាយុត្រូវតែរៀបការនោះដែរ ព្រោះនាងខ្លាចប៉ះចំមនុស្សមិនល្អនាំអំពល់ទុក្ខឥតប្រយោជន៍។ ដូចនេះហើយចេះតែគិតថា នៅទំនេរប្រសើរជាងមានប្តី។

៣. មិនចេញទៅណាត់ជួបមនុស្សប្រុសផ្ដេសផ្ដាស

នាងប្រកាន់ខ្លួន ហើយគិតថាការណាត់ជួបគឺគ្រាន់តែជារឿងលេងសើច មិនអាចយកជាការបាន ថែមទាំងខ្ជះខ្ជាយពេលវេលាទៀត។ ភាគច្រើននាងផ្ដោតតែលើរឿងសិក្សា ឬភាពជោគជ័យក្នុងការងារ ហើយបណ្តោយតាមពេលវេលា ជួបមនុស្សដែលត្រូវចិត្តពេលណាពេលហ្នឹងចុះ។

រូបតំណាង

៤. ដឹងច្បាស់អ្វីដែលខ្លួនត្រូវការ

នាងរៀនពីកំហុសដែលអ្នកដទៃធ្លាប់ឆ្លងកាត់ ពេលបានដឹងឮហើយ នាងមានការប្រុងប្រយ័ត្នខ្លាំងណាស់មុននឹងសម្រេចចិត្ត ឲ្យបុរសណាម្នាក់ចូលមកក្នុងជីវិត មិនមែនចេះតែយកឲ្យតែបាននោះទេ។

៥. មិនជោរតាមគេតាមឯង

នាងមានភាពឯករាជ្យ ហើយមិនខ្វល់ថាអ្នកដទៃគិតមកលើនាងយ៉ាងម៉េចនោះទេ។ នាងចង់បានស្នេហាដ៏ពិតប្រាកដមួយ មិនមែនស្នេហាដោយសារការបង្ខំចិត្ត ព្រោះគិតខ្វល់ពីមាត់អ្នកដទៃនោះឡើយ។

៦. ចេះសម្របខ្លួនពេលនៅម្នាក់ឯង

មនុស្សស្រីខ្លះតែងគិតថាធុញទ្រាន់ និងឯកាណាស់ ពេលគ្មានអ្នកនិយាយ ប្រលែងថ្នាក់ថ្នមជាមួយ។ ប៉ុន្តែមនុស្សស្រីដែលមានចំណេះដឹងខ្ពង់ខ្ពស់ តែងតែរកគិតធ្វើអ្វី ដែលអាចបំបាត់ភាពអផ្សុកបានដូចជាការអានសៀវភៅ ធ្វើកិច្ចការផ្សេងៗដែលត្រូវនឹងចំណូលចិត្តរបស់ខ្លួន។

រូបតំណាង

៧. មិនចង់ខ្ជះខ្ជាយពេលវេលា

ពេលវេលាសម្រាប់នាងគឺមានតម្លៃខ្លាំងណាស់ ទើបនាងគិតថាពេលមានស្នេហា ជាការខ្ជះខ្ជាយពេលវេលាទៅវិញ ព្រោះមិនសូវបានធ្វើរឿងអ្វីផ្សេង។

៨. មានមោទនភាព

នរណាក៏ដូចនរណាដែរ ពេលដែលខ្លួនមានការចេះដឹងច្រើន តែងតែមានភាពស្ញប់ស្ញែង និងមោទនភាពចំពោះខ្លួនឯង ទោះបីជាមិនលើសលប់ពេក។ បែបនេះហើយនាងតែងចង់បាននរណាម្នាក់ដែលមាន អត្តចរិត និងចំណេះដឹងខ្ពស់ជាង ឬក៏ប្រហាក់ប្រហែលខ្លួនដែរ។

៩. មានគម្រោងច្បាស់លាស់ក្នុងជីវិត

មុននឹងឈានដល់ជីវិតអាពាហ៍ពិពាហ៍ នាងចង់ឲ្យមានលំនឹងផ្លូវចិត្ត និងរបរការងារ ដើម្បីអាចសាងគ្រួសារមួយប្រកបដោយសុភមង្គល និងភាពរុងរឿង៕