មនុស្សដែលយើងស្រលាញ់ និង មនុស្សដែលស្រលាញ់យើង
- 2019-11-15 06:05:00
- ចំនួនមតិ 0 | ចំនួនចែករំលែក 0
មនុស្សដែលយើងស្រលាញ់ និង មនុស្សដែលស្រលាញ់យើង
មិត្តនារីៗដែលជួបប្រទះដែរទេ នូវវេលាដ៏សែនពិបាកមួយនេះ? ពេលវេលាបានឱ្យស្គាល់គ្នាជាមួយមនុស្សពីរនាក់ ដែលម្នាក់ជាមនុស្សដែលអ្នកស្រលាញ់ ឯម្នាក់ទៀតជាមនុស្សដែលស្រលាញ់អ្នក។ ដែលឆ្ងល់ទេថា ហេតុអ្វីចិត្តមួយហ្នឹងចេះតែស្រលាញ់មនុស្សដែលគ្មានចិត្តមកលើខ្លួន ហើយបែរជាមិនត្រូវការមនុស្សដែលធ្វើគ្រប់យ៉ាងដើម្បីអ្នកទៅវិញ? ហើយដែលឆ្ងល់ដែរទេថា ហេតុអ្វីក៏ពួកគេមិនមែនជាមនុស្សតែមួយ?
សំណួរសួរថា តើអ្នកគួរជ្រើសរើសម្នាក់ណា?
មនុស្សដែលស្រលាញ់អ្នក
ប្រសិនបើអ្នកជ្រើសរើសយកមនុស្សដែលគេស្រលាញ់អ្នក ម្លោះគេនឹងស្ម័គ្រចិត្តធ្វើគ្រប់យ៉ាងដើម្បីអ្នក។ បុរសម្នាក់នោះនឹង ចំណាយពេលវេលាជាមួយអ្នក ថ្នាក់ថ្នមអ្នក យកចិត្តទុកដាក់ជាមួយអ្នក ហើយនឹងធ្វើអ្វីៗតាមចិត្តអ្នក។ ទោះបីជានេះ គឺជាអ្វីដែលគេនឹងធ្វើសម្រាប់អ្នកក៏ដោយ ចុះអ្នក? អ្នកចង់ទទួលអំពើល្អទាំងអស់នេះពីមនុស្សម្នាក់នោះទេ? អ្នកនឹងសប្បាយត្រកអរ អំពីក្តីស្រលាញ់ដែលគេផ្តល់ឱ្យអ្នកទេ? ឬវាគ្រាន់ជាក្តីអាណិត ? អ្នកត្រូវសួរខ្លួនឯងថា តើក្តីអាណិតនោះវានឹងស្ថិតនៅរហូតដល់ពេលណា? បើអ្នកដឹងថា អ្នកនឹងមិនអាចផ្តល់ជាក្តីស្រលាញ់ឱ្យគេវិញទេ គួរបញ្ឈប់ត្រឹមនេះល្អជាង។
មនុស្សដែលអ្នកស្រលាញ់
ប្រសិនបើអ្នកជ្រើសរើសយកមនុស្សដែលអ្នកស្រលាញ់ ម្លោះអ្នកនឹងដើរតួជាបុរសខាងលើវិញម្តង គឺអ្នកនឹងព្រមធ្វើអ្វីគ្រប់យ៉ាងដើម្បីគេ ដូចដែលបុរសម្នាក់ទៀតធ្វើដាក់អ្នក។ អ្នកនឹងលះបង់ពេលវេលាឱ្យគេ ព្យាយាមយកចិត្តគេ រហូតដល់អ្នកអាចមានអារម្មណ៍ថាហត់ នោះអ្នកនឹងគិតថា ហេតុអ្វីធ្វើបែបនេះហើយនៅតែមិនគ្រប់គ្រាន់ទៀត? តែយ៉ាងណាអ្នកនៅទ្រាំព្រោះគេជាមនុស្សដែលបេះដូងអ្នកត្រូវការ។
សរុបសេចក្តីមក ចម្លើយគឺថា អ្នកគួររង់ចាំ ជ្រើសរើសមនុស្សដែលស្រលាញ់អ្នកហើយអ្នកក៏ស្រលាញ់វិញផងដែរ។ ស្នេហាមិនអាចបង្ខំបាននោះទេ មិនថាអ្នកឬគេនោះទេ បើគ្មានចិត្តលើគេហើយ ទោះគេល្អរាប់រយដងទៀតក៏មិនអាចផ្តល់ក្តីស្រលាញ់ឱ្យបានដែរ។ មនុស្សលើលោកនេះមិនមែនមានតែ បុរសពីររូបនោះទេ ដូចនេះ អ្នកមិនចាំបាច់ត្រូវតែជ្រើសមួយក្នុងចំណោមពួកគេនោះទេហើយត្រូវជឿជាក់ថា ពេលវេលានឹងផ្តល់ឱ្យអ្នកនូវមនុស្សដែលសាកសម និងនៅពេលមួយដែលសាកសម៕
អានបន្ត៖ ចង់បំភ្លេចមនុស្សម្នាក់ត្រូវយកមនុស្សម្នាក់ទៀតមកជំនួស?