ធំហើយ ត្រូវធ្វើខ្លួនឲ្យរឹងមាំ ៥ចំណុចនេះ ទើបចូលសង្គម គ្មានអ្នកមើលងាយ

2019-11-06 08:50:00
ចំនួនមតិ 0 | ចំនួនចែករំលែក 0

ដល់ពេលវេលាហើយដែលមនុស្សស្រីត្រូវផ្លាស់ប្ដូរខ្លួនពីមនុស្សស្រីទន់ខ្សោយ មានចរិតកូនក្មេង មកជាមនុស្សស្រីរឹងមាំដើរទាន់សម័យ ព្រោះសម័យនេះ មនុស្សភាគច្រើនមិនមែនស្លូតៗ ត្រង់ៗដូចមុនទៀតទេ។ ម្ល៉ោះហើយ ប្រសិនបើអ្នកកំពុងឈានដល់វ័យមួយដែលត្រូវប្រឡូកសង្គមច្រើនហើយ គួរតែរៀនធ្វើខ្លួនឲ្យរឹងមាំ ជាមនុស្សឆ្លាតវៃ ប៉ុន្តែគួរឲ្យស្រលាញ់រាប់អានម្នាក់ ទើបមិនមានអ្នកណាហ៊ានមើលងាយ និងធ្វើបាប។

រូបតំណាង

**១. សួរខ្លួនឯងថាត្រូវការអ្វីពិតប្រាកដ**

ផ្អែកតាមការសិក្សារបស់ Harvard Business Review បង្ហាញថានារីរៀនចប់ MBA ត្រឹម ៧% ប៉ុណ្ណោះ ដែលហ៊ានចរចាប្រាក់ខែជាមួយចៅហ្វាយនាយ ខណៈដែលមនុស្សប្រុសដល់ ៥៧%ដែលហ៊ានតវ៉ាជាមួយចៅហ្វាយ។ នេះជាមូលហេតុដែលនាំឲ្យអ្នកមិនអាចទទួលបានអ្វីដែលខ្លួនត្រូវការ ព្រោះអ្នកមិនហ៊ានទាមទារ។ ដូច្នេះហើយ ប្រសិនបើអ្នកចង់ចេញមុខធ្វើ Project ថ្មីៗ ឬចង់បានប្រាក់ខែ និង Bonus បន្ថែម សូមកុំខ្លាចនឹងទៅនិយាយជាមួយប្រធានរបស់អ្នក។

២. រៀនបដិសេធ

ដឹងថាមនុស្សចិត្តល្អដូចជាអ្នក តែងចង់ជួយយកអាសាអ្នកគ្រប់គ្នា ប៉ុន្តែក្នុងជីវិតពិតគឺយើងមិនអាចជួយមនុស្សគ្រប់គ្នាបានទេ។ ពេលខ្លះ អ្នកអាចនឹងឈឺចិត្តដែលបានជួយមនុស្សខុសក៏ថាបាន។ ដូច្នេះ អ្វីដែលអ្នកធ្វើមិនបាន ឬហួសពីសមត្ថភាពអ្នក សូមបដិសេធភ្លាមទៅកុំស្ទាក់ស្ទើរ។ ត្រូវចាំថា អ្វីដែលធ្វើឲ្យសុខភាពកាយ សុខភាពចិត្ត អ្នកត្រូវរងសម្ពាធ បើមិនចាំបាច់ សូមកុំធ្វើ។

រូបតំណាង

៣. កំណត់ជីវិតខ្លួនឯង

បើអ្នកណានិយាយស្ដីមិនល្អជាមួយអ្នក អ្នកក៏មិនបាច់យកមកទុកក្នុងចិត្តគិតឲ្យធ្ងន់ខួរក្បាលដែរ។ ដូចគ្នា បើមានអ្នកព្យាយាមផ្លាស់ប្ដូរអ្នកទៅជាអ្វីដែលអ្នកមិនពេញចិត្ត ចូរប្រាប់គេទៅថា អ្នកមានក្ដីសុខជាមួយខ្លួនឯងបច្ចុប្បន្នស្រាប់ហើយ។ ត្រូវចាំថា ជីវិតនេះជារបស់យើង ដូច្នេះយើងគួរតែជាមនុស្សតែម្នាក់ប៉ុណ្ណោះដែលមានសិទ្ធិកំណត់វាបាន។ បើអ្នកមិននិយាយអ្វីដែលនៅក្នុងចិត្ត ឬគោលដៅរបស់អ្នកចេញមកទេ អ្នកដទៃក៏មិនអាចយល់បានដែរ។ ដូច្នេះហើយអ្នកគួរមានជំនឿលើខ្លួនឯង ហើយហ៊ានស៊ី ហ៊ានសង ព្រោះវានឹងជាថាមពលមហាសាល ដែលនឹងធ្វើឲ្យអ្នករឹងមាំ និងទទួលបានជោគជ័យ។

៤. មានជំនឿលើខ្លួនឯង

គ្មានអ្វីខុសនោះទេ បើអ្នកគ្រាន់តែចង់រស់នៅតាមរបៀបខ្លួនឯងដោយមិនបៀតបៀនអ្នកដទៃ ហើយក៏គ្មានអ្វីខុសដែរ បើអ្នកជ្រើសរើសអ្វីដែលល្អបំផុតឲ្យជីវិតខ្លួន ព្រោះលើលោកនេះ តែងមានមនុស្សដែលចង់មានឥទ្ធិពលលើជីវិតរបស់អ្នក ឬចង្អុលឲ្យអ្នកធ្វើតាមអ្វីដែលគេត្រូវការ ជាពិសេសបើអ្នកនៅតែធ្វើខ្លួនជាក្មេងមិនដឹងអី។ ដូច្នេះ សូមកុំឲ្យអ្នកណាមកកំណត់ជីវិតអ្នកជំនួសអ្នក។ ការសម្រេចចិត្តរបស់អ្នកត្រូវអាស្រ័យទៅលើការគិត និងអារម្មណ៍របស់អ្នក។

រូបតំណាង

៥. ចង់ឲ្យអ្នកដទៃធ្វើលើខ្លួនយ៉ាងម៉េច យើងត្រូវធ្វើលើគេយ៉ាងនោះ

ការផ្លាស់ប្ដូរពីក្មេងស្រីឡិកឡក់មកជានារីរឹងមាំ មិនមែនមានន័យថា អ្នកត្រូវដើរពើងទ្រូង ឬឈ្លើយនោះទេ ប៉ុន្តែគឺត្រូវរក្សាភាពរម្យទម ប្រយ័ត្នប្រយែង និងគោរពអ្នកដទៃទាំងតាមពាក្យសម្ដី និងទង្វើ ព្រមទាំងត្រូវសាបព្រោះថាមពលវិជ្ជមានឲ្យអ្នកនៅជុំវិញខ្លួនផងតាមរយៈការសរសើរ និងលើកទឹកចិត្តនានា។ ធ្វើបែបនេះ ធានាថាអ្នកនឹងក្លាយជាមនុស្សស្រីពូកែ ហើយមានមន្តស្នេហ៍ពេញខ្លួនថែមទៀត ៕

ចុចអាន៖

ប្រភព៖ Mthai ប្រែសម្រួល៖ ស្វាយ វ៉ាន់ថន