៥ វិធីជួយឱ្យអ្នកបាត់ខ្ជិល បែរមកជាឧស្សាហ៍មានកម្លាំងថាមពលឡើងវិញ

2019-11-21 04:00:00
ចំនួនមតិ 0 | ចំនួនចែករំលែក 0

ភាពខ្ជិលច្រអូស ជាសញ្ញាអាក្រក់មួយដែលនរណាៗក៏ធ្លាប់មានដែរ។ បើកភ្នែកឡើងគ្រាន់តែនឹកគិតឬសម្លឹងឃើញដល់កិច្ចការដែលត្រូវធ្វើនៅនឹងមុខ បែរជាមានអារម្មណ៍ថាធុញមិនចង់ធ្វើអ្វីទាំងអស់ទៅវិញ។ កុំថាឡើយធ្វើ ជួនកាលសូម្បីតែ ក្រោកឡើងក៏ក្រោកមិនចង់រួច ចង់តែដេកននាលលើពូក ទៅណាមកណាយឺតស្ទើរគ្រប់ពេល។ ទុកយូរទៀតមិនបានទេ ត្រូវតែរកវិធីបំបាត់ភាពខ្ជិល ទើបអាចធ្វើអ្វីៗប្រកបដោយប្រសិទ្ធភាពខ្ពស់។

១. កំណត់គោលដៅនិងជូនរង្វាន់ដល់ខ្លួនឯង

ការចេះកំណត់គោលដៅជារឿងចម្បងដែលអ្នកត្រូវធ្វើ។ នៅពេលដែលអ្នកដឹងពីទិសដៅច្បាស់លាស់ វាប្រៀបបានដូចជាកម្លាំងថាមពល ដែលអាចជួយជម្រុញ ឱ្យអ្នករកឃើញផ្លូវត្រូវទៅកាន់កន្លែងដែលបានគ្រោងទុក។ ទន្ទឹមគ្នានេះដែរ កុំភ្លេចជូនរង្វាន់ដល់ខ្លួនឯង រាល់ពេលធ្វើអ្វីមួយបានជោគជ័យ ទោះបីជាតូចឬធំក៏ដោយ ព្រោះមានតែខ្លួនអ្នកនេះហើយ ដែលជាមនុស្សដំបូងអាចលើកទឹកចិត្តខ្លួនឯងគ្រប់ពេលវេលា។

២. រាយក្នុងបញ្ជី

ការសរសេរកំណត់ចំណាំក្នុងសៀវភៅតូចមួយ អាចជួយឱ្យអ្នកធ្វើកិច្ចការផ្សេងៗ បានល្អប្រសើរជាងមុន។ អ្នកក៏ពុំចាំបាច់បង្ខំឱ្យខួរក្បាលត្រូវគិតចងចាំរឿងយ៉ាងពេកនាំឲ្យស្មុគស្មាញដែរ។ រឿងណាចាំបាច់គួរធ្វើមុន រឿងណាមិនទាន់បានធ្វើ អាចចាប់ផ្តើមជាបន្តបន្ទាប់ដោយមិនអូសបន្លាយទុកយូរ។

៣. ឈប់ប្រើពាក្យ “ចាំនេះចាំនោះតទៀត”

នរណាដែរថាមិនធ្លាប់ប្រើពាក្យមួយឃ្លានេះ? ភាគច្រើនតែងបោកប្រាស់ប្រាប់ខ្លួនឯងថា ចាំថ្ងៃនេះថ្ងៃនោះ ចាំស្អែក ចាំពេលក្រោយធ្វើក៏បាន។ ទាំងនោះហើយជាមូលហេតុ បណ្ដាលឱ្យកិច្ចការគរលើគ្នាច្រើន នាំឱ្យអ្នកកាន់តែធុញនិងខ្ជិលលើសដើម ដូច្នេះគួរព្យាយាមបញ្ចប់កិច្ចការផ្សេងៗឱ្យរួចរាល់ត្រឹមត្រូវ។

៤. មានទម្លាប់ល្អរាល់ថ្ងៃ

ភាពជោគជ័យចេញមកពីទម្លាប់ល្អនេះហើយ។ ពេលដំបូងៗ អ្នកអាចនឹងពិបាកសម្របខ្លួនជាមួយនឹងទម្លាប់ថ្មី ប៉ុន្តែយូរៗទៅ ការខិតខំមានទម្លាប់ល្អ ដូចជាភា្ញក់ពីព្រលឹម អានសៀវភៅ កាត់បន្ថយការចុចទូរសព្ទ ឬហាត់ប្រាណជាដើម នឹងធ្វើឱ្យរាងកាយរួមទាំងខួរក្បាល ចាប់ផ្តើមស៊ាំនិងញៀនជាមួយនឹងទម្លាប់ល្អដែលអ្នកតែងធ្វើជាប្រចាំ។

៥. គិតពីលទ្ធផល

រាល់ពេលដែលមានអារម្មណ៍ថាខ្ជិលខ្លាំង ដាច់ខាតត្រូវប្រកាន់ខ្ជាប់គំនិតវិជ្ជមាន និងគិតថាបើអ្នកឧស្សាហ៍ព្យាយាមជាងនេះ នោះអ្នកនឹងទទួលបានលទ្ធផលជាទីគាប់ចិត្ត មិនមែននៅស្ទក់ៗដើរក្រោយគេ។ ធ្វើអ្វីក៏ដោយ តែងមានផលល្អឬមិនល្អ ជារឿងធម្មតា សំខាន់អ្នកមិនរារែក បាក់ទឹកចិត្តពេលឃើញលទ្ធផលមិនល្អ។ ហើយនៅតែអាចបន្តដំណើរទៅមុខរហូតទទួលបានជោគជ័យ។

ដើម្បីបង្កើនថាមពលឱ្យខ្លួនឯងកាន់តែឧស្សាហ៍ព្យាយាមទ្វេដង អ្នកគួរតែចាប់ផ្តើមថ្ងៃថ្មី ដោយការចេញទៅខាងក្រៅស្រូបយកខ្យល់អាកាសនិងពន្លឺព្រះអាទិត្យ ព្រោះវាអាចធ្វើឱ្យអារម្មណ៍ស្រស់ស្រាយ ចំណែកឯការចងចាំក៏ល្អប្រសើរ។ បន្ទាប់មកត្រូវដកដង្ហើមចេញចូលឱ្យបានវែងៗ ដើម្បីជួយកាត់បន្ថយការលើសសម្ពាធឈាម និងចង្វាក់បេះដូង។ វិធីមួយផ្សេងទៀត ដែលអាចចូលទៅដាស់ខួរក្បាលឱ្យភ្ញាក់ឡើង គឺការទទួលទានភេសជ្ជៈដែលមានជាតិកាហ្វេអ៊ីន ដូចជាតែឬកាហ្វេជាដើម ប៉ុន្តែដាច់ខាតមិនត្រូវផឹកលើសកម្រិតទេ ព្រោះវាអាចប៉ះពាល់ដល់សុខភាពនិងបង្កទៅជាអាការៈគេងមិនលក់៕