ពាក្យបណ្តាំចុងក្រោយដ៏មានន័យ ពីមហាសេដ្ឋីវេជ្ជបណ្ឌិត ធ្វើឲ្យមនុស្សគ្រប់គ្នាចងចាំទុកជារៀងរហូត

2019-11-04 08:25:00
ចំនួនមតិ 0 | ចំនួនចែករំលែក 0

អស់រយៈពេល ៧ឆ្នាំមកហើយ ដែលវេជ្ជបណ្ឌិតដ៏មានទេពកោសល្យ Richard Teo បានបាត់បង់ជីវិត ប៉ុន្តែរឿងដែលមនុស្សគ្រប់គ្នានៅចងចាំបំភ្លេចមិនបាននោះគឺ ពាក្យបណ្តាំចុងក្រោយបង្កប់ដោយអត្ថន័យជ្រាលជ្រៅ ដែលលោកបានបន្សល់ទុក។ ក្នុងអាជីពការងារជាវេជ្ជបណ្ឌិតវះកាត់កែសម្ផស្ស ដែលមានកេរ្តិ៍ឈ្មោះល្បីល្បាញមួយរូបនៅក្នុងប្រទេសសិង្ហបុរី អ្វីដែលគាត់សោកស្តាយបំផុត មុនពេលស្លាប់ទៅ មិនមែនស្ថិតនៅលើទ្រព្យសម្បត្តិឬមុខមាត់ក្នុងសង្គមឡើយ ប៉ុន្តែជាពាក្យពេចន៍ទាក់ទងទៅនឹង "សុភមង្គលពិត” ដែលបានឆ្លងកាត់ក្នុងជីវិត និងចង់ចែករំលែកគំនិតល្អៗទៅកាន់មនុស្សគ្រប់គ្នា ដើម្បីកុំឲ្យស្តាយក្រោយដូចជារូបគាត់។

ក្នុងវ័យ២០ឆ្នាំ៖ គាត់ឲ្យនិយមន័យ " ទំហំនៃសុភមង្គលគឺស្ថិតនៅលើទឹកលុយ"

កើតនៅក្នុងគ្រួសារដែលមានជីវភាពលំបាក វេជ្ជបណ្ឌិត Teo Keng Siang (ឈ្មោះពិត) តែងតែមានគំនិតចង់ឲ្យជីវិតមានការផ្លាស់ប្តូរ។ កាលនៅវ័យក្មេង គាត់បានយល់ឃើញថា មានតែភាពជោគជ័យប៉ុណ្ណោះ ដែលអាចធ្វើឲ្យសប្បាយរីករាយ។ សម្រាប់លោក ភាពជោគជ័យគឺត្រូវវាស់ស្ទង់នៅលើទ្រព្យសម្បត្តិ ដូច្នេះហើយ ទើបបានជា Richard តែងតែខិតខំប្រឹងរកលុយខ្លាំងណាស់។ មិនថាធ្វើរឿងអ្វីក៏ដោយ គាត់តែងចង់បានតំណែងលេខមួយលើសគេជានិច្ច ដូចជាសិស្សពូកែប្រចាំសាលារៀន ទទួលបានមេដាយមាសពីការលេងកីឡា និងពានរង្វាន់ថ្នាក់ជាតិជាដើម។ គាត់មិនដែលចង់ចាញ់នរណាម្នាក់ដាច់ខាត។ ក្រៅពីនេះ លោកវេជ្ជបណ្ឌិត ក៏បានចូលរៀនផ្នែកជំងឺភ្នែក ដែលជាមុខជំនាញពោរពេញដោយការប្រកួតប្រជែងនៅក្នុងវិស័យវេជ្ជសាស្រ្ត។ ស្របពេលជាមួយគ្នា គាត់ក៏ទទួលបានអាហារូបករណ៍ ផ្នែកឡាស៊ែរភ្នែក ពីសាកលវិទ្យាល័យថ្នាក់ជាតិ នៃប្រទេសសិង្ហបុរីផងដែរ។ ប៉ុណ្ណឹងមិនទាន់គ្រប់គ្រាន់នៅឡើយទេ លោកបានបន្តបើកហាងកែសម្ផស្ស បន្ទាប់ពីរៀនចប់ ដោយសារគិតថាទាល់តែមានលុយនិងមានកេរ្តិ៍ឈ្មោះទើបអស្ចារ្យគេឯងកោតស្ញប់ស្ញែង។

ក្នុងវ័យ៣០ឆ្នាំ៖ គាត់ឲ្យនិយមន័យ "សុភមង្គលគឺជាការពេញចិត្តរីករាយនឹងចំនួនលុយនិងតំណែងដែលកំពុងមាន”

ការរកស៊ីធ្វើជំនួញបើកហាងកែសម្ផស្ស បានធ្វើឲ្យ Richard Teo មានទ្រព្យសម្បត្តិហូរហៀរនិងល្បីល្បាញខ្លាំងណាស់។ លោកបានបញ្ជាក់ទៀតថា "ក្នុងមួយឆ្នាំៗបើនិយាយពីចំណូលសរុប គឺខ្ទង់លានដុល្លារឯណោះ" ។ ចាប់ផ្តើមតាំងពីខ្លួនមួយ រហូតជួលបុគ្គលិកជាច្រើននាក់ឲ្យធ្វើការជាមួយ និងបានពង្រីកសាខាជាច្រើនកន្លែង ថែមទាំងមាននៅក្នុងប្រទេសឥណ្ឌូណេស៊ីទៀតផង។ សាខាកាន់តែរីក លុយកាន់តែច្រើន ជីវិតក៏កាន់តែមានន័យ" Richard បន្ត។

ដោយសារតែទទួលបានជោគជ័យក្នុងវ័យក្មេង Richard Teo រំភើបសប្បាយចិត្តរកអ្វីប្រៀបផ្ទឹមពុំបាន។ គាត់បានចំណាយលុយ លើអ្វីដែលខ្លួនចង់ធ្វើ ទិញឡានទំនើប Ferrari 430 ទិញផ្ទះធំស្កឹមស្កៃ និងញ៉ាំអាហារឆ្ងាញ់ៗ ដែលអាចធ្វើឲ្យគាត់មានអារម្មណ៍ល្អ ជាងអ្វីៗទាំងអស់។

ក្នុងវ័យ៣៨ឆ្នាំ៖ គាត់បានកើតជំងឺមហារីក និងទទួលស្គាល់ថាខ្លួនឯងពិតជាឯកាបំផុត

ជីវិតមិនអាចទាយត្រូវពិតមែន។ វេជ្ជបណ្ឌិត Richard Teo ចាប់ផ្តើមឈឺចុកចាប់ផ្នែកឆ្អឹងខ្នង នៅក្នុងឆ្នាំ ២០១០ ហើយបានសន្និដ្ឋានថាមូលហេតុបណ្តាលមកពីការហាត់ប្រាណនៅក្លឹប។ ក្រោយមកទៀត គាត់បានសង្កេតឃើញភាពមិនប្រក្រត្រី នៅក្នុងឆ្អឹងខ្នង។ ដោយសារសឹងមិនជឿថាខ្លួនឯងមានបញ្ហាសុខភាព គាត់បានធ្វើតេស្តពិនិត្យរកមើលជំងឺជាច្រើនមុខ ទីបំផុតលទ្ធផលបង្ហាញថា គាត់មានជំងឺមហារីកសួតដំណាក់កាលទី៤ បាត់ទៅហើយ។ កោសិកាមហារីក បានជ្រាបសាយភាយ ទៅកាន់ខូរក្បាល ឆ្អឹងខ្នង ថ្លើម និងក្រពេញម្យ៉ាងហៅថា adrenal។ បន្ទាប់ពីមានជីវិតស្រស់ស្រាយ លោកវេជ្ជបណ្ឌិត បានរងទុក្ខក្រៀមក្រំស្ទើរធ្លាក់ដល់កម្រិតសូន្យ ថែមទាំងទទួលស្គាល់ថាជីវិតរបស់លោក ពិតជាឯកាខ្លាំងបំផុត។ លុយ ឡាន ផ្ទះធំ លែងមានន័យសម្រាប់លោកតទៀត ហើយក៏មិនអាចជួយអ្វីបានដែរ។

តើអ្វីទៅដែលជាសុភមង្គលពិតប្រាកដ?

ដើរដល់ចំណុចនេះទើប Richard Teo អាចដឹងច្បាស់ថា តើសុភមង្គលពិតប្រាកដគឺជាអ្វី? វាគឺជាពេលវេលា ដែលអ្នកគួរចំណាយនៅជាមួយមនុស្សដែលខ្លួនស្រលាញ់ មិត្តភ័ក្តិ ក្រុមគ្រួសារ និងមនុស្សដែលធ្លាប់ចែករំលែកក្តីសុខនិងទុក្ខជាមួយគ្នាពីមុនមក។ ទម្រាំបានដឹង គឺហួសពេលអស់ទៅហើយ ព្រោះតែភាពចង់មានបាន ងប់ងុលនឹងទ្រព្យសម្បត្តិមុខមាត់ខ្លាំងពេក ធ្វើឲ្យគាត់ខកខានមិនអាចបែកចែកពេលវេលាឲ្យបានត្រឹមត្រូវ មិនអាចបកក្រោយវិញបាន មានតែពាក្យថា "ស្តាយក្រោយ" នាដង្ហើមចុងក្រោយ។ គាត់សង្ឃឹមថា ការចែករំលែកបទពិសោធន៍មួយនេះអាច ជួយឲ្យអ្នកចេះឲ្យតម្លៃចំពោះមនុស្សគ្រប់គ្នានៅជុំវិញខ្លួន។ ទាន់ឱកាសមាន ត្រូវមើលថែរក្សា មនុស្សដែលស្រលាញ់យកចិត្តទុកដាក់មកលើអ្នក បង្កើតការចងចាំល្អៗជាមួយគ្នាឲ្យបានច្រើន ទាំងនេះហើយទើបចាត់ទុកជា សុភមង្គល ពិតប្រាកដក្នុងជីវិត។