ពេលកើតទុក្ខ កុំសំងំយំតែឯង មានដំណោះស្រាយ ៦ យ៉ាង គួរធ្វើភ្លាមៗ
- 2019-11-04 03:30:00
- ចំនួនមតិ 0 | ចំនួនចែករំលែក 0
ពេលកើតទុក្ខ កុំសំងំយំតែឯង មានដំណោះស្រាយ ៦ យ៉ាង គួរធ្វើភ្លាមៗ
ឥឡូវនេះប្រហែលជាអ្នកកំពុងជួបបញ្ហាច្រើនណាស់ហើយ។ អារម្មណ៍វិលវល់ស្មុគស្មាញ គិតអ្វីមិនបានឆ្ងាយ មានតែសំងំយំតែម្នាក់ឯង។ បើទោះជាពេលបង្ហូរទឹកភ្នែក អាចជួយឲ្យអ្នកធូរទ្រូងបន្តិចមែន ប៉ុន្តែវាមិនមែនជាវិធីល្អនោះទេ។ ដំណោះស្រាយត្រឹមត្រូវ ទើបអាចសង្គ្រោះខ្លួនឯងចេញពីទុក្ខអាក្រក់ទាំងនោះ។
១. ចំណាយពេល ៣នាទី បំភ្លេចបញ្ហាឲ្យអស់សិន ហើយសម្រាកមើលរឿងតុក្កតាលំហែអារម្មណ៍
រឿងរ៉ាវទុក្ខសោកទាំងអំបាលម៉ាន បំភ្លេចចោលសិនទៅ ហើយសាកល្បងយកពេលវេលានេះមើលរឿងតុក្កតាវិញម្តង។ រូបភាព សំឡេង រួមទាំងសាច់រឿងបង្កប់អត្ថន័យអប់រំ កម្សាន្ត លើកទឹកចិត្តឲ្យមានភាពក្លាហានរឹងមាំ អាចជួយឲ្យអ្នកបានលំហែអារម្មណ៍ និងមិនផ្តោតលើបញ្ហាជាធំ។
២. ចំណាយពេល ៥នាទី កត់ត្រានូវអ្វីដែលជាសមិទ្ធផលធ្លាប់ទទួលបានក្នុងជីវិត
មុននឹងបន្ទោសថាខ្លួនគ្មានបានការ ចុះមាននឹកស្រមៃដល់អ្វីដែលធ្លាប់ទទួលបានពីមុនមកដែរទេ? មិនថាវាជាសមិទ្ធផលតូចឬធំក្តី បើគិតឃើញហើយ ត្រូវយកប៊ិចកត់ត្រាទុកក្នុងសៀវភៅផង។ កុំចេះតែប្រើគំនិតអវិជ្ជមាន ចំពោះខ្លួនឯងខ្លាំងពេក។
៣. ពេលធ្វើអ្វីមួយខុស ត្រូវឈប់ ១០នាទី ដើម្បីទទួលស្គាល់នូវអ្វីដែលបានកើតឡើង
ព្រមទទួលនូវទង្វើដែលបានប្រព្រឹត្តខុស ស្តាប់ទៅហាក់បីដូចជាពិបាកបន្តិចហើយ ប៉ុន្តែក៏គ្រាន់បើជាងមានកំហុសហើយមិនហ៊ានទទួលស្គាល់ដែរ។ មិនស្គាល់ការពិត បញ្ហាគ្រប់យ៉ាង គ្មានថ្ងៃដោះស្រាយបានឡើយ។
៤. ចំណាយពេល ១៥នាទី ធ្វើអ្វីថ្មីៗ ឬអ្វីដែលជាចំណង់ចំណូលចិត្តផ្ទាល់ខ្លួន
យកពេលវេលា ធ្វើរឿងណាដែលអាចជួយឲ្យអ្នកសប្បាយចិត្ត។ មានគំនិតថ្មីៗ ច្នៃប្រឌិតរបស់ប្លែកៗ ទុកគ្រាន់តាំងមើលក្នុងផ្ទះ បន្លប់ទុក្ខសោកចេញពីខ្លួនឲ្យអស់។
៥. ចំណាយពេល ២០នាទី ស្ប៉ាខ្លួនចេញម្តង
នៅកន្លែងស្ប៉ា គេតែងតែមានរបៀបរៀបចំតាមក្បួនខ្នាត និងដាក់ក្លិនក្រអូបប្រហើរ ដើម្បីជួយបន្ធូរអារម្មណ៍តានតឹងរបស់អ្នក។ វាជាជម្រើសដ៏ល្អមួយ ប្រសិនបើអ្នកមិនចង់ចេញទៅណាឆ្ងាយ។ ហើយបើមាននៅផ្ទះស្រាប់ទៀតកាន់តែល្អ មិនចាំបាច់អស់លុយច្រើន។
៦. ចំណាយពេល ៣០នាទី អានសៀវភៅល្អៗ
មិនខ្វះទេសៀវភៅល្អៗ ប៉ុន្តែគួរជ្រើសរើសមួយណាដែលអ្នកចូលចិត្តខ្លាំងបំផុត។ អាចជាសៀវភៅប្រលោមលោក លើកទឹកចិត្តផ្សេងៗ។ កាលណាអានកាន់តែច្រើន សាច់រឿងអាចនឹងត្រូវជាមួយនឹងជីវិតរបស់អ្នក ធ្វើឲ្យយល់ថាលើលោកនេះ មិនមែនតែអ្នកឡើយដែលមានទុក្ខ ហើយគ្រប់បញ្ហាទាំងអស់តែងមានដំណោះស្រាយជានិច្ច គ្រាន់តែត្រូវប្រើពេលយូរឬឆាប់ប៉ុណ្ណោះ៕
ចុចអានបន្ត៖