ព្យាយាមចាប់កំហុសអ្នកដទៃ គឺកំពុងយកទុក្ខដាក់ខ្លួនហើយ

2019-11-01 03:20:00
ចំនួនមតិ 0 | ចំនួនចែករំលែក 0

ក្នុងជីវិតមនុស្សគ្រប់រូប ជំនួសឲ្យការឆ្កឹះឆ្កៀលកំហុសអ្នកដទៃ សូមរស់នៅដោយខ្វល់តែជាមួយរឿងរបស់ខ្លួនបានហើយ ឲ្យបានធូរស្រាលខ្លះ ព្រោះរាល់ថ្ងៃគឺមានសម្ពាធគ្រប់គ្រាន់ពេកហើយ។

រូបតំណាង

អ្វីដែលយើងងាយប្រទះឃើញបំផុតនោះគឺ នៅពេលដែលមានអារម្មណ៍ល្អ យើងឃើញអ្វីក៏ចូលភ្នែកទាំងអស់ មានរឿងអីក៏អាចលើកលែងឲ្យបាន។ ទោះបីជារឿងពិបាកទទួលដល់ថ្នាក់ណាក៏ដោយ ក៏យើងអាចញញឹមឲ្យរឿងកន្លងផុតទៅបានដែរ។

នៅពេលទាំងនោះ មានអារម្មណ៍ថាពិភពលោកទាំងមូលហាក់ដូចជាមានសន្តិភាព អ្វីៗក៏ធូរស្រាល។ ប៉ុន្តែគ្រាន់តែមានក្ដីបារម្ភបន្តិច ពិបាកចិត្តបន្តិច ខ្វាយខ្វល់រឿងអតីតកាល ឬអនាគតនឹងធ្វើឲ្យពិភពលោកដែលកំពុងស្រស់ស្អាតនេះ ប្រែទៅជាផ្ទាំងគំនូរដ៏អួរអាប់មួយរំពេច។

រូបតំណាង

នៅពេលនោះ សំឡេងសើចលេងសប្បាយរបស់កូនក្មេង នឹងស្ដាប់ទៅគួរឲ្យធុញ សម្ដីនិយាយចេញមករបស់អ្នកណាម្នាក់ក៏ធ្វើឲ្យយើងទើសចិត្ត ឬមានរបួសចិត្ត។ រឿងតូចតាចដែលមិនគួរយកចិត្តគិតរាល់ដង ក៏ក្លាយទៅជាបន្ទុកមួយ។

ការពិតទៅ មិនមែនពិភពលោកមានបញ្ហានោះឡើយ តែបញ្ហាគឺស្ថិតនៅលើចិត្តយើង គឺយើងធ្វើចិត្តឲ្យស្រាលមិនទាន់បាន។ ដោយទាំងការពិត រឿងមិនធំដុំអ្វីសោះ តែយើងដើរចាប់កំហុសវា ធ្វើឲ្យក្លាយទៅជាសំពាធមិនដឹងខ្លួន។

រូបតំណាង

នៅក្នុងសង្គមនេះ យើងតែងមានទំនោរមើលអ្វីដែលយើងចូលចិត្ត មនុស្សដែលយើងស្រលាញ់ដោយពណ៌ស៊ីជម្ពូ និងផ្ទុយមកវិញ មើលអ្វីដែលយើងមិនចូលចិត្ត មនុស្សដែលយើងមិនចូលចិត្តដោយពណ៌ខ្មៅ។ ពោលគឺឲ្យតែអ្វីដែលយើងស្រលាញ់គឺសុទ្ធតែល្អ ហើយអ្វីដែលខ្លួនស្អប់គឺសុទ្ធតែអាក្រក់។

រូបតំណាង

ដោយសារតែទម្លាប់នេះហើយ យើងបានអចេតនាដាក់ទម្ងន់លើខ្លួនឯងដោយមិនដឹងខ្លួន ព្រោះឃើញគេធ្វើអ្វីក៏មិនត្រូវចិត្តយើង ចង់ឲ្យតែគេមិនបានសុខ។ ពេលឃើញគេមិនបានសុខ យើងក៏បានចិត្ត។ តែនេះគ្រាន់តែជារួបភាពនៅនឹងមុខប៉ុណ្ណោះ តែនៅក្នុងជម្រៅចិត្តយើង ការដែលឈ្នានីសគេបែបនេះ គឺធ្វើឲ្យខ្លួនរឹតតែរងទុក្ខប៉ុណ្ណោះ ព្រោះមួយថ្ងៃៗ គ្មានគិតអ្វីក្រៅពីទើសគេ។