ឆែកមើលរោគសញ្ញា ចង់ដឹងខ្លួនឯងមានកើតស្រ្តេស ឬ Depression ដែរទេ
- 2019-10-22 04:50:00
- ចំនួនមតិ 0 | ចំនួនចែករំលែក 0
ឆែកមើលរោគសញ្ញា ចង់ដឹងខ្លួនឯងមានកើតស្រ្តេស ឬ Depression ដែរទេ
មួយរយៈនេះ សង្កេតឃើញថាចំនួនអ្នកធ្លាក់ទឹកចិត្តកាន់តែកើនឡើង។ ជាមួយនឹងរោគសញ្ញានៃការបាក់ទឹកចិត្តរបស់មនុស្សមួយចំនួន ជាការសង្ស័យនិងមិនច្បាស់ថាខ្លួនកំពុងស្ថិតក្នុងលក្ខខណ្ឌអ្វី។ ក្នុងនោះក៏មានអ្នកយល់ច្រឡំរវាងការស្រេ្តស និង Depression ផងដែរ។ តាមពិតទាំងពីរនេះមិនដូចគ្នាទេ ។ ដូច្នេះ សាកល្បងតាមដាននិងត្រួតពិនិត្យរោគសញ្ញាខ្លួនឯងជាមុនសិន ថាតើអ្នកកំពុងស្រ្តេស ឬ កើត Depression ។
**-ស្រេ្តស**
ស្រេ្តសគឺជាការផ្ដោតលើការគិតអ្វីមួយរយៈពេលខ្លីដែលកើតឡើងក្នុងជីវិតរស់នៅហើយតែងកើតមានគ្រប់វ័យទាំងអស់។ វាអាចដូចជា ពេលប្រលង ជម្លោះជាមួយគ្រួសារ ឬគ្មានលុយចាយគ្រប់គ្រាន់ជាដើម។ ហេតុផលដ៏សាមញ្ញនេះ បណ្ដាលឲ្យក្លាយជាស្រេ្តសដ៏ធំសម្បើមមួយ។ ជាទូទៅ ត្រូវបានគេរកឃើញយ៉ាងតិច ៨០ % លើគ្រប់វ័យទាំងអស់។
ស្រេ្តស ជះឥទ្ធិពលអាក្រក់លើសុខភាពនិងផលអវិជ្ជមានលើការរស់នៅផ្សេងៗ។ អ្នកខ្លះ ថែមទាំងគេងមិនលក់ បារម្ភច្រើនលើរឿងដែលកន្លងផុតដដែរៗរហូតឈានដល់ដោះស្រាយដោយការលេបថ្នាំ។ យ៉ាងណាក៏ដោយ មានមនុស្សមួយចំនួនបានកាត់បន្ថយស្រ្តេសដោយខ្លួនឯង តាមរយៈការចេញដើរកម្សាន្ត ដើរផ្សារទិញអីវ៉ាន់ ឬជួបជុំមិត្តភក្កិជាដើម។ ម្ល៉ោះហើយ ជីវិតក៏ចាប់ផ្ដើមប្រែជាធម្មតាវិញ។ ដូច្នេះ នេះជាសញ្ញាទូទៅដែលចាត់ទុកថា "ស្រ្តេស" ។ វាមិនត្រូរបានគេហៅថា Depression ឡើយ។ ដូចនេះ អ្នកទាំងអស់គ្នាត្រូវតាមដានរោគសញ្ញាទាំងនេះសិន ថាកំពុងស្ថិតក្នុងដំណាក់ការស្រ្តេសឬយ៉ាងណា។
រោគសញ្ញារបស់មនុស្សដែលកើតស្រ្តេស
-ផ្តោតលើកិច្ចការអ្វីមួយមិនសូវបានល្អ ចេះតែគិតថាខ្លួនមិនអាច
-ងងុយគេង
-ការចងចាំចុះខ្សោយ
-គ្មានថាមពលធ្វើអ្វីមួយ
-ខឹងច្រើន
-មិនសូវឃ្លាន ធុំអាហារ
-មានអារម្មណ៍ពិបាកក្នុងខ្លួន
-គ្មានអារម្មណ៍នឹងន ការសិក្សាឬធ្វើការមិនសូវប្រក្រតីដូចមុន
-Depression
ជាជំងឺមួយប្រភេទដែលជះឥទ្ធិពលដល់ផ្លូវចិត្តយ៉ាងខ្លាំងដែលគ្រោះថ្នាក់ដល់ជីវិត។ អ្នកកើតជំងឺមួយប្រភេទនេះមិនងាយឆ្លងកាត់ឬធ្វើសកម្មភាពអ្វីមួយរលូនដូចមនុស្សទូទៅ ឬអ្នកត្រឹមកើតស្រេ្តសនោះឡើយ។ ដោយសារតែក្នុងខួរក្បាលចេះតែជំរុញឲ្យគិតថា ពិបាកភ្ជាប់ទំនាក់ទំនងជាមួយមនុស្សជុំវិញ។ រោគសញ្ញាមួយរបស់អ្នកកើត Depression ចូលចិត្តសំងំតែម្នាក់ឯង ហើយរឿងទាំងអស់នេះពេលខ្លះយើងមិនបានចាប់ថ្នាក់។ ជួនកាល អ្នកកើតជំងឺជាមនុស្សឆ្លាត បុគ្គលិកលក្ខណៈល្អ វាងវៃ ប៉ុន្តែរាល់យប់បែរជាពួកគេជាមនុស្សច្រើនគិតថាខ្លួនឯងជាអ្នករងនូវគ្រោះថ្នាក់ គ្មានប្រយោជន៍គ្រប់ពេលវេលាទៅវិញ។
Depression មិនអាចដោះស្រាយដោយខ្លួនឯងបានទេ។ វាទាមទារការព្យាបាលពីគ្រូពេទ្យយ៉ាងយកចិត្តទុកដាក់។ ដោយសារមានហេតុផលជាច្រើនដែលបណ្ដាលឲ្យកើត Depression ដូចជាខ្វះការលើកទឹកចិត្តធ្ងន់ធ្ងរពេកអស់រយៈពេលជាច្រើនឆ្នាំ សម្ពាធដោយសារស្ថានភាពដ៏តានតឹងក្នុងការរស់នៅ ឬរឿងរ៉ាវសៅហ្មងក្នុងចិត្តអស់ពេលច្រើនឆ្នាំជាដើម។ លើសពីនេះ ក៏មានកត្តាច្រើនដែលរួមបញ្ចូលគ្នា ទៅជាភាពខុសប្រក្រតីបំផ្លាញខួរក្បាល ឲ្យក្លាយជាក្រៀមក្រំគ្របដណ្ដប់ចិត្តដោយភាពធុញថប់គ្រប់ពេល។
រោគសញ្ញានៃជំងឺ Depression
-អស់សង្ឃឹមនិងតែងតែបាក់ទឹកចិត្ត
-ចងចាំពាក្យដែលគេនិយាយមិនល្អស្ទើរគ្រប់ម៉ាត់ក្នុងចិត្ត ហើយខ្វល់ច្រើនពីពាក្យទាំងនោះ
-គ្មានកម្លាំងចិត្តបន្តធ្វើរឿងគ្រប់យ៉ាង
-គេងច្រើន ឬគេងតិចជាងខុសធម្មតា
-សម្រេចចិត្តលើរឿងគ្រប់យ៉ាងដោយគំនិតអវិជ្ជមាន
-តែងតែគិតថាខ្លួនឯងមិនល្អគ្រប់គ្រាន់
-ឃើញតម្លៃខ្លួនឯងកាន់តែទាប
-អស់កម្លាំងញឹកញាប់
-គ្មានលទ្ធភាពផ្តោតលើរឿងរ៉ាវដែលខ្លួនចូលចិត្ត
-មានអារម្មណ៍ថាខ្លួនកំពុងសាងកំហុស និងអារម្មណ៍មិនល្អសឹងគ្រប់វេលា
-គិតអំពីរឿងមិនល្អដែលកើតឡើង ស្ទើរគ្រប់ពេលទាំងអស់
-មិនអាចបំភ្លេចហេតុការណ៍អតីតកាលងាយៗ សូម្បីរឿងតូចតាច
-បង្ខាំងខ្លួនឯងមិនចង់សាកអ្វីថ្មីៗ
-ចង់ធ្វើអត្តឃាតខ្លួនឯង
ដូច្នេះ បើត្រួតពិនិត្យឃើញថាខ្លួនឯងមានចំណុចទាំងនេះ វាជាសញ្ញាគ្រោះថ្នាក់ដែលអ្នកគួរប្រញាប់ទៅរកគ្រូពេទ្យដើម្បីពិភាក្សាជាបន្ទាន់។ ករណីនេះ អ្នកមិនគួរទុកខ្លួនឯងចោលម្នាក់ឯងឡើយ។ នៅពេលអ្នកទុកឲ្យជំងឺនេះចាក់ឬសគល់ជ្រៅទៅៗ ដោយមិនបានពិភាក្សាទេ បញ្ហានឹងមិនអាចដោះស្រាយបានឆាប់រហ័សឡើយ។ យ៉ាងហោចណាស់ គួររកមនុស្សទុកចិត្តណាម្នាក់ស្ដាប់អ្នកនិយាយ ហើយអាចជួយអ្នកបាន។ កុំគិតថា អ្នកជាមនុស្សឯកោនៅក្នុងពិភពលោកនេះ ប្រសិនបើអ្នកពិតជាចង់ចាកឆ្ងាយពីជំងឺនេះ ត្រូវប្រញាប់ទៅរកគ្រូពេទ្យ៕
ចុចអាន៖ ឧស្សាហ៍ក្រោកយឺតហើយចង់តែគេងត មិនមែនខ្ជិលទេ តែអាចជាជំងឺផ្លូវចិត្ត